قوعام • 06 قاراشا، 2020

لايبۇلاقتىڭ تۇرعىندارى لاي سۋ ءىشىپ وتىر

330 رەت كورسەتىلدى

شەكارا شەبىندەگى ءۇرجار اۋدانىنا قاراستى لايبۇلاق اۋىلىنىڭ تۇرعىندارى ينتەرنەت پەن اۋىز سۋعا ءزارۋ، دەپ حابارلايدى Egemen.kz

– اۋىلداعى اۋىز سۋىمىز لاستانىپ كەتتى. سۋ ىشە المايمىز. قۇدىق ەكى جەردە عانا. قىستىڭ كۇنى بىتەلىپ، كەيدە مۇلدەم توقتاپ قالادى. وسىدان ءتورت شاقىرىم جەردە ءۇش بۇلاقتىڭ كوزى بار. اۋىلعا سۋ سول جەردەن 70 جىل بۇرىن تارتىلعان قۇبىرمەن كەلەدى. قۇبىردىڭ ءوزى ءشىرىپ جاتىر. اكىمدەردىڭ جوسپاردا بار دەگەن سوزدەرىنەن جالىقتىق، – دەيدى اۋىل تۇرعىنى ءاليا تاجىباەۆا.

جوسپار جۇزەگە اسپاي جاتسا، تۇرعىندار البەتتە جالىعادى، شىدام دا شەگىنە جەتەدى. شەگىنە جەتكەن سوڭ شاعىمدانادى. ول زاڭدى دا. اۋىلدىقتار ءتۇسىرىپ جىبەرگەن بەينەجازباعا ءۇڭىلىپ كوردىك. سۋدىڭ لاستىعى جاعا ۇستاتارلىقتاي. قۇدىقتىڭ باسىن قاڭعىرلاتىپ، قاڭىلتىرمەن جاۋىپ قويىپتى. اۋىل ازاماتتارى ايىنا ەكى رەت بارىپ، بۇلاق كوزىن تازالاپ وتىرادى. قاراۋسىز قالسا، قوقىسقا تولىپ كەتەدى ەكەن. قوقىسى بىلاي تۇرسىن، سۋدىڭ ىشىندە قۇرت-قۇمىرسقا، تىشقانعا دەيىن جۇرەتىن سەكىلدى. امال قانشا، لايبۇلاقتىقتار وسى سۋدى ءىشىپ وتىر. سۋدىڭ ءدامى بار ما دەسەك، ء"سىز سۇراماڭىز، ءبىز ايتپايىق" دەپ قىسقا قايىردى.   

– ينتەرنەت تە جوق، كەيبىر جەردە عانا ۇستايدى. ول دا قاشىقتىقتان وقىپ جاتقان ستۋدەنتتەرگە قيىندىق تۋعىزىپ تۇر. سونىڭ سالدارىنان 15 شاقتى بالا كەتىپ قالدى، – دەسەدى اۋىل حالقى.

شەكارا شەبىندەگى اۋىلدار زامان اعىمىنان قالىس قالىپ، قاراپايىم قارا سۋعا جارىماي جاتقان سوڭ كوشپەي قايتسىن؟! كوشەدى. كوشكەن سوڭ شەكاراداعى اۋىلدار قاڭىراپ بوس قالدى دەپ بايبالام سالامىز. وندايدا اتام قازاق "جاۋ كەتكەن سوڭ قىلىشىڭدى تاسقا شاپ" دەيتىن. قالا ومىرىنە ءسىڭىپ كەتكەن حالىقتى قايتىپ اۋىلعا اپارۋ ەكى تالاي. سول ءۇشىن دە اۋىلداعى تۇرعىلىقتى حالىققا نەگە بۇگىن جاعداي جاساماسقا؟! 

شىر-پىر بولعان تۇرعىنداردىڭ ارىز-شاعىمىن ايتىپ، التىنشوقى اۋىلدىق وكرۋگىنىڭ اكىمىنە حابارلاستىق. التىنشوقى وكرۋگىنە، لايبۇلاقپەن قاتار ايتپاي، تەكەبۇلاق اۋىلدارى دا قارايدى. لايبۇلاق اۋىلىندا 398 ادام تۇرادى ەكەن.

– اۋىز سۋ ماسەلەسى بار. 368 ملن 456 مىڭ تەڭگەنىڭ جوبالىق-سمەتالىق قۇجاتى ەكسپەرتيزادان وتكەن. ەندى رەسپۋبليكالىق دەڭگەيدەگى ساراپتاما جاسالعان سوڭ ءۇرجار اۋدانىنىڭ كەشەندى جوسپارى بويىنشا، لايبۇلاق اۋىلى مەن بارقىتبەل اۋىلىنا ءبىرىنشى كەزەكتە سۋ تارتىلادى. ءبارى دۇرىس بولسا، جۇمىس 2021 جىلى اقپاندا باستالادى، – دەپ قۋانتتى وكرۋگ اكىمى ەركىن سايلاۋبەك ۇلى.

ال ينتەرنەت جەلىسىن تارتۋ جونىندە ءۇستى-ۇستىنە حات جازىلىپ جاتقانىمەن، ناتيجە جاقىن كۇندەرى بولا قويمايتىن سياقتى.

سوڭعى جاڭالىقتار

قيلى-قيلى تاعدىرلار

تاريح • كەشە

ءبىر شاڭىراقتان – ءۇش مايدانگەر

رۋحانيات • 08 مامىر، 2021

قازاق دەگەنىمىز – باۋىرجان...

رۋحانيات • 08 مامىر، 2021

505-ءشى تۇرمەنىڭ تۇتقىندارى

تاريح • 08 مامىر، 2021

اسكەري ينجەنەرلەر ۇستاحاناسى

وقيعا • 07 مامىر، 2021

ۇقساس جاڭالىقتار