كارانتيننىڭ قاتاڭ تالاپتارىن ساقتاي وتىرىپ وتكىزىلگەن شارا بارىسىندا 6 مەديتسينا قىزمەتكەرى مەن 8 ءتارتىپ ساقشىسى "حالىق العىسى" مەدالىمەن ماراپاتتالدى.
– بۇگىنگى تاڭدا جامان تۇماۋدىڭ ەكىنشى تولقىنىنا دايىندىق ىجداھاتتى جۇرگىزىلۋدە. باستى مىندەت ينفەكتسيانىڭ تارالۋىنا جول بەرمەي, الدىن الۋ. ناۋقاسقا شالدىققانداردى ەمدەۋ. وسى ورايدا, وڭىردە جاڭا زامانعى مەديتسينالىق نىساندار سالىنىپ, اۋرۋحانالاردىڭ ماتەريالدىق-تەحنيكالىق بازاسى نىعايتىلۋدا, – دەدى اكىم ءوز سوزىندە.
تاعى ءبىر ايتا قالارلىق جاعىمدى جاڭالىق – كوكشەتاۋدا كوروناۆيرۋسقا شالدىققان ناۋقاستار ەمدەلەتىن زاماناۋي ۇلگىدەگى جۇقپالى اۋرۋلار ورتالىعى اشىلدى. بۇل ورتالىق 200 كەرەۋەتكە شاقتالعان. وندا گەرمانيا مەن رەسەيدەن الىنعان جاڭا جابدىقتار ورناتىلعان. 8 كورپۋستان تۇراتىن نىساندا كولىكتەردى دەزينفەكتسيالاۋ پۋنكتى, مەديتسينالىق قالدىقتاردى زالالسىزداندىرۋ ورنى, جان ساقتاۋ بولىمشەسى, ورتالىقتاندىرىلعان وتتەگى ستانتسياسى, جىلۋ قازاندىعى بار. ءبىر ايتا كەتەرلىگى, قۇرىلىس جۇمىسى ءتورت ايدا اياقتالعان. جوبانىڭ قۇنى 7 ملرد 185 ملن تەڭگە. جالپى اۋماعى 4,4 گەكتاردى قۇرايتىن نىسان قۇرىلىسىنا 620 ادام تارتىلعان.
مەملەكەت باسشىسىنىڭ تاپسىرماسىنا وراي اشىلعان ءدال وسىنداي ورتالىق ەلىمىزدە نەكەن-ساياق. سونداي-اق, بۇگىن وبلىستىق كوپبەيىندى اۋرۋحانا ماگنيتتى-رەزونانستى توموگرافيا كابينەتى اشىلدى.
