سونداي-اق 30 قازانداعى جەر سىلكىنىسىنەن كەيىن جالپى سانى 1 713 افتەرشوك تىركەلگەن. ءزىلزالا سالدارىنان 114 ادام قازا بولىپ, 1 035 ادام جاراقات العان. ونىڭ 898-ءى مەديتسينالىق كومەك كورسەتىلگەن سوڭ ۇيىنە جىبەرىلگەن, 137-ءسى ەمدەلىپ جاتىر. يزميردەگى 17 عيماراتتىڭ 15-ىندە ىزدەۋ-قۇتقارۋ جۇمىستارى اياقتالدى. قۇتقارۋشىلار قالعان 2 عيماراتتا ىزدەۋ جۇمىستارىن جالعاستىرۋدا.
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ باسقارماسىنىڭ حابارلاۋىنشا, ءزىلزالا جەرگىلىكتى ۋاقىتپەن 14.51-دە تىركەلگەن. ءدۇمپۋ وشاعى ەگە تەڭىزىنىڭ جاعالاۋىندا, 16,5 شاقىرىم تەرەڭدىكتە ورنالاسقان كورىنەدى. 15 سەكۋندقا سوزىلعان جەر سىلكىنىسى يزمير قالاسىنان بولەك تۇركيانىڭ باتىسىنداعى كوپتەگەن اۋداندا سەزىلگەن.
دۇمپۋلەر گرەكيا قالالارىندا دا سەزىلگەن. كارلوۆاسيدەگى تەوتوكوس شىركەۋىنىڭ ءبىر بولىگى قيراعان. سونىمەن قاتار گرەكيانىڭ ساموس ارالىندا قاتتى جەر سىلكىنگەن.
بۇعان دەيىن گرەكيا مەن تۇركيا اراسىندا جەرورتا تەڭىزىنە بايلانىستى داۋ تۋعان بولاتىن. ەللادالار ەلىنىڭ پرەمەر-ءمينيسترى كيرياكوس ميتسوتاكيس تۋيتتەردەگى پاراقشاسىندا «ايىرماشىلىقتارىمىزعا قاراماستان, بۇگىن حالقىمىز اپاتپەن بىرگە كۇرەسەتىن ءسات كەلدى», دەپ جازدى.
تۇركيا پرەزيدەنتى رەجەپ تايپ ەردوعان دا تۋيتتەردەگى پاراقشاسىندا بارشا گرەك حالقىنىڭ قايعىسىمەن ورتاقتاسىپ, كەز كەلگەن قيىن ساتتە كومەكتەسۋگە ءازىر ەكەنىن جەتكىزدى. «كورشى ەلدەردىڭ قيىن كەزەڭدە كومەك قولىن سوزۋى ومىردەگى باسقا نارسەلەرگە قاراعاندا الدەقايدا قۇندى», دەپ جازدى ر.ەردوعان.
