اتالعان قۇجات ەلباسىنىڭ يدەيالارى مەن باستامالارىن ىلگەرىلەتۋدى, بىرلەسكەن مادەني-ءبىلىم بەرۋ, عىلىمي-ىزدەنىس جوبالاردى ىسكە اسىرۋدى كوزدەيدى. مەموراندۋم اياعىنداعى نەگىزگى سەرىكتەستىك زەرتتەۋ باعدارلامالارىن, عىلىمي-پراكتيكالىق ءىس-شارالاردى (كونفەرەنتسيا, فورۋم, سەمينار, تاعى باسقا) ۇيىمداستىرۋعا, اقپارات الماسۋعا نەگىزدەلگەن ەكەن.
قول قويىلعان قۇجاتتىڭ ماڭىزى جايلى ەلباسى كىتاپحاناسىنىڭ باسشىسى ءا.راحىمجانوۆ: «ىنتىماقتاستىق مەموراندۋمى تۇڭعىش پرەزيدەنتتىڭ جاھاندىق يدەيالارى مەن ىشكى جانە سىرتقى ساياسات باستامالارىنا اقپاراتتىق-يميدجدىك قولداۋ كورسەتۋگە, قازاقستاننىڭ دامۋىنا, جالپى الەمدىك قاۋىپسىزدىك جۇيەسىن قالىپتاستىرۋعا قوسقان ەلباسىنىڭ ۇلەسىن جان-جاقتى زەرتتەۋگە باعىتتالعان» دەسە, كەلەسى كەزەكتە ءوز ويىن بىلدىرگەن ءبىلىم جانە عىلىم ءمينيسترى اسحات ايماعامبەتوۆ: «ەلباسى كىتاپحاناسى مۋزەيىنىڭ جاڭا عيماراتىندا ەلىمىزدىڭ تاريحى تۇنىپ تۇر. ەلباسىنىڭ «رۋحاني جاڭعىرۋ» باعدارلاماسى اياسىندا بالالار سوڭعى تەحنولوگيالارمەن جابدىقتالعان مەكەمەدە قۇندى اقپاراتپەن ءبىلىمىن تەرەڭدەتە تۇسەرى انىق. بۇل باعىتتا ۇلكەن جۇمىس اتقارىلدى. جاۋاپتى ءىس جالعاسىن تابا بەرمەك. مۋزەيگە مەكتەپ, كوللەدج, جوعارى وقۋ ورىندارىنىڭ ءبىلىم الۋشىلارى كەلەتىن بولادى. دوڭگەلەك ۇستەل, سيمپوزيۋم, كونفەرەنتسيا سياقتى شارالار وتكىزىلەدى. جوسپارلانعان جۇمىس اۋقىمى ءۇمىتتى اقتايتىنىنا سەنەمىن», دەگەن پىكىرىن جەتكىزدى.
ءىس-شارا بارىسىندا «قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ الەمنىڭ جەتەكشى ۋنيۆەرسيتەتتەرىندە وقىعان دارىستەرى» كىتابىنىڭ باسىلىمدىق جانە ەلەكتروندى نۇسقالارىنىڭ تۇساۋى كەسىلدى. جوبانىڭ باس رەداكتورى – قازاقستان رەسپۋبليكاسى تۇڭعىش پرەزيدەنتى – ەلباسى كەڭسەسىنىڭ باسشىسى, ساياسي عىلىمداردىڭ دوكتورى, پروفەسسور ماحمۇت قاسىمبەكوۆ.
قاتىسۋشىلاردىڭ نازارىنا كىتاپتىڭ مازمۇنىن, ماقسات-مىندەتىن تانىستىراتىن بەينەروليك ۇسىنىلىپ, شارا اياسىندا الەمنىڭ جەتەكشى ۋنيۆەرسيتەتتەرىندە ەلباسىنىڭ ءسوز سويلەگەن ساتتەرى كورسەتىلدى.
