تالقىلاۋ 3 قاراشادا شىۇ-نىڭ ىسكەرلىك فورۋمىندا ءوتتى. ءىس-شارانى رەسەيدىڭ ساۋدا-ونەركاسىپ پالاتاسىنىڭ كومەگىمەن ەۋرازيالىق ەكونوميكالىق كوميسسيا ۇيىمداستىردى. سەسسيا بارىسىندا ەەك ينتەگراتسيا جانە ماكروەكونوميكا جونىندەگى القا مۇشەسى (مينيستر) سەرگەي گلازەۆ نەگىزگى ءسوز سويلەدى.
سەرگەي گلازەۆ شىۇ مەملەكەتارالىق ءوزارا ءىس-قيمىل جانە ەۋرازيا كەڭىستىگىندەگى ايماقتىق ينتەگراتسيا ارحيتەكتۋراسىنىڭ ماڭىزدى قۇرامداس بولىگى بولىپ تابىلاتىنىن جانە شىۇ-مەن ديالوگتى دامىتۋ ەۋرازيالىق ەكونوميكالىق ينتەگراتسيانى دامىتۋدىڭ 2025 جىلعا دەيىنگى ستراتەگيالىق باعىتتارىنىڭ جوباسىندا قاراستىرىلعانىن ايتتى.
"ەاەو مەن شىۇ-عا مۇشە ەلدەر ەۋرازيا كونتينەنتىنىڭ وزەگىن قۇرايدى جانە ولاردىڭ ءوزارا بايلانىسى كوبىنەسە ايماقتىڭ ودان ءارى دامۋىنىڭ ۆەكتورىن انىقتايدى", – دەپ اتاپ ءوتتى ەەك ءمينيسترى.
قازاقستان, قىرعىزستان جانە رەسەي ءبىر ۋاقىتتا ەاەو مەن شىۇ-عا مۇشە. بەلارۋسسيا شىۇ-دا باقىلاۋشى مەملەكەت مارتەبەسىنە يە ەكەنى, ال ارمەنيا - ديالوگ بويىنشا سەرىكتەس بولىپ وتىرعانى, ءبىزدىڭ ينتەگراتسيالىق بىرلەستىكتەرىمىزدىڭ ءوزارا بايلانىسىن قامتاماسىز ەتەتىنى س. گلازەۆتىڭ نازارىنان تىس قالمادى.
سەرگەي گلازەۆ كوميسسيانىڭ شىۇ-مەن قاتىناستاردى رەسىمدەۋ بويىنشا جۇرگىزىپ جاتقان جۇمىستارى تۋرالى, اتاپ ايتقاندا, ەەك پەن شىۇ حاتشىلىعى اراسىندا ءوزارا تۇسىنىستىك تۋرالى مەموراندۋم جاساسۋ جونىندەگى كەلىسسوزدەر پروتسەسىنىڭ اياقتالۋى تۋرالى حابارلادى.
"مەموراندۋم جوباسىنىڭ نەگىزى كولىك, تاسىمالداۋ, ينۆەستيتسيا, ساۋدا جانە كەدەندىك راسىمدەردى جەڭىلدەتۋ سياقتى سالالارعا باسا نازار اۋدارا وتىرىپ, ەكونوميكالىق ءوزارا ارەكەتتەسۋ بولىپ تابىلادى", - دەگەن ەەك ءمينيسترى تسيفرلىق ەكونوميكا, سونداي-اق تەحنيكالىق رەتتەۋ جانە SPS ماسەلەلەرى ەرەكشە ماڭىزدى بولۋى مۇمكىن ەكەنىنە توقتالدى.
ەاەو مەن شىۇ اراسىنداعى ىنتىماقتاستىقتىڭ پەرسپەكتيۆالارى تۋرالى اقپارات بەرە وتىرىپ, مينيستر ەكى قۇرىلىمدى دا بىرىكتىرۋ قاجەتتىلىگىن اتاپ ءوتتى جانە ۇلتتىق ۆاليۋتاداعى ءوزارا ساۋداداعى ەسەپ ايىرىسۋ ۇلەسىنىڭ ءوسۋىن باسىمدىقتار رەتىندە بەلگىلەدى. ەندى الداعى ۋاقىتتا ۇلتتىق ۆاليۋتاداعى ينۆەستيتسيالاردى جانە قارجى نارىقتارىن, سونىڭ ىشىندە قور بيرجالارىن ينتەگراتسيالاۋدى قولدايتىن ورتاق دامۋ ينستيتۋتتارىن قۇرۋعا باسىمدىق بەرىلمەك.
سەرگەي گلازەۆ سونداي-اق ۆاليۋتالىق رەتتەۋ جۇيەلەرىن ۇيلەستىرۋدىڭ, بانكتىك جۇيەلەردى ينتەگراتسيالاۋدىڭ, اقشا اينالىمى ءۇشىن بىرىڭعاي تسيفرلىق كەڭىستىكتى قۇرۋدىڭ, سونداي-اق ەۋرازيالىق قارجىلىق ارحيتەكتۋرانى قالىپتاستىرۋدىڭ ماڭىزدىلىعىن اتاپ ءوتتى.
سەسسياعا قاتىسۋشىلار ەاەو مەن شىۇ اراسىنداعى جان-جاقتى ىنتىماقتاستىقتى جانە ءوزارا تۇسىنىستىكتى دامىتۋ جولدارىن, ونىڭ ىشىندە ۇلكەن ەۋرازيالىق سەرىكتەستىك يدەياسىنىڭ شەڭبەرىندە ديالوگ قۇرۋ ارقىلى, سونداي-اق قىتايدىڭ "بەلدەۋ جانە جول" باستاماسىن ىسكە اسىرۋ اياسىندا ىزدەۋ قاجەتتىلىگىنە نازار اۋداردى.
ولار جەكەلەگەن مەملەكەتتەردىڭ پروتەكتسيونيستىك ساياساتىنىڭ ايماق ەلدەرى ەكونوميكاسىنىڭ دامۋىنا كەرى اسەرىن اتاپ ءوتتى, سونىمەن قاتار ەۋرازيا كونتينەنتىندە ءادىل ەكونوميكالىق قاتىناستاردىڭ قالىپتاسۋىن جاقتادى. كاسىپكەرلىك قاۋىمداستىقتاردىڭ وكىلدەرى بيزنەس-قاۋىمداستىقتىڭ ەاەو مەن شىۇ اراسىنداعى ديالوگتى دامىتۋعا, ونىڭ ىشىندە توسقاۋىلسىز ەكونوميكالىق ورتانى قالىپتاستىرۋ تۇرعىسىنان جوعارى سۇرانىسىنا نازار اۋداردى.
