تالاپ كۇشەيتىلۋى – زاڭدىلىق

ءماجىلىس توراعاسى ورال مۇحامەدجانوۆتىڭ جەتەكشىلىگىمەن وتكەن پالاتانىڭ سارسەنبى كۇنگى پلەنارلىق وتىرىسىندا قىزمەت مەرزىمدەرى اياقتالعان م.ا.سارسەمباەۆ پەن ۆ.ك.فووس ورتالىق سايلاۋ كوميسسياسى مۇشەلەگىنە قايتا سايلاندى. سونداي-اق دەپۋتاتتىققا تاعايىندالعان ق.ىدىرىسوۆ قارجى جانە بيۋدجەت كوميتەتىنىڭ قۇرامىنا سايلاندى. ادەتتەگى دەپۋتاتتىق ساۋالدار بۇل جولى ءبىر جارىم ساعاتقا سوزىلىپ كەتكەندىگىن ايتا كەتۋ كەرەك. ءتىپتى سپيكەردىڭ ءوزى ساۋال­دار­دىڭ قىسقا دا نۇسقا بولۋىن تالاپ ەتىپ وتىردى. بۇل جولى دا دەپۋ­تات­تار قىزىلاعاش اپاتىن اينالىپ ءوت­كەن جوق. قىرعىزستانداعى ساياسي جاعدايعا بايلانىستى دا اڭگىمە قوزعالدى. زاڭ جوبالارىنىڭ ىشىندە “قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى”  جانە سوعان جاپ­سار­لاس زاڭ جوبالارى دەپۋتاتتاردىڭ ەرەكشە قىزىعۋشىلىعىن تۋدىردى. كولىك جانە كوممۋنيكاتسيا مي­نيسترى ابىلعازى قۇسايىنوۆتىڭ اي­تۋ­ىنشا, يكاو تالاپتارىندا ەلدىڭ اۆياتسيا جونىندەگى زاڭناماسىنا  ازا­ماتتىق اۆياتسيا قىزمەتى مەن ونىڭ مەملەكەتتىك جۇيەسىن قالىپ­تاس­تىرۋ ءۇشىن مىقتى ىرگەتاس قالىپ­تاستىرىلۋى ءتيىس دەپ جازىلىپتى. ولاي بولسا, ەلىمىز يكاو-نىڭ 11 مىڭ ستاندارتىن قابىلداۋى جانە ۇلتتىق زاڭنامالارعا ەنگىزۋى ءتيىس ەكەن. قازىرگى تاڭدا اتالعان اۆياتسيا ۇيىمى قۇرامىندا 192 مەملەكەت بار. وسى ۇيىمنىڭ مۇشەسى بولىپ تابىلاتىن قازاقستاندا 611 اۋە كە­مەسى بولسا, سونىڭ 66-سى شەتەلدىك ونىمدەر ەكەن. جولاۋشىلار تاسى­ما­لىنىڭ 85 پايىزىن وسى اۋە كە­مە­لەرى جۇزەگە اسىراتىن كورىنەدى. مي­نيستر اۋە كومپانيالارىنا ءبىر­قاتار تالاپتاردىڭ كۇشەيتىلگەن­دىگى­مەن ءبولىستى. ماسەلەن, ەندى ۋاكىلەتتى ورگان كەلىسىم بەرمەي, قارۋ-جاراق پەن اسكەري تەحنيكا جانە وزگە دە ماڭىزدى جۇكتەر تاسۋعا رۇقسات ەتىل­مەيدى. سونىمەن ءبىر مەزگىلدە شاعىن اۆياتسياعا جول اشىلماق. اۋە كە­مە­سى­نىڭ ۇشا الاتىندىعى تۋرالى سەر­تي­فيكات پەن ۇشقىش كۋالىگى بولسا, كەز كەلگەن جەكە تۇلعا تومەن بيىك­تەر­دە سامعاي الادى. ول ءۇشىن ءوڭىر­لىك اەروكلۋبتار اشۋ كوزدەلىپ وتىر ەكەن. وسى رەتتە مينيستر دەپۋتات­تار­دىڭ كوپتەگەن سۇراقتارىنا دا جاۋاپ بەردى. ونىڭ مالىمەتىنە قارعاندا, قازىرگى كەزدە ەلىمىزدە 20 اۋەجاي بار كورىنەدى. سونىڭ تەك 5-ەۋى عانا جەكەگە تيەسىلى ەكەن. 2020 جىلعا قا­راي بارلىق اۋەجايلار حالىقارا­لىق تالاپتارعا ساي جاراقتان­دى­رى­لۋى ءتيىس. كادر ماسەلەسىندە وتكەن جىلدىڭ اقپان ايىندا ازاماتتىق اۆياتسيا كوميتەتىندە 35 ۇشقىش تىركەۋدە بولسا, قازىر ولاردىڭ سانى 51-گە جەتىپتى. ء“ار جىل سايىن اقش-تىڭ فلوريدا شتاتىندا ون­داعان قازاقستاندىق كۋرسانت وقى­تىلىپ جاتىر”, دەيدى مينيستر وسى ورايدا. ارنايى ينجەنەرلىك-تەح­نيكالىق قۇرامدى دايارلاۋ ماق­سا­تىندا قازاقستاندا ريگا اۆياتسيا ينستيتۋتىنىڭ فيليالىن اشۋ تۋ­را­لى كەلىسىمدەر جۇرگىزىلۋدە كورىنەدى. نەگىزىنەن كاسىپقوي ۇشقىشتار دايار­لاۋ استانا قالاسىندا جۇرگىزى­لىپ وتىرعانى دا دەپۋتاتتار نازارى­نا سالىندى. ءسويتىپ, ەكى زاڭدىق قۇجات تا دە­پۋتاتتار تاراپىنان قولداۋ تاۋىپ, ءبىرىنشى وقىلىمدا ماقۇلداندى. اسقار تۇراپباي ۇلى.