وقيعانىڭ ىزىنشە ۆەنا پوليتسياسىنىڭ Twitter-اككاۋنتىندا ارنايى وپەراتسيانىڭ جۇرگىزىلىپ جاتقانى تۋرالى حابارلاندى. قالا بيلىگىنىڭ حابارلاۋىنشا, قانقۇيلى شابۋىلدى بىرنەشە قاسكوي ۇيىمداستىرعان.
پوليتسيانىڭ مالىمەتىنە ساي, شابۋىل التى جەردە, سونىڭ ىشىندە قالا ورتالىعىنداعى سيناگوگادا, ەۆرەي ورتالىعى مەن مەيرامحانا جانىندا بولعان. قۇقىق قورعاۋ ورگاندارى ءبىر ادامنىڭ قايتىس بولعانىن, بىرنەشە ادامنىڭ اۋىر جاراقات العانىن, ونىڭ ىشىندە پوليتسيا قىزمەتكەرى بار ەكەنىن راستادى. بۇدان بولەك, 15 ادام جاراقات العان.
زارداپ شەككەندەردىڭ جاعدايى اۋىر بولعاندىقتان, قازا تاپقاندار تۋرالى مالىمەت ازىرگە ناقتى ەمەس. كەي بۇقارالىق اقپارات قۇرالدارى 7 ادام كوز جۇمدى دەسە, پوليتسيا قازىرگە 4 ادامنىڭ باقيعا اتتانعانىن راستادى.
بيلىك قالا تۇرعىندارىنان ۇيدەن شىقپاۋدى, تەرەزەگە جاقىنداماۋدى سۇرايدى جانە كۋاگەرلەرگە وقيعا ورنىنان ۆيدەو مەن سۋرەتتى الەۋمەتتىك جەلىگە تاراتپاۋعا شاقىردى. قالادا قوعامدىق كولىك توقتاتىلدى.
رەيتەر اگەنتتىگىنىڭ حابارلاۋىنشا, اۋستريا ىشكى ىستەر ءمينيسترى كارل نەحاممەر وقيعانى تەرروريستىك شابۋىل دەپ اتاعان. مينيستر تاعى دا شابۋىلدىڭ بولۋى مۇمكىن ەكەنىن ەسكەرتتى. ويتكەنى سودىرلاردىڭ كەيبىرى ءالى قولعا تۇسپەگەن.
اۋستريا كانتسلەرى سەباستيان كۋرتس پوليتسيا شابۋىل جاساۋشىلارعا قارسى باتىل ارەكەت ەتەتىنىن ايتتى. ء«بىز تەرروريزم ارقىلى قورقىتىپ-ۇركىتۋگە جول بەرمەيمىز جانە مۇنداي شابۋىلدارعا قارسى بار كۇش-جىگەرىمىزبەن كۇرەسەمىز», دەلىنگەن كانتسلەردىڭ مالىمدەمەسىندە.
الەۋمەتتىك جەلىلەردە ۆەناداعى شابۋىلدىڭ ءساتى دەگەن ۆيدەو تارادى. وندا ەر ادام كوشەدەگى تۇرعىندارعا مىلتىقتان وق جاۋدىرادى. ايتسە دە, ەلدەگى قۇقىق قورعاۋ قىزمەتى ۆيدەو دەرەكتەردى تەكسەرىپ جاتقاندىقتان, ونىڭ انىق-قانىعى تۋرالى مالىمەت بەرگەن جوق.
وقيعاعا بايلانىستى قازاقستان سىرتقى ىستەر مينيسترلىگى اقپارات بەرىپ, جارالانعاندار مەن قازا تاپقاندار ىشىندە قازاقستان ازاماتى جوق ەكەنىن مالىمدەدى.
«اۋستريالىق پوليتسيا تەرروريزمگە قارسى اۋقىمدى وپەراتسيا جۇرگىزىپ جاتىر. قازاقستاننىڭ اۋسترياداعى ەلشىلىگىنىڭ الدىن الا اقپاراتىنا سايكەس, قازا تاپقاندار مەن جارالانعاندار اراسىندا قازاقستان ازاماتتارى جوق», دەلىنگەن حابارلامادا.
