ءبىز ايتىپ وتىرعان بۋىننىڭ بەلدى وكىلى بولعان, قازاق كوسەمسوزىنىڭ قاجىرلى قارا نارىنداي قالام يەسى ماعاۋيا اعا سەمباي ەدى. جۋرناليستيكا سالاسىنا 43 جىل عۇمىرىن سىيلاپ, ونىڭ 22 جىلىندا وبلىستىق «Ortalyq Qazaqstan» گازەتىنىڭ باس رەداكتورى بولعان ءسوز ساردارى تۋرالى وتكەن شاقتا ءسوز باستاۋىمىز ارينە, وكىنىشتى... بىراق سوڭىنا وشپەس ءىز قالدىرعان, ىرگەتاسى ءىرى مەكتەپ قالاعان جان رەتىندە بۇل ەسىم وتە باقىتتى ونەگە يەسى دەر ەدىك. جۋرناليستيكاعا بوزبالا شاعىندا كەلىپ, سامايىن بوز قىراۋ شالعانشا وسى سالادان تابان اۋدارماعان تاۋداي ازامات جايلى كوپ ايتۋعا بولادى. اڭگىمەمىزدى امىربەكتىڭ كوپەنى بەرگەن باعادان باستاعىمىز كەلەدى. ساتيرا ساردارى كوپەن اعامىز: – ماعاشتىڭ بىرنەشە ەرلىگىن ايتۋعا بولادى, سونىڭ ىشىندەگى ەڭ ءبىر ەرەكشەسى – جاسى 16-عا تولماي جاتىپ, تۋ تۋرالى كۋالىكپەن جوعارعى وقۋ ورنىنا قابىلدانعانى-تۇعىن. قارىمدى دا دارىندى بولعان سوڭ عوي, شەراعاڭنىڭ شەكپەنىنەن شىنىعىپ شىققانداردىڭ ءبىرى بولدى. كەيىننەن ءوزى دە مەكتەپ قالىپتاستىردى. نە كەرەك, زامانىندا پاسپورتسىز وقۋعا تۇسكەن ماعاش, مىنە, بۇگىن قازاق جۋرناليستيكاسىنىڭ پاسپورتىنا اينالدى! – دەگەن ەدى.
جالپى قازاق جۋرناليستيكاسىنىڭ قابىرعالى بۋىنىن قالىپتاستىرىپ, قايراتكەر رەداكتور بولا بىلگەن ماعاۋيا سەمباي تۇلعاسى تۋرالى قالاي ايتساق تا جاراسادى.
البەتتە «Egemen»-نەن كەيىنگى ەكىنشى گازەت دەگەن بەيرەسمي اتاعى بار ايبىندى باسىلىمنىڭ باس رەداكتورى بولعان ماعاۋيا سلانبەك ۇلىنىڭ ازاماتتىق بولمىسىن ءبىر ماقالاعا سىيعىزۋعا كەلمەس. دەسەك تە شاراپاتىن كورگەن شىعارماشىل شاكىرتى رەتىندە گازەتىمىزدە بىرەر ءسوز ارناعاندى ءجون سانادىق. ونىڭ ار جاعىندا «Egemen»-دىك ەكەنىن ەسكەرسەك, بۇل باسىلىمعا ونىڭ ەسىمى ەرەكشە تانىس.
ماعاۋيا سەمباي تەك رەداكتور, «Ortalyq Qazaqstan» تەك رەداكتسيا ەمەس, بىرەۋى – ۇستاز, بىرەۋى – ۇستاحانا. شىنتۋايتىندا, تالانتتارعا تابالدىرىق, بالاعىندا ءبيتى بارلارعا باسپالداق بولعان وسى ەكى مەكتەپتەن ءتالىم العاندار تالاي ورتانى تاڭ قالدىرىپ ءجۇر قازىر. ءبىر شاكىرتى, مىقتى جۋرناليست قىزعالداق ايتجانوۆا: «بۇلاق كوزىن اشۋ – ماكەڭنىڭ ميسسياسى. بۇل كۇنى «ورتالىقتان» ساباق الىپ, سوڭىرا استاناعا ات باسىن بۇرعانداردىڭ ەڭبەك كىتاپشاسىنىڭ العاشقى پاراقتارىندا «ورتالىقتىڭ» ءمورى, ماكەڭنىڭ قولى تۇر!» دەپ جازعان ەدى. شاكىرتتىڭ شىن پەيىلى وسىنداي-اق بولسىن.
ماعاۋيا رەداكتور گازەتكە شىن بەرىلگەن جۋرناليست ەدى. ولە-ولگەنشە اۋزىنان دا, قولىنان دا «ورتالىعى» تۇسكەن جوق. بىردە رەداكتسياداعى قويمانىڭ ىشىنەن «ورتالىق قازاقستان» دەگەن جازۋ تەرىس باسىلعان ساپ-سارى لاتۋن كليشەنى تاۋىپ الدى. الگى جادىگەرگە قاراپ ۇزاق تۇردى. قولىنا الىپ سالماقتاپ كوردى. بەتىن ۇلكەن قولدارىمەن قايتا-قايتا سيپاپ, شاڭىن سۇرتكەندەي بولدى. كوزىنە جاس العانىن بايقاتقىسى كەلمەي الدەبىر ۋاقىتتا بىزگە قاراپ: – بۇل فيرما, – دەدى. سەندەرگە جالعىز ءوتىنىش, مەن رەداكتورلىقتان كەتكەنشە وسى فيرمانى اۋىستىرماڭدار. بۇل اتاۋدى مەن ءوز اتىمنان الدەقايدا بيىك قويامىن. قاراشى, شاڭ باسىپ قالىپتى, – دەپ ءسوزىن باسقا اڭگىمەگە بۇرىپ جىبەردى.
كەيىن سول كليشەنى ءوزىنىڭ الپىس جاسقا تولعان مەرەيتويىندا ساحناعا الىپ شىقتى. سول كليشەنى ۇستاپ تۇرىپ ءسوز سويلەدى. مىنە, گازەتكە ادالدىقتى ونىڭ وسىنداي ءار ءىس-ارەكەتىنەن بايقاۋشى ەدىك. ادامدى بوزىنە قاراپ باعالاماي, سوزىنە قاراپ سالماقتاۋدى ۇنەمى باسشىلىققا العان باس رەداكتور رەتىندە ماعاۋيا سەمبايدى ءبارى «ماعاش اعا» دەپ جاقسى كوردى.
ادامنىڭ مىنەز-قۇلقىن جازۋىنان جازباي تانيتىندار بار. قولتاڭباسى ءىرى كىسى جومارت, قولى اشىق, اقكوڭىل, ءمارت كەلەدى ەكەن. ماعاۋيا سەمبايدىڭ جازۋى قانداي ءىرى بولسا, ءوزى دە كەسەك سويلەيتىن ازامات-تۇعىن. بويى دا, سويى دا كوپ ادامنان الدەقايدا جوعارى ءجۇردى. تۇيەنىڭ ۇلكەنى كوپىردەن تاياق جەيدى دەمەكشى, سول ىرىلىگى ءۇشىن كوپ جەردەن قۇقاي دا كوردى. اكىمدىكتەن الدەنەشە رەت ادەبيەتتىڭ اڭگىمەسى ءۇشىن سوگىس الدى. سونداعى تاعىلعان بار ايىپ مىناۋ: كلاسسيك مۇحتار ماعاۋيننىڭ «شىڭعىس حانىن» باسقانى ءۇشىن باس رەداكتورلىعىنا بالە جابىلىپتى. الايدا ءبىز ايتقانداي ىرىلىگى ىسىنەن كورىنىپ تۇراتىن «ماعاۋينشىل» ماعاۋيانى بۇل قۋدالاۋ قايتا قايراي ءتۇستى. تاعى ءبىر ىرىلىگى توقتار كوكەسىن قۇشاقتاعان كەزدە كورىنەتىن. مىنە, ءوزى تۇلعالى ازاماتتى وسىنداي ەكى الىپ قورعاپ تۇرعاندا ونىڭ ۇساقتالۋعا ەش حاقىسى جوقتاي.
تۇيە دەمەكشى, ماعاۋيا سەمبايمەن تۇيە تاقىرىبىندا ءسوز تالاستىرىپ كەرەگى جوق. ءتورت تۇلىكتىڭ ىشىندەگى تۇيە تۋرالى ءبىلىمى ۇشان-تەڭىز. كەيدە بالا سياقتى, ۇيدەگى جەڭگەمىزگە تەك تۇيەجۇن كيىم عانا الدىرتادى. باس كيىمى, كەۋدەشەسى, ش ۇلىعىنا شەيىن تۇيەنىڭ جۇنىنەن باسىلعان.
جۇمىسىمىز اۋىسىپ ەلورداعا اتتاناردا جولداسىمىز ەكەۋمىز ۇيىنە سوقتىق. باتاسىن بەرىپ, قولىما ۇلكەن سومكە ۇستاتتى. سويتسەم الگى زات تۇيە ءجۇن كورپە. – استانانىڭ قىسى سۋىق بولادى, جاۋراماي ءجۇر, – دەپ ارقامنان قاقتى. جاۋراماساق تا ماعاش اعا دۇنيەدەن ءوتتى دەگەندە كوزىمىز جاساۋراپ, جانىمىز قۇلازىپ قالعانى راس.
ماعاۋيا سەمباي ناعىز رەداكتور ەدى. ول جۇمىس بارىسىندا ءبىزدىڭ تەك ماقالامىزعا عانا رەداكتور ەمەس ەدى. ول ءتىپتى قولاستىنداعى جۋرناليستەردەن بولەك تەگىس اينالاسىنا رەداكتور بولاتىن. گازەت بەتىندەگى قاتەنى قالاي تەز كورسە, قوعامداعى كۇردەلى ماسەلەلەردى دە سولاي بىردەن اڭعاراتىن. كورىپ قانا قويماي ءتۇيىننىڭ تارقاتىلۋىنا جانىن سالاتىن. ول قوعام كەلبەتىنە, ادام بويىنداعى ءتۇرلى قاسيەتتەرگە رەداكتور ەدى. كەي ادامدار رەداكتورلىقتان كەتكەننەن كەيىن سول مانساپپەن بىرگە مىنەزىندەگى رەداكتورلىقتى ۇمىتا باستايدى. ال ماعاۋيا سەمباي مىنەزىندەگى رەداكتورلىق ونىڭ ەسىمىمەن بىتە قايناسىپ كەتكەندەي قاسيەت.
جالپى, ماعاۋيا سەمباي قالىپتاستىرعان مىقتى مەكتەپ تۋرالى جوعارىدا ايتىپ كەتتىك. سول ۇستاحانانىڭ ۇل-قىزدارى ۇستاز ەسىمىن ەشقاشان ۇمىتپاق ەمەس. جۋىردا ىزەتتى ءىزباسارلارىنىڭ قۇراستىرۋىمەن رەداكتور ماعاۋيا سلانبەك ۇلىنىڭ قالامىنان تۋىپ, قالتارىستا قالا بەرگەن ءبىر توپ اڭگىمەسى مەن تۇعىرلى تۇلعا تۋرالى تولعامدار قوس كىتاپ بولىپ جارىق كوردى. ودان بۇرىن جۋرناليستەر اراسىندا قازاقستاننىڭ ەڭبەك سىڭىرگەن قايراتكەرى, پرەزيدەنت سىيلىعىنىڭ لاۋرەاتى ماعاۋيا سەمباي اتىنداعى «قولىما قالام الدىم ايتامىن دەپ» بايقاۋى ۇيىمداستىرىلدى.
ۇستاز ۇلاعاتى قاي كەزدە دە ونىڭ سوڭىنداعى سۇبەلى ءسوزى مەن ادال شاكىرتتەرىمەن ولشەنەدى. جوعارىداعى جيناقتار وسى ءسوزىمىزدىڭ ايعاعى ىسپەتتى.
