اتالمىش شارا اقمولا وبلىسىندا جەرگىلىكتى اتقارۋشى ورگاندارداعى ونوماستيكا بولىمدەرىنىڭ جۇمىسىن كۇشەيتۋ, سالا ماماندارىنىڭ اتاۋ بەرۋ جانە قايتا اتاۋ جۇمىستارىن جەتىلدىرۋ جانە دامىتۋعا ىنتالاندىرۋ, جەرگىلىكتى تۇرعىندار اراسىندا ءتۇسىندىرۋ جۇمىستارىنىڭ ساپاسىن ارتتىرۋ جانە كۇشەيتۋ ماقساتىندا ۇيىمداستىرىلدى.
بايقاۋعا اۋداندار جانە كوكشەتاۋ, ستەپنوگور قالالارىنىڭ مادەنيەت جانە تىلدەردى دامىتۋ بولىمدەرىنىڭ باسشىلارى, تىلدەردى دامىتۋ ماسەلەسىنە جاۋاپتى ماماندار, اۋىلدىق وكرۋگتەردىڭ ماماندارى قاتىستى.
قاتىسۋشىلار 2015-2020 جىلدار ارالىعىندا ونوماستيكا سالاسىندا اتقارىلعان جۇمىستار (جالپى اۋدانداعى اتاۋلار, قايتا اتالعانى, اتاۋ بەرىلگەنى, يدەولوگيالىق تۇرعىدان ەسكىرگەن اتاۋلار, ت.س.س), ءتۇسىندىرۋ جۇمىستارى, تاريحي اتاۋلاردى انىقتاۋ جۇمىستارى قامتىلعان, تولىق تالداۋ جۇرگىزىلگەن 7 مينۋتتىق سلايد دايىندادى. «قازاقستان رەسپۋبليكاسىنداعى تىلدەر تۋرالى» زاڭىنان, ونوماستيكا سالاسىن رەتتەيتىن نورماتيۆتىك قۇقىقتىق اكتىلەردەن, «قازاقستان رەسپۋبليكاسىنداعى ءتىل ساياساتىن ىسكە اسىرۋدىڭ 2020-2025 جىلدارعا ارنالعان مەملەكەتتىك باعدارلاماسىنان» قويىلعان سۇراقتارعا جاۋاپ بەردى.
«بۇل بايقاۋ بيىل العاش رەت وتكىزىلىپ وتىر. دايىندالعان سلايدتار وبلىسىمىزداعى ونوماستيكانىڭ جاي-كۇيىنەن حابار بەرەدى. جەرگىلىكتى ماماندار دا وزدەرىنىڭ بىلىمدەرىن سىنادى. بايقاۋ بارلىعىمىز ءۇشىن وتە پايدالى بولدى», – دەدى قازىلار القاسىنىڭ توراعاسى, وبلىستىق ونوماستيكا كوميسسياسىنىڭ مۇشەسى, وبلىستىق تاريحي-ولكەتانۋ مۋزەيىنىڭ ديرەكتورى ق.شاقشاقوۆ.
بايقاۋعا ۇسىنىلعان ماتەريالدارمەن تانىسىپ, قاتىسۋشىلاردىڭ سلايدتارى مەن جاۋاپتارىن تالداي كەلە, قازىلار القاسى كوكشەتاۋ قالاسى مادەنيەت جانە تىلدەردى دامىتۋ ءبولىمىنىڭ باس مامانى دينا بەيسەمبەكوۆاعا ءى ورىندى, اقكول اۋدانى مادەنيەت جانە تىلدەردى دامىتۋ ءبولىمىنىڭ باسشىسى ايگەرىم تۇمەنباەۆا مەن تسەلينوگراد اۋدانىنىڭ مامانى اقبوتا امانگەلديەۆاعا ءىى ورىندى بەردى.
ال بۋراباي, ەرەيمەنتاۋ اۋداندارى مادەنيەت جانە تىلدەردى دامىتۋ بولىمدەرىنىڭ ماماندارى دينارا حامزينا مەن اياۋلىم بالتابايقىزى قاناپيانوۆاعا ءىىى ورىندى بەرۋ تۋرالى, ءبىرجان سال, زەرەندى, جارقايىڭ اۋداندارىنىڭ ماماندارىن ىنتالاندىرۋ سىيلىقتارىمەن ماراپاتتاۋ تۋرالى شەشىم قابىلدادى. سونداي-اق بايقاۋعا قاتىسۋشىلارعا العىس حاتتار مەن باعالى سىيلىقتار تابىستالدى.
