بۇگىندە 24 جاستاعى كيمال نوسكوۆ حيرۋرگيا بولىمىندە ەم-دوم قابىلداپ جاتىر. دارىگەرلەردىڭ مالىمەتىنشە, ناۋقاستىڭ پەرىشتەسى قاعىپ, امان قالعان. ويتكەنى كيمال جاراقات سالدارىنان مۇگەدەك بولىپ قالۋى ابدەن مۇمكىن ەدى.
وپەراتسيا بارىسىندا دارىگەرلەر ناۋقاستىڭ سول بۇيرەگىن, كوكباۋىرىن, اش ىشەكتىڭ جارتىسىن الىپ تاستاعان. اتىس كەزىندە وق ونىڭ وكپەسىنە, ديافراگماسىنا جانە توق ىشەگىنە تيگەن.
"ناۋقاستىڭ جاعدايى ورتاشا اۋىر. ول ءوز كۇشىمەن تۇرىپ, جۇرە الادى. ونىڭ جولى بولدى", دەيدى وبلىستىق كوپبەيىندى اۋرۋحانانىڭ حيرۋرگيا ءبولىمىنىڭ مەڭگەرۋشىسى ەربول ەسەەۆ.
جانارماي قۇيۋ ستانساسىنىڭ جانىندا بولعان اتىستان زارداپ شەككەن جىگىت "جاس داۋرەن" بالالار ءۇيىنىڭ تاربيەلەنۋشىسى ەكەن. كيمال نوسكوۆ "شاڭىراق" جاسوسپىرىمدەر ۇيىندە تۇرعان. كەيىن ول ەلورداداعى ليتسەيگە اۋىسىپ, سلەسار ماماندىعى بويىنشا ءبىلىم العان. ول سپورتپەن شۇعىلدانعاندى جاقسى كورەدى.
بەلگىلى بولعانداي, مەكتەپ ديرەكتورى جانجال قىزعا بايلانىستى تۋىنداۋى مۇمكىن ەكەنىن ايتادى.
"كيمال جامان جىگىت ەمەس. ول رەسەيگە بارىپ, جۇمىس ىستەپ كەلدى. كەيىن ورالعا قايتا ورالدى. جالدامالى جۇمىسشى بولىپ ەڭبەكتەندى. بالالاردىڭ ەشقايسى شابۋىل جاساعان جىگىتتەردى بىلمەيدى. ولارمەن كيمال بىرگە وقىعان. اۋرۋحاناداعى كيمالعا ونىڭ اپكەسى كۇتىم جاساپ ءجۇر. ولارعا كومەك كەرەك", دەيدى "شاڭىراق" جاسوسپىرىمدەر ءۇيىنىڭ ديرەكتورى ءومىرباي قالىمبەتوۆ.
ەستەرىڭىزگە سالا كەتەيىك, 20 قازاندا ورال قالاسىندا شولوحوۆ كوشەسىندەگى Venوil جانارماي قۇيۋ ستانتسياسىندا اتىس بولعان. سالدارىنان 24 جاستاعى ەر ادام جاراقات العان. اتىس بولعان ءسات ۆيدەورەگيستراتورعا ءتۇسىپ قالعان.
