اتاقتى ءنىل وزەنى سۋدان, مىسىر جانە ەفيوپيانى باسىپ وتەدى. عاسىرلار بويى ءۇش ەل ءنىلدىڭ سۋىن ءتيىمدى بولىسە الماي الەك. 2015 جىلى مامىلەگە كەلىپ, ۇلكەن بوگەت سالۋعا كەلىسكەن. بىراق ءتۇرلى تۇسىنىسپەۋشىلىككە بايلانىستى ونىڭ قۇرىلىسى توقتاپ قالعان. الدا-جالدا بوگەت تولىقتاي سالىنسا, 15 جىل ىشىندە تولىپ, مىسىردى, ەفيوپيانى, سۋداندى سۋمەن قامتاماسىز ەتپەك.
وسىعان بايلانىستى وتكىزىلەتىن كەلىسسوزگە اتالعان ءۇش مەملەكەتتىڭ سىرتقى ىستەر جانە اۋىلشارۋاشىلىق مينيسترلەرى قاتىسادى. بۇل ءىس-شارا كوروناۆيرۋس پاندەمياسىنا بايلانىستى بەينەكونفەرەنتسيا تۇرىندە وتپەك.
سۋدان اۋىلشارۋاشىلىق ءمينيسترى قۇنى 4,6 ميلليارد دوللاردى قۇرايتىن بوگەتىن جالعاستىرۋ تۋرالى كەلىسسوزگە قول جەتكىزۋ ءۇشىن 3 اي كۇتۋگە تۋرا كەلگەنىن جەتكىزدى.
وسى دامباعا قاتىستى پىكىر بىلدىرگەن اقش پرەزيدەنتى دونالد ترامپ ونىڭ قۇرىلىسى افريكا ايماعىندا جاڭا سوعىس ءورتىن تۇتاتۋى مۇمكىن دەپ مالىمدەگەن ەدى. اقۇي باسشىسىنىڭ پايىمداۋىنشا, بوگەت مىسىرعا باراتىن سۋ كولەمىن ازايتىپ جىبەرەدى. سوندىقتان ەگيپەت تاراپى بۇعان كونە قويۋى ەكىتالاي.
الايدا د.ترامپتىڭ بۇل مالىمدەمەسى ەفيوپياعا ۇناعان جوق. وسى ەلدىڭ سىرتقى ىستەر ءمينيسترى اقش ەلشىسىن شاقىرىپ الىپ, اقۇي باسشىسىنىڭ سوزىنە تۇسىنىكتەمە بەرۋدى تالاپ ەتكەن. سونداي-اق بوگەت قۇرىلىسى ەمەس, وسىنداي مالىمدەمە ەكى ەل اراسىنا وت سالاتىنىن جەتكىزگەن.
ايتقانداي, ەگيپەت اۋىل شارۋاشىلىعىنىڭ 97 پايىزى وسى ءنىل وزەنىنەن تىرشىلىك ءنارىن الادى. الدا-جالدا ونىڭ سۋى ازايىپ كەتسە, مىسىر حالقى قيىندىققا تاپ كەلەتىنىن بولجاۋ قيىن ەمەس.
جالپى, سۋعا تالاس ماسەلەسى الەمدە كۇيىپ تۇر. بۇگىندە الەم تۇششى سۋدى نەگىزىنەن 410 باسسەيننەن پايدالانادى. سولاردىڭ 90-عا جۋىعى قاۋىپتى دەڭگەيدە تۇر. ياعني جىل سايىن تۇتىنىلاتىن سۋ كولەمى ءتيىستى مەجەدەن 40 پايىزعا ارتىق. قاۋىپتى دەڭگەيدەگى وزەن باسسەيندەرىنىڭ جارتىسىنان استامى ءۇش ەلدە – قىتاي, ءۇندىستان جانە اقش اۋماعىندا جاتىر.
الەمدە ترانسشەكارالىق وزەندەر تۋرالى 290-عا جۋىق قۇجات بار. ولاردىڭ باسىم بولىگى تۇيتكىلدەردى شەشۋگە كومەكتەسسە دە, ءالى كۇنگە باسى اشىلماعان ماسەلە جەتەرلىك. مىسالى, 2019 جىلى عانا الەمدە وزەندەردى قولدانۋعا بايلانىستى 50-گە جۋىق ءتۇرلى دەڭگەيدەگى كيكىلجىڭ تۋىنداپتى. سوندىقتان سۋ ساياساتى بۇرىنعىدان دا وزەكتى.
