پرەزيدەنت • 28 قازان، 2020

مەملەكەت باسشىسى رۋستام ءجۇرسىنوۆتى قابىلدادى

60 رەت كورسەتىلدى

مەملەكەت باسشىسى قاسىم-جومارت توقاەۆ كاسىپكەرلەر قۇقىن قورعاۋ جونىندەگى ۋاكىل رۋستام ءجۇرسىنوۆتى قابىلدادى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

قاسىم-جومارت توقاەۆقا  كاسىپكەرلەر قۇقىن قورعاۋ ماسەلەسى بويىنشا اتقارىلعان جۇمىستار مەن وتاندىق بيزنەستى قولداۋعا قاتىستى جوسپار جايىندا باياندالدى.

رۋستام ءجۇرسىنوۆ قازاقستان پرەزيدەنتىنە سوڭعى 4 جىل ىشىندە 25 مىڭ ءوتىنىش قارالىپ، ونىڭ 43 پايىزى وڭ شەشىلگەنىن، كاسىپكەرلەردىڭ 197 ميلليارد تەڭگە كولەمىندەگى م ۇلىكتىك قۇقىقتارى قورعالعانىن ايتتى. بيزنەس-ومبۋدسمەننىڭ ايتۋىنشا، سانيتارلىق تالاپتاردى ساقتاۋ جونىندە ءتارتىپ ازىرلەندى، كاسىپكەرلەردىڭ، ولاردىڭ جۇمىسشىلارى مەن تۇتىنۋشىلارىنىڭ اراسىنداعى جاۋاپكەرشىلىگى ايقىندالدى.

مەملەكەت باسشىسىنا كوروناۆيرۋس پاندەمياسىنىڭ وتاندىق بيزنەسكە تيگىزگەن سالدارى جانە كاسىپكەرلەرگە قولداۋ كورسەتۋ جونىندەگى ۇسىنىستار تۋرالى اقپارات بەرىلدى. ناقتى ايتقاندا، ەڭبەكاقى تولەۋ قورى، جەر قاتىناستارى، سالىق ماسەلەلەرى جان-جاقتى ايتىلدى.

قاسىم-جومارت توقاەۆ جەر قاتىناستارى مەن ەڭبەكاقى تولەۋ قورىنا سالماق تۇسىرمەيتىن جاڭا رەتتەۋ ساياساتى جونىندەگى وزگەرىستەردى ءتيىستى مەملەكەتتىك ورگاندار مۇقيات زەرتتەۋى قاجەت ەكەنىن اتاپ ءوتتى. پرەزيدەنت ء"بىر كوزدەن ساتىپ الۋ" پورتالىنىڭ تيىمدىلىگى مەن اشىقتىعىنا ءجىتى ءمان بەرۋ كەرەك دەپ سانايدى.

قاسىم-جومارت توقاەۆ رۋستام جۇرسىنوۆكە بيزنەسكە قاتىستى اكىمشىلىك قۇقىق بۇزۋشىلىقتاردىڭ ارتۋ سەبەپتەرىن انىقتاۋعا، باقىلاۋ-قاداعالاۋ قىزمەتىن رەفورمالاۋدى ازىرلەۋگە باعىتتالعان بىرقاتار تاپسىرما بەردى.

سوڭعى جاڭالىقتار

ۇقساس جاڭالىقتار