قوعام • 28 قازان، 2020

الماتىدا وتكەن تاۋلىكتە 32 قىلمىس اشىلدى

883 رەت كورسەتىلدى

“قۇقىقتىق ءتارتىپ” جەدەل-الدىن الۋ ءىس-شاراسى بارىسىندا وتكەن تاۋلىكتە الماتى قالاسىندا 32 قىلمىس ءىزىن سۋىتپاي اشىلدى، – دەپ حابارلايدى Egemen.kz Polisia.kz سايتىنا سىلتەمە جاساپ.

“قۇقىقتىق ءتارتىپ” جەدەل-الدىن الۋ ءىس-شاراسى 26 قازان -1 قاراشا ارالىعىندا وتكىزىلەدى.

ء"ىس-شارانىڭ ماقساتى – قالاداعى جەدەل جاعدايدى جاقسارتۋ، قوعامدىق ءتارتىپتى، جول قاۋىپسىزدىگىن قامتاماسىز ەتۋ، سونداي-اق، قىلمىستاردىڭ الدىن الۋ مەن جولىن كەسۋ بولىپ تابىلادى. جەكە قۇرام قىزمەتتىڭ كۇشەيتىلگەن تۇرىنە كوشىرىلدى. جاياۋ جانە اۆتوكولىك پاترۋلدەرىنىڭ باعىتتارى تىعىزدالدى. ناتيجەسىندە وتكەن تاۋلىكتە 32 قىلمىس ءىزىن سۋىتپاي اشىلدى. ونىڭ ىشىندە سەگىز ۇرلىق، ءتورت الاياقتىق، ءبىر وزبىرلىق جانە ت.ب. بار. سونىمەن قاتار ەسىرتكىنى زاڭسىز ساقتاۋدىڭ ءتورت فاكتىسىنىڭ، اتىس قارۋىن زاڭسىز ساقتاۋدىڭ بەس فاكتىسىنىڭ، وق-ءدارىنى زاڭسىز ساقتاۋدىڭ سەگىز فاكتىسىنىڭ، سۋىق قارۋدى زاڭسىز الىپ ءجۇرۋدىڭ جانە ساقتاۋدىڭ جيىرما ءبىر فاكتىسىنىڭ جولى كەسىلدى. بۇدان باسقا كەزەكشى تاۋلىكتە بۇرىن جاسالعان بەس توناۋ، بەس ۇرلىق، ءتورت الاياقتىق، ءبىر بوپسالاۋ مەن ءبىر زورلاۋ قىلمىسى اشىلدى. ىزدەۋدە جۇرگەن بەس ادام ۇستالدى"، – دەدى الماتى قالاسىنىڭ پوليتسيا دەپارتامەنتى باستىعىنىڭ ءبىرىنشى ورىنباسارى نۇرلان الماسبەكوۆ.

بۇدان باسقا وتكەن تاۋلىك ىشىندە 982 ادام اكىمشىلىك جاۋاپكەرشىلىككە تارتىلعان. بالالارىن تاربيەلەۋ جونىندەگى مىندەتتەرىن ورىنداماعانى ءۇشىن 6 ادامعا، الكوگولدىك ىشىمدىكتەر ساتقانى ءۇشىن 3 ادامعا، ۇساق بۇزاقىلىعى ءۇشىن 145 ادامعا، قوعامدىق ورىنداردا الكوگولدىك ىشىمدىكتەر ىشكەنى ءۇشىن 168 ادامعا، تىنىشتىقتى بۇزعانى ءۇشىن 101 ادامعا، تۇنگى ۋاقىتتا كامەلەتكە تولماعانداردىڭ تۇرعىن جايدان تىس جۇرگەنى ءۇشىن 42 ادامعا، تىركەۋسىز نەمەسە جەكە باسىن كۋالاندىراتىن قۇجاتتارسىز تۇرعانى ءۇشىن 249 ادامعا قاتىستى اكىمشىلىك حاتتاما تولتىرىلدى. سونداي-اق الماتى قالاسىنىڭ پد قابىلداۋ-تاراتۋ ورتالىعىنا 16 ادام ورنالاستىرىلدى.

سوڭعى جاڭالىقتار

ۇقساس جاڭالىقتار