سەرگەي گلازەۆ اتاپ كورسەتكەندەي, ەاەو-دا ۇلتتىق ۆاليۋتالاردا ءوزارا ەسەپتەسۋگە كوشۋ جۇمىسى جۇرگىزىلۋدە. بىراق ولاردىڭ ۇلەسى بۇرىنعىسىنشا تىم قاراپايىم. ماسەلەن, وداق ىشىندە شامامەن 50% جانە قىتايمەن ەسەپتەسۋدە شامامەن 15%-دى قۇراپ وتىر.
"رەسەيدە جانە قىتايدا ءوز تولەم جۇيەلەرى, بانكتەر اراسىندا اقپارات الماسۋدىڭ ەلەكتروندىق جۇيەسى قۇرىلعان, بىراق شارۋاشىلىق قىزمەتىنىڭ قاتىسۋشىلارى ازىرگە ينفراقۇرىلىمنىڭ بۇل ەلەمەنتتەرىن وتە باياۋ پايدالانۋدا جانە بۇرىنعىسىنشا بوتەن ۆاليۋتالاردا جۇمىس ىستەيدى. جاعداياتتى تۇبەگەيلى وزگەرتۋىمىز, وزىمىزدىڭ ەۋرازيالىق ۆاليۋتا-قارجى جۇيەسىن قۇرۋىمىز كەرەك دەپ سانايمىن. ول ءبىزدى تاۋەكەلدەردەن ساقتاندىراتىن ءارى سەنىمدى, اشىق, قولايلى, ءتيىمدى جانە شارۋاشىلىق جۇرگىزۋشىلەر ءۇشىن سالماق سالمايتىن جۇيە بولار ەدى", دەپ اتاپ ءوتتى سەرگەي گلازەۆ.
ول بۇل ناتيجەگە قالاي كەلۋ جونىندەگى ءوز ۇسىنىستارىن دا ەستىرتتى. ونىڭ پىكىرىنشە, بارىنەن بۇرىن, ۇلتتىق ۆاليۋتالاردىڭ باعامىن تۇراقتاندىرعان ماڭىزدى. "ەاەو مەملەكەتتەرى اراسىندا ۆاليۋتا باعامدارىن تۇراقتاندىرۋدى قامتاماسىز ەتۋ جونىندەگى كەلىسىمگە قول قويۋ, ەۋروپالىق وداق ەلدەرىندە جۇمىس ىستەگەن سول "ۆاليۋتالىق جىلاندى" قۇرۋ قاجەتتىگى ءپىسىپ-جەتىلدى", دەدى سەرگەي گلازەۆ.
ەكىنشى باعىت – ەۋرازيالىق بيرجالاردى جانە باعا بەلگىلەۋ مەحانيزمدەرىن قالىپتاستىرۋ. بۇل باعىت وداق مەملەكەتتەرىنىڭ باسشىلارى تۇتاستاي ماقۇلداعان ەۋرازيالىق ەكونوميكالىق ينتەگراتسيانى دامىتۋدىڭ 2025 جىلعا دەيىنگى ستراتەگيالىق باعىتتارىنىڭ جوباسىندا كوزدەلگەن.
ءۇشىنشى باعىت – ۇلتتىق ۆاليۋتالاردا ەسەپتەسۋ ءۇشىن ارتىقشىلىقتار بەرۋ. سەرگەي گلازەۆتىڭ پىكىرىنشە, تمد-نىڭ مەملەكەتارالىق بانكى كوممەرتسيالىق بانكتەرگە قاراعاندا نەعۇرلىم تومەن تاريفتەرمەن كونۆەرسيالىق وپەراتسيالاردى قامتاماسىز ەتۋدە ماڭىزدى ءرول اتقارا الار ەدى.
بۇدان باسقا, سەرگەي گلازەۆ ۇلتتىق ۆاليۋتالارداعى ەسەپتەسۋلەرگە ۆاليۋتالىق باقىلاۋدى قولدانباۋدى جانە ءوزارا ساۋدا مەن بىرلەسكەن ينۆەستيتسيالارعا كرەديت بەرۋ جانە قارجىلاندىرۋ ماسەلەلەرىن قاراۋدى ۇسىندى.
