گۇلشات احمەتقىزى – ورتا مەكتەپتى تامامداعان سوڭ 1950 جىلى قازاق مەملەكەتتىك ۋنيۆەرسيتەتىندە وقۋىن جالعاستىرىپ, ءارى مىلتىق اتۋ سپورتىمەن اينالىسادى. 1952 جىلى قازاقستان قۇراما كومانداسى ساپىنا قابىلدانىپ, العاش رەت ۋكراينانىڭ لۆوۆ قالاسىندا وتكەن وداق بىرىنشىلىگىنە قاتىستى. كەلەسى, ياعني 1953 جىلى وتكەن تاعى ءبىر رەسمي جارىستا كىشى كاليبرلى ۆينتوۆكامەن «مۆ – ب» جاتتىعۋىن ورىنداۋ بارىسىندا گۇلشات اپامىز الۋعا ءتيىس 600 مۇمكىندىكتەن 549 ۇپاي جيناپ, كسرو سپورت شەبەرى ءنورماتيۆىن ورىندايدى.
ۇزدىكسىز تەر توگۋدىڭ ارقاسىندا ارادا ەكى جىل وتكەن سوڭ, ياعني 1955 جىلى جوعارىداعى ۇپاي سانىن 569-عا جەتكىزەدى. بۇل كورسەتكىش سول كەزدە قازاقستاننىڭ جاڭا رەكوردى رەتىندە تىركەلگەنىن ايتا كەتكەن ءجون. ودان كەيىن 1956 جىلى وتكەن كسرو حالىقتارىنىڭ ءى سپارتاكياداسىندا قازاق قىزدارى اراسىنان تۇڭعىش رەت ەرلەر ساپىندا ونەر كورسەتىپ, نىسانا كوزدەۋدەن (600 مۇمكىندىكتەن 587 ۇپاي) ءوزىنىڭ بۇرىنعى رەكوردىن جاڭارتتى.
1957 جىلى ودەسسا قالاسىندا وتكەن كسرو چەمپيوناتىندا 600 مۇمكىندىكتەن 594 ۇپاي جيناپ, بىرىنشىلىكتەن قولا مەدال الدى. سونداي-اق جاتىپ اتۋدان 200 مۇمكىندىكتەن 200 ۇپاي جيناپ, تاعى دا ەلىمىز رەكوردىن توقتاتتى. ءبىر تاڭدانارلىق جاعداي, وسى رەكوردتى ءالى كۇنگە دەيىن ەشكىم جاڭارتقان جوق.
گۇلشات اپامىز سپورتتىق جولىندا كسرو جانە قازكسر-ءنىڭ دوسااف ورتالىق كوميتەتىنىڭ قۇراماسى ساپىندا ونەر كورسەتتى. 1959 جىلدان باستاپ تورەشىلىك قىزمەتىن اتقاردى. رەسپۋبليكا جانە كسرو جارىستارىندا قازىلىق ەتتى.
1961 جىلى ماسكەۋدىڭ م.ۆ.لومونوسوۆ اتىنداعى مەملەكەتتىك ۋنيۆەرسيتەتىن ءتامامداپ, جوعارى وقۋ ورىندارىنا ءدارىس وقىدى. ءبىلىم بەرۋ سالاسىندا پەدوگوگيكا عىلىمدارىنىڭ كانديداتى اتاعىن قورعادى. «قۇرمەت بەلگىسى» وردەنىمەن جانە مەدالدارمەن ماراپاتتالعان.
