تەكسەرىستىڭ باسىنان باستاپ, توتەنشە جاعدايلار دەپارتامەنتى قىزمەتكەرلەرى جەكە تۇرعىن ءۇي سەكتورىنداعى 15 500-دەن استام ءۇيدى ارالاپ شىقتى. ءۇي يەلەرىمەن ءتۇسىندىرۋ جۇمىستارى جۇرگىزىلدى. تۇرعىن ۇيلەرگە تەكسەرىس بارىسىندا 4901 بۇزۋشىلىق جويىلدى. بۇل تۋرالى ەلوردا اكىمدىگىنىڭ رەسمي "ينستاگرام" پاراقشاسىنداعى تىكەلەي ەفير كەزىندە قالالىق تجد اپاتتار قاۋپىن ازايتۋ جانە ازاماتتىق قورعاۋ باسقارماسىنىڭ باستىعى ەركىن وتارعالىم حابارلادى.
"15 تامىزدان باستاپ ءورت قاۋىپسىزدىگى ايلىعى باستالدى. شارا ماقساتى - ءورت قاۋىپسىزدىگى نورمالارىن ءتۇسىندىرۋ. ءبىزدىڭ قىزمەتكەرلەر ءار ۇيگە بارادى, تەكسەرىس بارىسىندا ولار تۇرعىن ۇيلەرگە قويىلاتىن ءورت قاۋىپسىزدىگىنىڭ ەرەجەلەرى مەن تالاپتارى سيپاتتالعان جادىنامالاردى ءتۇسىندىرىپ, تابىستايدى. قازىرگى ۋاقىتتا 15 500-دەن استام ءۇي ارالادىق, ونىڭ ىشىندە 1543-ءى حالىقتىڭ الەۋمەتتىك وسال توپتارىنىڭ ۇيلەرى, ولارمەن الدىن الۋ جۇمىستارى جۇرگىزىلدى. 4901 بۇزۋشىلىق سول جەردە ءتۇسىندىرۋ جۇمىستارىن جۇرگىزۋ, كەڭەس بەرۋ ارقىلى جويىلدى", دەدى ەركىن وتارعىلىم.
تەكسەرىس كەزىندە قۇتقارۋشىلار ەلەكتر جابدىقتارىن دۇرىس ورناتپاعان جانە دۇرىس پايدالانباعان جاعدايلاردى انىقتايدى. كوبىنەسە ءورت قاۋپىن تۋدىراتىن - ەسكىرگەن ەلەكتر سىمدارى. سونداي-اق, تۇرعىندار ءجيى جىلىتقىشتاردى پايدالانادى, ولاردى قولدانعان كەزدە اباي بولۋ كەرەك. سپيكەر ەلەكتر اسپاپتارى مەن ەلەكتر سىمدارىن ۋاقتىلى تەكسەرۋدى ۇسىنادى. تەرمورەتتەگىشپەن جابدىقتالعان زاۋىت ءوندىرىسىنىڭ جابدىقتارىن پايدالانۋ قاجەت.
جىلىتۋ پەشتەرىن دۇرىس پايدالانباۋ تالاپ بۇزۋشىلىق بويىنشا ەكىنشى ورىندا.
"وكىنىشكە قاراي, تۇرعىندار قاۋىپسىزدىك ماسەلەلەرىنە نەمقۇرايلى قارايدى. كوبىنەسە پەشتەرىن جىلىتۋ ماۋسىمىنا دايىندامايدى. ياعني ولار تەكسەرۋ, جوندەۋ, مۇرجالاردى تازارتۋ شارالارىن جۇرگىزبەيدى. پەشتەردىڭ ۇستىنە زاتتار, وتىن قويىپ, اياق كيىم كەپتىرگەندەر ءجيى كەزدەسەدى", دەدى ەركىن وتارعىلىم.
قازىرگى ۋاقىتتا پەشتەرگە قويىلاتىن ەكى نەگىزگى تالاپ بار: ورتكە قارسى وقشاۋلاعىش پەن جاپقىشتىڭ بولۋى. بۇل قارقىندى جۇمىس كەزىندە پەشتىڭ قىزىپ كەتۋىنە جول بەرمەيدى. جىلىتۋ ماۋسىمى باستالماس بۇرىن, پەشتەردى تەكسەرىپ, جوندەپ, تازالاپ, 50ح70 سم ولشەمدى مەتالل توسەگىش جابدىقتاۋ قاجەت.
پەشتەرگە زاتتار مەن وتىندى كەپتىرۋگە تىيىم سالىنادى, سونداي-اق ونى تەز تۇتاناتىن سۇيىقتىقتارمەن جاعۋعا جول بەرىلمەيدى. بالالارمەن ءورت قاۋىپسىزدىگى تۋرالى اڭگىمەلەسۋ قاجەت, ولاردى ەرەسەكتەرسىز قالدىرماڭىز.
ستاتيستيكاعا سايكەس, تۇرعىن ءۇي سەكتورىنداعى ورتتەردىڭ 30% - ى شارۋاشىلىق قۇرىلىستارعا تيەسىلى. تۇرعىندار ولاردى كۇتىپ ۇستاۋعا نازار اۋدارۋى كەرەك, سونداي-اق اۋلالاردى تۇتاناتىن زاتتارمەن نەمەسە جانبايتىن كۇلمەن بىتەپ تاستاماۋى كەرەك.
ءورت قاۋىپسىزدىگىن قامتاماسىز ەتۋ ءۇشىن اۋلالاردى ۇنەمى تازالاپ وتىرۋ قاجەت.
