قازاق ۇلتتىق قىزدار پەداگوگيكالىق ۋنيۆەرسيتەتى ۇيىتقى بولعان شارا ونلاين رەجىمدە ۇيىمداستىرىلماق. وسكەلەڭ ۇرپاقتى وتانسۇيگىشتىككە تاربيەلەپ, ولاردىڭ تانىم-تالعامىن ۇلت رۋحانياتىنا باعىتتاۋدى كوزدەيتىن ءسوز زەرگەرلەرىنىڭ سايىسى ۇلتتىڭ ۇلىلىعىن ۇلىقتاپ, ءتول مادەنيەتىمىزدىڭ مەرەيىن ارتتىرۋعا سەپ بولماق.
ايتىس بارىسىندا اقىندار "اباي – دانا, اباي – دارا", "رۋحاني جاڭعىرۋ – باستى باعدار", "تۋعان جەر – تۇرعان جەرمەن ولشەنبەيدى", "انا ءتىلىم – ارداعىم", "تاۋەلسىزدىك – تۇعىرىم" تاقىرىپتارى بويىنشا ءسوز جارىستىرادى.
"بايتاعى – سىرعا, كومەيى – جىرعا تۇنعان ۇلى دالانىڭ توسىندە سان عاسىرلار ءبويىتول رۋحانياتىمىزدىڭ سارقىلماس قازىناسىنا اينالعان قۇندىلىقتار قالىپتاستى. ۇلتتىق بولمىسىمىز بەن ايقىن نىشانىمىزعا اينالعان دارا ءداستۇرىمىز پايدا بولدى. بابادان بالاعا ميراسقا اينالعان مادەني مۇرالارىمىز ەكشەلدى. سونىڭ ءبىرى – ايتىس ونەرى. ايتىس – داۋىرلەرمەن قاناتتاسىپ, عاسىرلارمەن ۇندەسىپ, زامانالارمەن تىلدەسىپ كەلە جاتقان ۇلى ونەر. ايتىس – قازاقتىڭ قانىنا سىڭگەن بەكزات ياكي بىرەگەي دۇنيە. بۇل ونەر – دالا فيلوسوفياسىمەن ساباقتاسىپ, قاناتتاسىپ جاتقان مادەني مۇرالارىمىزدىڭ ءبىرى ءھام بىرەگەيى رەتىندە ۇلت قازىناسىنىڭ قاتارىنا ەندى", دەيدى قىزدار ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ جەتەكشىسى جاندار اسان.
ايتا كەتەيىك, حاكىم مەرەيتويىنا ارنالعان ونەر جارىسىنىڭ ماقساتى – جاس اقىنداردىڭ ورنەكتى سوزدەرى مەن ورەلى ونەرى ارقىلى ەل مۇراتى مەن قۇندىلىقتارىن ناسيحاتتاۋ, اباي مۇرالارى ارقىلى ۇلت ادەبيەتىنىڭ تابىستارىن جانە تاۋەلسىزدىك جىلدارى قول جەتكەن جەتىستىكتەردى دارىپتەۋ.
