ەل مەن جەردىڭ تاريحىن ەكشەپ, كوكىرەگىنە قۇيعان كونەكوز قاريالاردىڭ ايتۋلارىنا قاراعاندا, قالانىڭ باتىس جاعىنداعى تويعان قوزىداي تومپايىپ جاتقان بۇقپا تاۋىنىڭ باۋرايى يت تۇمسىعى وتپەيتىن قالىڭ جىنىس بولعان ەكەن. كەيىن الدەنەشە مارتە ءورت شالعان. جىلان ءتىلى سۋماڭداعان قىزىل ورتتەن امان قالعان ورماندى كەيىن جەرگىلىكتى جۇرت اياۋسىز وتاپ, اجەتىنە جاراتقان. قازىر بۇقپانىڭ ارعى-بەرگى بەتكەيى كوسەنىڭ يەگىندەي جىپ-جىلماعاي.
وبلىستىق «رۋحاني جاڭعىرۋ» وڭىرلىك-جوبالىق كەڭسەسىنىڭ ۇجىمى باعالى باستاما كوتەرىپ, «كوكشەتاۋ – كوك قاراعايلار مەكەنى» اكتسياسىن وتكىزدى. وبلىس ورتالىعىنداعى №4 ورتا مەكتەپتىڭ جانىنا 30 ءتۇپ قاراعاي ەكتى. الداعى ۋاقىتتا كوشەتتەردى سۋارىپ, كۇتىپ-باپتاۋدى دا ءوز مويىندارىنا الىپ وتىر. ەندى وسى يگىلىكتى ىسكە قالاداعى ۇجىمدار جۇمىلا كىرىسسە, ءجون بولار ەدى.
بۇعان دەيىن دە بۇقپانىڭ باۋرايىنا تالاي مارتە كوشەت وتىرعىزىلعان. كۇنگە بوي سالىپ, كوكتەگەنى كوپ ەمەس. كوشەتتى دە كوزبوياۋ ءۇشىن وتىرعىزۋ بەلەڭ الىپ كەتتى عوي. شىبىق شانىشقاننان كەيىن اتتاپ باسپاعان سوڭ قانشاما كوشەت كوكتەي سولىپ قالدى. توپىراققا كومىلگەن قايران قارجى دەيسىز دە.
بۇل جولى ۇجىم كوشەتتەردى وزدەرى كۇتىپ-باپتاماق. دەمەك, جاس كوشەتتىڭ وزىندەي ۇلبىرەگەن ءۇمىت بار. ەل يگىلىگى ءۇشىن, ارۋاق قونىپ, نار شوككەن اتا قونىستىڭ كوركى ءۇشىن باعالى باستاما قولعا الىندى, ەندىگىسى ەلگە سىن!
كوكشەتاۋ قالاسى
