ونلاين فورماتتا العاش رەت ۇيىمداستىرىلعان كونفەرەنتسياعا قازاقستان, وزبەكستان, قىرعىزستان, گرۋزيا, رەسەي, ۇلىبريتانيا, تۇركيا, گرەكيا, يتاليا, كانادا, سلوۆەنيا, سينگاپۋر, يزرايل جانە اقش زەرتتەۋشىلەرى, عالىمدارى, ساراپشىلارى, مەملەكەتتىك قىزمەت پراكتيكتەرى جانە ستۋدەنتتەر قاتىستى.
نازارباەۆ ۋنيۆەرسيتەتىنىڭ پروفەسسورى يلەسانمي ادەسيدا كونفەرەنتسيا بارىسىندا كەڭىنەن تالقىلانعان جاڭا سىن-قاتەرلەر جاعدايىندا ورتالىق ازيا ەلدەرىنىڭ تۇراقتى دامۋ ماقساتتارىنا بايلانىستى ماسەلەلەر ءوڭىر ەلدەرى ءۇشىن عانا ەمەس, جالپى جاھاندىق قوعامداستىق ءۇشىن دە پايدالى بولاتىنىن اتاپ ءوتتى.
– COVID-تەن كەيىنگى الەمدە, بۇرىن-سوڭدى بولماعان, اقىلعا قونىمدى ساياسات پەن دۇرىس باسقارۋ قاجەتتىلىگى ودان سايىن كۇشەيە تۇسەدى. ويتكەنى ۇكىمەتتەر مەن قوعامدار انىقتالعان جۇيەلىك ولقىلىقتاردى جويۋ ءۇشىن ساياسي تاڭداۋ جاسايدى. ەسەپ بەرەتىن جۇيەلەردى, بەيىمدەلەتىن ينستيتۋتتاردى, سونداي-اق تەحنولوگيالىق جانە تسيفرلى يننوۆاتسيالارمەن ۇيلەسكەن ازىق-ت ۇلىك, سۋ, ەنەرگەتيكا, مەديتسينا, كولىك جانە قالالىق جۇيەلەردىڭ قاۋىپسىزدىگى مەن تۇراقتىلىعىن قۇرۋ ءۇشىن ساياسي ويلاۋ مەن تاجىريبەنى وزگەرتۋ قاجەت. ءداستۇرلى كونفەرەنتسيا ورتالىق ازياداعى تۇراقتى دامۋ ماقساتتارىنا جانە COVID-19 سىن-قاتەرلەرىنە, پروبلەمالار مەن مۇمكىندىكتەرگە نازار اۋدارۋ ءۇشىن, سونداي-اق COVID كەزىندە جانە ودان كەيىن الەمدەگى تۇراقتى دامۋ ماقساتتارىنىڭ ءارتۇرلى اسپەكتىلەرىنە قول جەتكىزۋگە ۇنەمى ۇمتىلۋعا ارنالعان, – دەدى جوعارى مەملەكەتتىك ساياسات مەكتەبىنىڭ دەكانى ۆەنگ تات حۋەي.
استانا مەملەكەتتىك قىزمەت حابىنىڭ باسقارۋشى كوميتەتىنىڭ توراعاسى ءاليحان بايمەنوۆ پاندەميادان تۋىنداعان داعدارىسقا جاۋاپ رەتىندە ۇكىمەتتەر نەگىزىنەن رەسۋرستاردى قىسقا مەرزىمدى ءبولۋ تۇرعىسىنان جەدەل شەشىمدەر قابىلدايتىنىن اتاپ ءوتتى.
– وسى جىلدام شەشىمدەر تابۋ جارىسىندا تۇراقتى دامۋدىڭ ۇزاقمەرزىمدى ماقساتتارى نازاردان تىس قالمايتىنىنا كوز جەتكىزۋ ماڭىزدى. اۋىر قىسىمعا ۇشىراعان بۇكىل الەمدەگى ۇكىمەتتەر جان-جاقتى جانە بارابار شارالار قابىلداۋدا بەلگىلى ءبىر تاجىريبە جيناقتادى. ونىڭ ىشىندە ورتالىق ازيا ەلدەرى دە بار. الايدا كورىپ وتىرعانىمىزداي, بۇل پاندەميامەن كۇرەسۋدىڭ امبەباپ مودەلى جوق. سوندىقتان وزىق تاجىريبەنى تاراتۋدا بارلىق سەكتورلار مەن مۇددەلى تاراپتار اراسىنداعى جاھاندىق ىنتىماقتاستىق پەن ءتيىمدى ارىپتەستىكتى نىعايتۋ ماڭىزدى, – دەدى ءا.بايمەنوۆ.
سونىمەن قاتار كونفەرەنتسيانىڭ نەگىزگى سپيكەرلەرى قاتارىندا گرەكيا, افينى ەكونوميكا جانە بيزنەس ۋنيۆەرسيتەتى ەكونوميكا مەكتەبىنىڭ تۇراقتى دامۋ كافەدراسىنىڭ مەڭگەرۋشىسى فيب كۋندۋري جانە سينگاپۋر ۇلتتىق ۋنيۆەرسيتەتىنىڭ پروفەسسورى ۆينود توماس ءسوز سويلەدى.
كونفەرەنتسيا بارىسىندا قاتىسۋشىلار, ونىڭ ىشىندە جاس عالىمدار ءوز زەرتتەۋلەرىنىڭ ناتيجەلەرىمەن, بىلىمدەرى مەن تاجىريبەلەرىمەن ءبولىستى, سونداي-اق وزدەرىنىڭ ارىپتەستىك بايلانىستارىن كەڭەيتۋگە جانە نىعايتۋعا مۇمكىندىك الدى.
