ايماقتار • 20 قازان، 2020

اقتوبەدە كارانتيندىك ستاتسيونارلار قايتا اشىلدى

اقتوبە قالاسىندا وتكەن تاۋلىكتە كوروناۆيرۋسپەن اۋىرعان ءبىر ناۋقاس تىركەلدى، دەپ حابارلايدى Egemen.kz

70 جاستاعى قالا تۇرعىنى ءتورت كۇن بويى ۇيىندە اۋىرىپ، سودان كەيىن عانا دارىگەرلىك كومەككە جۇگىنگەندە، الىنعان پتسر تەست وڭ ناتيجە كورسەتكەن. ناۋقاس دەرەۋ وبلىستىق جۇقپالى اۋرۋلار اۋرۋحاناسىنا جاتقىزىلىپ، ونىمەن تىعىز بايلانىستا بولعاندار تۇگەلدەي وقشاۋلاندى.

6 قازاننان باستاپ، وبلىس اۋماعىندا ءۇش كارانتيندىك ستاتسيونار قايتادان اشىلدى. بىرەۋى – اقتوبە قالاسىندا، ەكى ستاتسيونار مارتوك اۋدانىنىڭ ورتالىعى – مارتوك جانە قارعالى اۋدانىنىڭ ورتالىعى – بادامشا ەلدىمەكەندەرىندە اشىلدى. قازىرگى ۋاقىتتا مارتوك اۋداندىق اۋرۋحاناسىندا كوروناۆيرۋس جۇقتىرعان 3 ناۋقاس ەم قابىلداپ جاتسا، 14 ناۋقاس وبلىستىق جۇقپالى اۋرۋلار اۋرۋحاناسىندا جاتىر. ەكى ناۋقاستىڭ جاعدايى اۋىر. ازىرگە وبلىس اۋماعىندا مەكتەپ وقۋشىلارى اراسىندا وسى ىندەتتى جۇقتىرعاندار تىركەلگەن جوق.

رەسەي فەدەراتسياسىندا كوروناۆيرۋس ىندەتىنىڭ تارالۋ قاۋپى كۇن ساناپ كۇشەيىپ بارا جاتقاندىقتان، ورىنبور وبلىسىمەن شەكارالاس مارتوك اۋدانىنداعى جايساڭ جانە قارعالى اۋدانىنداعى الىمبەت وتكىزۋ بەكەتتەرىندە باقىلاۋ كۇشەيتىلدى.

قازىرگى كەزدە وبلىس اۋماعىندا كارانتين ەرەجەسىنىڭ ساقتالۋىن قاداعالايتىن 37 ءموبيلدى توپ جۇمىس ىستەيدى. ولار وسى كەزگە دەيىن 1282 زاڭبۇزۋشىلىقتى انىقتاپ، 92 ميلليون 300 مىڭ تەڭگەگە 727 ايىپپۇل سالعان. سوعان قاراماستان جۇرتشىلىق توي-دۋماندى ازايتاتىن ءتۇرى جوق. اسىرەسە، اۋدان-اۋىلداردا جۇرت بۇرىنعىسىنشا قامسىز ءجۇر. قوبدا، ويىل، قارعالى، العا اۋداندارىندا ء موبيلدى توپتاردىڭ جۇمىسى وتە ءالسىز.

سوندىقتان دا الداعى اپتادان باستاپ قۇرامىنا وبلىستىق، قالالىق، اۋداندىق ءماسليحاتتار دەپۋتاتتارى، قوعام بەلسەندىلەرى كىرگەن ءموبيلدى توپتاردىڭ جۇمىسى كۇشەيتىلىپ، كارانتين تالاپتارى بۇزىلعان دەرەكتەر تۇراقتى تۇردە اقپارات قۇرالدارى مەن الەۋمەتتىك جەلىلەردە جاريالاناتىن بولدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز