بىردەن ايتايىق, جوعارى قىزمەتتەگى لاۋازىمدى ادامداردى مەملەكەتتىك اتتەستاتتاۋدان وتكىزۋ ماسەلەسى اۋىلداعى قاراپايىم ادامداردى دا بەيجاي قالدىرعان جوق. اسىرەسە, ءبىر ەلدى باسقارىپ وتىرعان اۋدان اكىمدەرىنىڭ تاعدىرىنا كادىمگىدەي قوبالجىپ, قوپاقتاپ قالعانىمىز دا راس.
قازاقتىڭ ءۇش بىردەي دانىشپان ۇلدارىن دۇنيەگە اكەلگەن قاسيەتتى اباي ەلى دە ءوز اكىمدەرىن بايگەگە قوسىپ, قاشان سىناق بىتكەنشە كومبە تۇبىندە «قيقۋلاپ» تۇرعانداي بولدى. ال, ەشبىر كوڭىل جىقپاستىققا, اتاق-داڭققا, لاۋازىم-مانساپقا, تامىر-تانىستىققا قارامايتىن قاتال سىناقتان اكىمدەرى جوعارى باعامەن ءوتىپ كەلىپ, قايتا سايلانعاندا, شىنى كەرەك, بۇكىل ەل بالاشا قۋاندى. «اكىم بول, حالقىڭا جاقىن بول», دەگەن قاناتتى ءسوزدىڭ ايتىلۋى دا وسىدان شىعار.
بىردەن ايتايىق, جوعارى قىزمەتتەگى لاۋازىمدى ادامداردى مەملەكەتتىك اتتەستاتتاۋدان وتكىزۋ ماسەلەسى اۋىلداعى قاراپايىم ادامداردى دا بەيجاي قالدىرعان جوق. اسىرەسە, ءبىر ەلدى باسقارىپ وتىرعان اۋدان اكىمدەرىنىڭ تاعدىرىنا كادىمگىدەي قوبالجىپ, قوپاقتاپ قالعانىمىز دا راس.
قازاقتىڭ ءۇش بىردەي دانىشپان ۇلدارىن دۇنيەگە اكەلگەن قاسيەتتى اباي ەلى دە ءوز اكىمدەرىن بايگەگە قوسىپ, قاشان سىناق بىتكەنشە كومبە تۇبىندە «قيقۋلاپ» تۇرعانداي بولدى. ال, ەشبىر كوڭىل جىقپاستىققا, اتاق-داڭققا, لاۋازىم-مانساپقا, تامىر-تانىستىققا قارامايتىن قاتال سىناقتان اكىمدەرى جوعارى باعامەن ءوتىپ كەلىپ, قايتا سايلانعاندا, شىنى كەرەك, بۇكىل ەل بالاشا قۋاندى. «اكىم بول, حالقىڭا جاقىن بول», دەگەن قاناتتى ءسوزدىڭ ايتىلۋى دا وسىدان شىعار.
بىردە, الاشتىڭ ارداقتى ازاماتى, كورنەكتى عالىم, قوعام قايراتكەرى مىرزاتاي جولداسبەكوۆتىڭ: «اباي ەلىنە اكىم بولۋ ءارى – باق, ءارى – سور. باق بولاتىن سەبەبى – ۇلىلار ەلىنە باسشى بولۋ اركىمنىڭ پەشەنەسىنە جازىلا بەرمەيدى. ال, سور بولاتىنى – ءيسى قازاق قاراپ وتىرعان ەلدى كوش سوڭىنا قالدىرۋعا ەشكىمنىڭ قاقىسى جوق», دەگەنى بار. شىندىعىندا سولاي.
اتاق-داڭقى التى الاشتى شارلاعان اباي ەلىنىڭ تاعدىر-تالايى وپ-وڭاي بولعان جوق. كەشەگى كەڭەس داۋىرىندەگى ءشاكارىم قاجى جازىقسىز وققا ۇشاتىن «شىڭعىستاۋ كوتەرىلىسىنەن» باستاپ, بەيبىت حالىقتى قىرىق جىل قىرعىنعا ۇشىراتقان اتوم الاپاتىنىڭ اياقتالۋىنا دەيىنگى عاسىرعا پارا-پار الاساپىران جىلداردا ەل نە كورمەدى دەيسىز؟! ءبارىن دە كوردى. بارىنە دە شىدادى. اياق-قولى بىردەي بوسايتىن ازاتتىقتىڭ اق تاڭىن اڭسادى. قوي ۇستىنە بوزتورعاي جۇمىرتقالايتىن سول زاپىرانسىز زامان تۋعاندا ابىز اقساقالىمىز, حالىق اقىنى شاكىر ابەنوۆتىڭ تۇڭعىش پرەزيدەنتىمىز نۇرسۇلتان ءابىش ۇلى نازارباەۆقا بۇكىل الاش بالاسىنىڭ اتىنان اق باتا بەرۋى دە سوندىقتان شىعار.
راس, اباي ەلىن سول كەڭەس ءداۋىرى كەزىندە دە شىپ-شىرعاسىن شىعارماي, ايرانداي ۇيىتىپ, ابىروي-اتاعىن اسقاقتاتىپ ۇستاعان باسشىلار دا كوپ بولدى. اسىرەسە, كورنەكتى قوعام قايراتكەرى, بۇگىندە سەكسەندى القىمداپ قالعان اياۋلى اقساقالىمىز حافيز ماتاەۆتىڭ تۇسىندا اباي اۋدانى ەڭبەكتە دە, ونەردە دە, سپورتتا دا داۋىرلەپ تۇردى. ودان كەيىنگى باسشىلار دا «جۇمىس ىستەمەدى» دەۋدەن اۋلاقپىز. ارقايسىسى حال-قادىرىنشە ەلدىڭ الەۋمەتتىك-ەكونوميكالىق جاعدايىن جاقسارتۋعا اتسالىسىپ جاتتى. سونداي-اق, باردى جوعالتىپ, جوقتى تابا الماي تاقىر تازا كەتكەندەرى دە, حالىقتىڭ نارازىلىعىنا ۇشىراعاندارى دا بولىپ جاتتى. حاكىم ابايدىڭ بۇكىل الاش بالاسى بولىپ اتاپ وتكەن 150 جىلدىق مەرەكەسىنەن كەيىنگى ونشاقتى جىلدا اۋداندا ايتارلىقتاي وزگەرىس بولا قويعان جوق. قايتا بارى جوعالىپ, ازى تونالىپ, ۇستاعاننىڭ قولىندا, تىستەگەننىڭ اۋزىندا كەتىپ جاتتى. اۋدان ابدىراپ قالدى.
ءسويتىپ, دەل-سال بولىپ جۇرگەنىمىزدە شىعىس وڭىرىنە جاڭا باسشى كەلدى. جاي كەلگەن جوق, ءوزى وتىرعان اق ءۇيدىڭ الدىنداعى لەنيننىڭ ورنىنا ابايدىڭ ەسكەرتكىشىن قويعىزىپ ەرلىك جاساپ كەلدى. «قۇداي بەردى, كوسەگەمىز كوگەرەتىن بولدى», دەدىك. سولاي بولدى دا.
العاشقى ساپارىن اباي اۋدانىنان باستاعان بەردىبەك ساپارباەۆ بالا-شاعاسىن قوسقاندا 20 مىڭعا جەتپەيتىن از عانا حالقى بار, الاقانداي اباي ەلىنىڭ «جۇدەۋلەۋ» كوركىن ءوز كوزىمەن كورىپ كەتتى. ىلە-شالا بارلىق اۋدان اكىمدەرى باس قوسقان ۇلكەن ءبىر القالى جيىندا: «اباي – بار قازاقتىڭ داناسى. ولاي بولسا, ونىڭ ەلىن جۇتاتىپ قويۋ بارىمىزگە سىن, ويلانىڭىزدار», دەپتى.
ارتىنشا ءوزى اباي ەلىن باسقارۋعا جاڭا اكىم اكەلدى. شىڭعىستاۋدىڭ قۇندىزدى وڭىرىندە جاتقان ايگىلى اقتامبەردى جىراۋ مەن اقتايلاق بيلەردىڭ تۇقىمى سانالاتىن تۇرسىنعازى جانتۇياق ۇلى مۇساپىربەكوۆتى جۇرت سەمەي قالاسى اكىمىنىڭ ورىنباسارى بولىپ كوپ جىلدار بويى قىزمەت ىستەگەن بىلىكتى مامان, بىلگىر ازامات رەتىندە بىلەتىن. قۋانا قارسى الدى. اكىم بىرەر اي سالت كەلىپ ىستەدى. وتباسى كوشىپ كەلمەدى. بۇرىنعى اكىمدەر سالىپ كەتكەن قاراۋىلدىڭ قاق ورتاسىنداعى ەكى قاباتتى ءزاۋلىم كوتتەدج بوس تۇردى. ەل «گۋ» ەتە ءتۇستى. «ۋاقىتشا كەلگەن عوي, ءبىزدىڭ اكىمنىڭ ورىندىعى دا وينامالى جىلىك سياقتى بولىپ كەتكەن-اۋ, ءسىرا», دەگەندەر دە بولدى.
بىراق اكىم كەتپەدى. اۋىل شەتىندەگى ەكى وتباسىلىق پاتەردىڭ جارتىسىن ساتىپ الىپ, سوعان بالا-شاعاسىمەن كىردى. كوتتەدجدى «قوناقۇي» جاساۋعا بەردى. بۇل دا اۋداننىڭ ءزارۋ نارسەسى بولاتىن. جۇرتتىڭ جۇرەگى جىلىپ قالدى. «الايىن, تونايىن», دەپ كەلگەن اكىم ەمەس, «بولايىن, جانايىن» دەپ كەلگەن باسشى ەكەن, «قولداسايىق, قورعاسايىق» دەسىپ, ونى جاعالاي باستادى جۇرت.
سودان بەرى دە, مىنە, ءۇش جىلدىڭ ءجۇزى بولىپتى. جاپىراعىنا جان ءبىتىپ, تامىرىنا قان جۇگىرگەن قارا اعاشتاي بيىك ەل كەلبەتى از جىلدا اجارىنا قايتا كىرىپ, وڭالىپ, گۇلدەي باستادى. ءاسىرەسە, جىل سايىن مىڭداعان قوناقتى قۇشاق جايا قارسى الىپ, مىڭداعان قوناقتى قوشەمەتتەپ شىعارىپ سالاتىن اۋدان ورتالىعى قاراۋىل ادام تانىماستاي كەسكىن-كەلبەتكە, كەرەمەت كەيىپكە ورانىپ كەلەدى.
ءبىر كەزدەرى حافيز ماتاەۆ ەككىزگەن تال-اعاشتىڭ تامىرىنا بالتا شابىلىپ, قۋراعانى قۋراپ, قۋراماعانى وتقا جاعىلىپ كەتىپ ەدى, ەندى بۇگىن ەڭسە تىكتەپ, جايقالا باستاعان جاس تالداردىڭ جاپ-جاسىل كوركى كوز قۋانتىپ, كوڭىل وسىرەدى. ول, ول ما, قايتادان قالىپقا كەلتىرىلىپ, قايتادان گۇل ەگىلىپ, شىم توسەلگەن, كەشكى ۋاقىتتا سان ءتۇرلى بوياۋعا مالىنىپ, سامالاداي نۇر شاشاتىن ەلەكتر شامدارى مەن سۋبۇرقاقتار ورناتىلعان سكۆەرلەر, گۇل الاڭدارى مادەنيەتتى ەل تىرلىگىنىڭ مايەگىن اڭعارتقانداي.
باياعىدا كوممۋنيستىك پارتيانىڭ بار كەزىندە حافيز ماتاەۆ رەسپۋبليكا باسشىلارىنىڭ وزىنەن ۇلى ابايدى ارقالانىپ كوپتەگەن ماسەلەلەردى شەشىپ الىپ جاتۋشى ەدى, ءدال سونداي ەل ءتىرشىلىگىنە اۋاداي قاجەتتى قوماقتى قاراجاتتاردى ءبىزدىڭ تۇرسەكەڭ دە جالتاقتاپ جاسىرىنباي, قورقاقتاپ قوبالجىماي سۇراپ الىپ جاتادى. ايتالىق, وبلىس اكىمى بەردىبەك ماشبەك ۇلىنىڭ ءوزى باس بولىپ, ءبىر عانا اۋدان ورتالىعىنان بىرەر جىلدا ەكى سپورت زالى, ەكى حوككەي جانە كىشى فۋتبول الاڭدارى سالىنىپ پايدالانۋعا بەرىلدى. بەكەڭ باستاماشى بولعان «تۋعان جەرگە – تاعزىم!» اكتسياسى بويىنشا ەلدىڭ ۇلكەن مەتسەنات ازاماتى شىڭعىس مەدعات ۇلى قۇتجانوۆ 70 ميلليوننان استام قارجى شىعارىپ, تاعى دا ءبىر ءزاۋلىم سپورت مەكتەبىن سالىپ جاتىر.
ءدال وسىنداي جاعداي اۋداننىڭ ەلدى مەكەندەرىندە ويداعىداي جۇزەگە اسۋدا. توقىراۋ كەزەڭىنىڭ تولقىنىنا ۇشىراپ, تاپا-تال تۇستە تالان-تاراجعا تۇسكەن اۋىلدارداعى مادەني وشاقتار قايتادان قالىپقا كەلتىرىلىپ جاتىر. ماسەلەن, قۇندىزدى, قاسقابۇلاق, مەدەۋ, كوكباي اۋىلدارىنداعى كلۋب ۇيلەرى قايىرا جوندەلىپ, پايدالانۋعا بەرىلسە, وپىرىلىپ ورىنى عانا قالعان ارقات, سارجال, توقتامىس اۋىلدارىنداعى مادەنيەت ءۇيلەرى مەن كىتاپحانالارى قايتا سالىنۋدا.
جاڭا جوعارى جاقتان ءجونى مەن رەتىن تاۋىپ سۇراي ءبىلۋدىڭ دە ۇلكەن ونەر ەكەنىن ايتتىق. مۇحتار اۋەزوۆتىڭ 115 جىلدىعى, شاكارىم قۇدايبەرديەۆتىڭ 155 جىلدىعى قارساڭىندا وبلىس اكىمى بەردىبەك ساپارباەۆ تەك اباي اۋدانىنا عانا 500 ملن. تەڭگە كولەمىندە قوماقتى قاراجات بولسە, سونىڭ ناتيجەسىندە اۋدان ورتالىعىندا جاڭادان ولكەتانۋ مۇراجايى اشىلدى. ورتالىق مادەنيەت ءۇيى تولىقتاي كۇردەلى جوندەۋدەن وتكىزىلدى. «جاستار ءۇيى» بوي كوتەردى. ءۇش قاباتتى كىتاپحانا كىرسە شىققىسىز كەيىپكە كەلدى. اباي ەلىنىڭ ازاماتى ەرلان ءباتتاش ۇلىنىڭ تىكەلەي قاراجاتىمەن قازىرگى زامانعا ساي قايتا جوندەلىپ, پايدالانۋعا بەرىلگەن ەكى قاباتتى قوناقۇيى سوڭعى بىرەر جىلداردىڭ تاماشا جەمىسى.
اسىلىندا, ءار اكىمنىڭ قىزمەت ىستەۋ قابىلەتى ءارتۇرلى بولادى. بىزدىڭشە, تۇرسىنعازى مۇساپىربەكوۆ – وي مەن اقىلدى قاتار ۇستايتىن, كەۋدەسى كەڭ سارايداي اشىق, وقىپ-توقىعانى مول, ءىشى مەن سىرتى بىردەي بىلىكتى ادام. ول توقمەيىلسۋدى, توقىراپ-توقتاۋدى كوپ جاقتىرمايدى. «بولعاننىڭ ۇستىنە بولا تۇسسە ەكەن, تولعاننىڭ ۇستىنە تولا تۇسسە ەكەن», دەيتىن جان. قاسىندا ءجۇرىپ, بىرگە قىزمەت ىستەمەسەم دە, سىرتتاي اڭىسىن اڭدىپ, بارىسىن باقىلاپ جۇرەتىن جاناشىر اعاسى بولعاندىقتان, بايقايمىن, ول ۇنەمى ىزدەنىس ۇستىندە جۇرەدى. كادىمگىدەي شىعارماشىلىقپەن جۇمىس ىستەيدى. ايتالىق, اباي اۋدانىنىڭ «قالامقاس» حالىق انسامبلىنىڭ اتاق-داڭقى كەشەگى كەڭەس ءداۋىرى كەزىندە دە, ودان بەرى دە اسپانداپ تۇردى. كەڭ-بايتاق ەلىمىزدى بىلاي قويعاندا, كوپتەگەن شەت مەملەكەتتەردىڭ سالتاناتتى سارايلارىن اسەم سازعا بولەدى. وسى ءانسامبلدىڭ سوڭعى ۋاقىتتا ءبىراز توقىراپ قالعانى دا راس. اكىم سونى رەتكە كەلتىردى. ونى قۇرامىندا 70-كە جۋىق اۋىل ونەرپازدارىن جيناقتاعان «قالامقاس» حالىق ءانسامبلىنىڭ بىلتىرعى وبلىستىق ونەر بايقاۋىندا باس جۇلدەنى جەڭىپ العانىنان, بيىل استانا قالاسىنا 100 ادامدىق قۇراممەن بارىپ, ەلوردالىقتاردىڭ قۇرمەت-قوشەمەتىنە بولەنىپ قايتقانىنان اڭعارۋعا بولادى.
قاشان كورسەڭ, قولىندا قاعاز-قالام. «مىنانى بىلاي ىستەسەك, مىنانى ويتسەك, بۇيتسەك», دەپ اقىلداستار القاسىمەن اڭگىمە-دۇكەن قۇرىپ وتىرعانى. باستاپقى ۇلگى, ەسكيز وزىنىكى. كەلىسە كەلىپ, ول ويلار وزگەرىپ جاتۋى دا مۇمكىن. ەڭ باستىسى – يدەيا بار. ءۇنسىز, تىم-تىرىس وتىرۋ جوق. يدەيا دەمەكشى, ەل كوسەمى ايگىلى ءاز تاۋكەنىڭ وزىنە سەرىك بولعان انەت باباعا, ءانشى جەرلەسىمىز مارقۇم جانىبەك كارمەنوۆكە دە اۋدان ورتالىعىنان ەسكەرتكىش سالدىرعان وسى ادام. باسقا جاقتان باس ۇرىپ, «اقشا سۇراعىش» ماماندار ىزدەمەي-اق, جەرگىلىكتى جەردەگى ءمۇسىنشى-ساۋلەتشى, سۋرەتشى جىگىتتەردى جانىنا جيناقتاپ, شاكارىم بابا ەسكەرتكىشىن سالۋعا دا كىرىسىپ كەتتى. قاراۋىلدىڭ باستى كوشەلەرىندەگى جول جيەگىندە تۇرعان ءارتۇرلى اڭداردىڭ اسەم مۇسىندەرى دە اكىم يدەياسىنان تۋعان شارۋالار.
قاراۋىل اۋىلىندا ەلدى مەكەن تاقياسىنا تار كەلەتىن شاعىن زاۋىت بار. كەشەگى كەڭەس ءداۋىرىنىڭ كەلمەسكە كەتەر تۇسىندا سالىنىپ, بىرەر جىلدىڭ شاماسىندا حالىققا قارا, قىزىل تون كيگىزىپ تە ۇلگەرگەن قازاق پەن تۇرىكتىڭ بۇل بىرلەسكەن زاۋىتى «دەريكار» اتالاتىن. امال نە, جاپپاي جەكەشەلەندىرۋ كەزىندە ول دا قولدى بولا جازداپ, ەل ازاماتى تاسبولات بيتەنوۆتىڭ تاباندىلىعىنىڭ ارقاسىندا قاز-قالپىندا ساقتالىپ قالعان بولاتىن. اكىم بولىپ سايلانعاننىڭ ەرتەسىندە-اق سونى ارالاپ كورگەن تۇرسىنعازى جانتۇياق ۇلى بىردەن شەشىمگە كەلدى. «جۇمىس ىستەتۋ كەرەك.
تۇرسىنعازى مالدى اۋداننىڭ جاعدايىن جاقسى بىلەدى. سوناۋ ءبىر كەزدەردە تاسكەسكەن اۋدانىنىڭ اكىمى بولىپ تۇرعان شاعىندا قويدان وندىرىلەتىن ءونىمدى, اسىرەسە, ءجۇندى كادەگە جاراتۋ ىسىمەن قاتتى اينالىسقان. اباي اۋدانىنىڭ شارۋاشىلىقتارىنداعى جۇن جەتىپ ارتىلادى. ءوتكىزەتىن جەرى, ساقتايتىن ورنى بولماعاندىقتان, شارۋا قوجالىقتارى قىرۋار بايلىقتى قورالاردىڭ تەسىگىن بىتەۋگە جۇمساپ, قايرانسىزدىقتىڭ قامىتىن كيىپ جاتقان. اكىم زاۋىت يەسى, وبلىستىق ءماسليحاتتىڭ دەپۋتاتى تاسبولات بيتەنوۆپەن اقىلداسا وتىرىپ, جوعارى جاققا حات جولدادى. زاۋىتتىڭ بۇگىنى مەن كەلەشەگى جونىندە كەڭ كولەمدى ءىس-جوسپار جاساپ, سۋبۆەنتسيا سۇرادى. سونىڭ ناتيجەسىندە ومىرگە جاڭا ءبىر ءوندىرىس ورىنى كەلدى. وندا قويدان الىنعان ءجۇندى سۇرىپتاۋ, جۋىپ-كەپتىرۋ, تايلاۋ تەحنولوگياسىنىڭ بارلىق ءتارتىبى ساقتالعان. بولاشاقتا 100 كىسى جۇمىس ىستەي الاتىن تسەح پايدالانۋعا بەرىلدى. بۇگىندە وعان 35 ادام جۇمىسقا تارتىلعان. دايىندالعان ءجۇندى قىتاي, رەسەي سياقتى كورشىلەس ەلدەرگە ساتۋ ماسەلەسى دە قولعا الىنىپ جاتىر.
بىلاي قاراعان ادامعا وسىنىڭ ءبارى وپ-وڭاي شارۋا سياقتى. ال, تۇپتەپ كەلگەندە, قانشاما ەرىك-جىگەردى, تاباندىلىقتى تالاپ ەتەتىن جۇمىستار دەسەڭىزشى. حالىققا قىزمەت ەتۋدىڭ, سول ارقىلى ولارعا جاقىنداي ءبىلۋدىڭ ءبىر ۇلگىسى دە وسى شىعار...
بۇدان ءۇش-ءتورت جىل بۇرىن وبلىس اكىمى جۇلدەسى ءۇشىن بولىپ جاتاتىن وڭىرلىك سپارتاكيادادا اۋداننىڭ قۇراما كومانداسى قازاقشا كۇرەستەن, باسقا بارلىق سپورت تۇرىنەن ەڭ ارتتا قالىپ قالاتىن. بيىلعى جىلى اۋدان جاستارى ورتادان جوعارى ورىنعا كوتەرىلدى. نەبارى 15 مىڭ شاماسىندا عانا حالقى بار اۋدان ءۇشىن بۇل از كورسەتكىش ەمەس. ات سپورتىنان دا, جەڭىل اتلەتيكادان دا العا باسۋشىلىق بايقالادى. ابايلىق اتبەگى ازامات ايان جارىلعاپوۆتىڭ قىلقۇيرىقتارى قازىر وبلىس شاباندوزدارىن شاڭعا بوكتىرە باستادى. بۇل دا بولسا كوڭىل ءبولىپ, نازار اۋدارۋدىڭ ارقاسى.
راس, ابايلىق بالۋانداردىڭ اتاق-داڭقى بۇرىن دا, بۇگىندە بۇكىل الاشقا ايگىلى. ءبىر كەزدەرى قازاقشا كۇرەستەن ورتالىق ازيانىڭ چەمپيوندارى بولعان نىعىمان سادۋاقاسوۆ پەن ەكى دۇركىن رەسپۋبليكانىڭ تۇيە بالۋانى اتانعان ماعاۋ ورازبەكوۆتىڭ ءىزباسارلارى قازىر الەمدىك دەڭگەيدە ونەر كورسەتىپ ءجۇر. ءسوز جوق, بۇعان اۋدان اكىمىنىڭ تىكەلەي باسشىلىعىمەن جىل سايىن قاراۋىلدا قازاقشا كۇرەستەن وتكىزىلىپ جۇرگەن ماعاۋ ورازبەكوۆ پەن ماناربەك تاۋتانوۆتىڭ اتىنداعى وبلىستىق, رەسپۋبليكالىق جارىستاردىڭ جاساپ وتىرعان ىقپالى ەرەكشە. جاقىندا عانا ابايلىق بالۋان ايبەك نۇعىماروۆتىڭ «قازاقستان بارىسى» اتانۋى اباي ەلىندەگى سپورتتىق احۋالدىڭ جوعارى دارەجەدە ەكەندىگىن كورسەتسە كەرەك.
«اكىم بول, حالقىڭا جاقىن بول» دەگەن ءسوز وسىندايدان ايتىلعان شىعار. تۇرسىنعازى جانتۇياق ۇلىنىڭ رەسپۋبليكالىق اتتەستاتسيادان ويداعىداي وتۋىنە تىلەكتەس بولىپ, ءوتىپ كەلىپ, قايتا سايلانعاندا بۇكىل اۋدان جۇرتشىلىعى بولىپ قۋانىپ جاتۋىنىڭ سەبەبى دە وسىدان.
تولەگەن جانعاليەۆ,
قازاقستان جازۋشىلار وداعىنىڭ مۇشەسى.
شىعىس قازاقستان وبلىسى,
اباي اۋدانى,
قاراۋىل اۋىلى.
