اناستاسيانىڭ ەرىكتىلەر جوباسى جانۋارلاردى قورعاۋ سالاسىنا, ياعني تالدىقورعان قالاسىنداعى باقىلاۋسىز قالعان جانۋارلاردى زارارسىزداندىرۋعا باعىتتالعان.
ەرىكتىنىڭ ايتۋىنشا, قاڭعىباس جانۋارلار قالادا ءجيى كەزدەسەدى جانە تۇرعىندارعا بىرقاتار قيىندىق تۋدىرۋدا. اناستاسيا جەكە زەرتتەۋ جۇرگىزىپ, قالا اۋماعىندا جانۋارلار پانالايتىن ورتالىق تا جوق ەكەنىن انىقتادى. پروبلەمالىق ماسەلەلەر اشىق كۇيىندە قالىپ وتىر: ادامدارعا شابۋىل, اۋرۋ تاراتۋ, قالانىڭ قوقىستارمەن لاستانۋى جانە ەڭ ماڭىزدى ماسەلە – ونىڭ كوبەيۋى بولىپ وتىر.
– ادامگەرشىلىك تۇرعىسىنان ۇستالعان جانۋارلاردى تەك تىرشىلىك ەتۋ فاكتىسى ءۇشىن جويۋ ادەپكە جاتپايدى. شىنىندا دا, بۇل ماسەلەگە كوبىنە ادامدار وزدەرى كىنالى. ويتكەنى وزدەرى قولعا ۇيرەتكەن جانۋارلاردان باس تارتادى. سوندىقتان زارارسىزداندىرۋ ءۇيسىز جانۋارلارعا قاتىستى ەڭ ىزگىلىكتى ادىستەردىڭ ءبىرى بولىپ قالا بەرەدى, – دەدى اناستاسيا كورمۋشينا.
ارقاشان كومەك كورسەتۋ اناستاسيانىڭ ۇزاقمەرزىمدى داستۇرىنە اينالعان. ول نازارباەۆ زياتكەرلىك مەكتەبىنىڭ قابىرعاسىندا قامقورسىز قالعان جانۋارلاردى تاماقتاندىرۋعا باعىتتالعان ء«ۇمىت پاناسى» جوباسىن جاسادى. قازىرگى ۋاقىتتا مەكتەپ بەلسەندىلەرى «Zooclub» جانۋارلار قۇقىعىن قورعاۋشىلار قوعامدىق بىرلەستىگىمەن ىنتىماقتاسىپ, ءۇيسىز جانۋارلارعا يە تابۋعا, تاماقتاندىرۋعا, ستەندتەر سالۋعا, كۇتىم جاساۋعا كومەكتەسەدى. قازىر اناستاسيا زەرتتەۋىن جالعاستىرۋ ۇستىندە.
– مەنىڭ زارارسىزداندىرۋ جوبام باستالدى. بۇگىنگە دەيىن جەتى قاڭعىباس ءيتتى ەمدەدىك. وپەراتسيادان كەيىن جانۋارلارعا قامقورلىق جاسايمىز, ونىڭ كوپشىلىگى جاڭا يەلەرىن تاپتى. وسىنداي كىشكەنتاي, بىراق سەنىمدى قادامدارمەن ءبىز قوعامنىڭ نازارىن جانۋارلار پروبلەماسىنا اۋدارامىز دەپ ۇمىتتەنەمىن, – دەيدى زياتكەرلىك مەكتەپتىڭ وقۋشىسى.
تالدىقورعان
