بۇل – ەلەك وزەنىن تولتىرىپ تۇراتىن مولدىربۇلاق تۋرالى وسى جەردىڭ قارت كىسىلەرى جاقسى بىلەدى. كەزىندە سۋى ءمولدىر ءارى تۇششى, باستاۋىنان اتقىلاپ اعىپ, ءوز جىلعاسىمەن ەلەككە اعاتىن مولدىربۇلاقتى سوڭعى ون-ون بەس جىلدا جۇرت ۇمىتتى. ۇمىتقانى سونشالىقتى, بۇلاق ارناسى مەن اينالاسى ءشوپ-شالامنان, قوقىستان تازارتىلماعاسىن ول كومىلىپ, ءتىپتى توڭىرەگىنە تاۋ بولىپ ۇيىلگەن تۇرمىستىق قالدىق تا قاپتادى. ونىڭ ۇستىنە, بۇلاقتىڭ باستاۋىن قىسى-جازى تازالاپ تۇراتىن قارتتار قازىر بۇل ومىردە جوق.
اقتوبەلىك ۆەلوسپورتشىلار ءبىر ايدان بەرى وسى ماڭايدى قوقىستان تازارتىپ, مولدىربۇلاقتىڭ بىتەلىپ قالعان جىلعالارىن ارشۋدى باستاعان ەدى. سپورتشىلارعا جەكسەنبى كۇنى اقتوبە قالالىق اكىمدىگىنىڭ قىزمەتكەرلەرى دە قوسىلدى. ولار بالالارىمەن بىرگە وسى بۇلاقتىڭ ماڭايىن تۇگەل تازارتىپ, تازالانعان اۋماققا تال ەكتى. بۇل جولى بۇلاق كوزى ابدەن تازالانعان سوڭ جەر استىنا شىققان سۋ بىرتە-بىرتە كوتەرىلىپ, بۇرىنعى ارناسىن تاۋىپ اعا باستادى.
«بۇلاق سۋى لايلانىپ شىعىپ جاتىر. ازىرگە كوزى تۇگەل تازالانىپ بىتكەن جوق. ويتكەنى قاتتى لاستانعان. ەندى بۇلاق سۋى بىرتە-بىرتە تازاراتىن بولادى. تۇرعىندارىمىز تابيعاتقا جاناشىرلىقپەن قاراپ, قالا تازالىعىنا, تابيعاتتى ايالاۋعا ءمان بەرسە, اقتوبەنىڭ توڭىرەگىن بۇرىنعىسىنشا جاسىل جەلەكپەن كومكەرۋگە بولار ەدى», دەيدى قالا اكىمى اسحات شاحاروۆ.
وسى جەردەگى بەستاماق اۋىلىنىڭ تۇرعىندارى نەگە ەكەنى بەلگىسىز, مولدىربۇلاقتىڭ اينالاسىنا قوقىس توگىپ, قوراسىنان شىققان سيىر, قوي-ەشكىلەرى دە بەي-بەرەكەت جايىلىپ, وسى توڭىرەكتى لاستاپ كەتىپ جاتادى. اقتوبەلىك ۆەلوسپورتشى رومان شاريپوۆ بالا كۇنىندە وسى بۇلاقتىڭ سۋى ءمولدىر, ءارى تۇششى بولعانىن ايتادى. «قازىر بۇلاق كوزىنە اتالارىمىز ورناتقان ەسكى دوڭگەلەكتى اۋىستىرىپ, ونى بيىكتەتىپ, اينالاسىنا قورشاۋ ورناتۋدى ويلاستىرىپ وتىرمىز. ويتكەنى ءدال وسى كۇيدە قالدىرساق, بۇلاق كوزىن جۇرت تاعى دا بىتەپ تاستايدى, ءارى مال تۇياعىمەن تاپتايدى», دەيدى رومان شاريپوۆ.
كەىنگى جىلدارى اقتوبەنىڭ توڭىرەگىندەگى ەلەك, قارعالى وزەندەرىنىڭ سۋى مۇلدە ازايىپ, ارناسى تولماي ءجۇر. وزەن ارنالارىنىڭ ازايۋىنىڭ ءبىر سەبەبى – بۇلاق كوزدەرىنىڭ بىتەلۋىندە دەيدى گيدروگەولوگ ماماندار. ەكىنشى جاعىنان, وسى سۋ ارنالارىنا جاقىن جەردەن بەيبەرەكەت قۇم الاتىن كارەرلەردىڭ كوبەيۋىنەن دە بۇلاق كوزدەرى جابىلىپ قالعان.
