«تۋعان ەل – التىن بەسىگىم!» جانە «تۋعان جەرگە – تاعزىم!» اكتسيالارىنىڭ بەس جىلدىعى كەندى التايدا كەڭ كولەمدە اتالىپ ءوتتى.
ءوڭىر باسشىسى بەردىبەك ساپارباەۆتىڭ باستاماسىمەن دۇنيەگە كەلگەن «تۋعان ەل – التىن بەسىگىم!» جانە «تۋعان جەرگە – تاعزىم!» اكتسيالارى ءبىر ماقساتتان تۋعان ەكى شارانى كوزدەيدى.
.«تۋعان ەل – التىن بەسىگىم!» جانە «تۋعان جەرگە – تاعزىم!» اكتسيالارىنىڭ بەس جىلدىعى كەندى التايدا كەڭ كولەمدە اتالىپ ءوتتى.
ءوڭىر باسشىسى بەردىبەك ساپارباەۆتىڭ باستاماسىمەن دۇنيەگە كەلگەن «تۋعان ەل – التىن بەسىگىم!» جانە «تۋعان جەرگە – تاعزىم!» اكتسيالارى ءبىر ماقساتتان تۋعان ەكى شارانى كوزدەيدى. ءبىرىنشىسى – كىندىك قانى تامعان ولكەدە ءبىلىم الىپ, وزدەرىنىڭ ىسكەرلىگى مەن تالاپ-جىگەرلەرى ارقاسىندا كاسىپكەرلىكتى مەڭگەرگەن, كەيىننەن باقۋاتتى ادامدار قاتارىنا قوسىلعان سوڭ تاپقان تابىسىنىڭ ءبىر بولىگىن تۋعان جەرلەرىنە ارناعىسى كەلەتىن ازاماتتاردى ىزدەستىرۋ, سولار ارقىلى يگىلىكتى ىستەرگە جول اشۋ. ەكىنشىسى – ونەر مەن مادەنيەت, ادەبيەت پەن عىلىم سالاسىندا اتى شىعىپ, ەل مەرەيىن اسىرعان زيالى قاۋىم وكىلدەرىن جاستار تاربيەسىنە جۇمىلدىرۋ. مىنە, وسىنداي ونەگەلى اكتسيا ناتيجەسىندە بەس جىل ىشىندە وڭىردە 300-دەن استام مادەنيەت عيماراتتارى جوندەلىپ, 4 ميلليارد تەڭگەنىڭ ونىمدەرى جارمەڭكەلەردە ساۋدالانعان. ال وڭىردەن شىققان تانىمال تۇلعالار 20 ميلليارد تەڭگە ءوز قارجىلارىنا بالاباقشا, سپورت كەشەندەرىن, قوناقۇي, باسقا دا الەۋمەتتىك عيماراتتاردى سالىپ بەرىپتى.
وتكەن سەنبىدە جارما اۋدانىنىڭ ورتالىعى قالباتاۋدا قوس اكتسيانىڭ 5 جىلدىعى كەڭ كولەمدە اتالىپ ءوتتى. ەڭ الدىمەن وبلىس اكىمى ب.ساپارباەۆ باستاعان توپ شالعايدا جاتقان جارىق اۋىلىنا كەلدى. بۇل جەردە ءوڭىر باسشىسىن اتاقتى بالۋان داۋلەت تۇرلىقانوۆ, جارما اۋدانىنىڭ اكىمى انۋاربەك مۇقتارحانوۆ, اۋىل اقساقالدارى مەن تۇرعىندارى قارسى الدى. داۋلەت بولات ۇلى اۋىلدىڭ 220 ادامىن جۇمىسپەن قامتاماسىز ەتىپ وتىر. وسى جولى جەرلەستەرىنە ەكى كومباين, ەكى تراكتوردى سىيعا تارتتى.
– ەلباسىنىڭ قازاقستان حالقىنا جولداۋىندا وتاندىق ءوندىرىستى دامىتۋ مىندەتى قويىلعانى بەلگىلى. بەردىبەك ماشبەك ۇلىنىڭ باستاماسىنا ءۇن قوسىپ جارىق اۋىلىندا قۇنى 35 ميلليون تەڭگە بولاتىن تويحانانى سالىپ بەردىم. ول بۇگىن اشىلماق. اۋىل تۇرعىندارى بيىل 4 مىڭ گەكتارعا ارپا, بيداي ەگىپ, گەكتارىنان 15 تسەنتنەردەن التىن ءدان جيناپ الدى. امانشىلىق بولسا, وراقتا ەرەكشە كوزگە تۇسكەن ۇزدىكتەر بۇگىن ماراپاتتالماق. اۋدان ورتالىعى قالباتاۋدا 280 ميلليون تەڭگەگە ءوز قارجىما سپورت جانە دەنساۋلىق كەشەنى قۇرىلىسىن باستادىم. ول كەلەر جىلى پايدالانۋعا بەرىلمەك. كىندىك قانىم تامعان ولكەدەن ءوزىمنىڭ ءىزباسارلارىم شىعىپ جاتسا, ەلدىڭ ابىرويى ەمەس پە, – دەيدى الەم, ەۋروپا چەمپيونى, قوس وليمپيادا ويىندارىنىڭ جۇلدەگەرى داۋلەت تۇرلىقانوۆ جۇرتشىلىقپەن كەزدەسۋدە. بۇدان كەيىن ءوڭىر باسشىسى بەردىبەك ماشبەك ۇلى «تۋعان ەل – التىن بەسىگىم!» اكتسياسىنىڭ ءمانى مەن ماعىناسى جايلى ايتا كەلىپ, داۋلەت تۇرلىقانوۆتىڭ ءوز جەتىستىكتەرىن جەرلەستەرى يگىلىگىنە ارناپ وتىرعانىن تىلگە تيەك ەتتى. قوس ازامات سايات پەن جۇمادىلگە جاڭا تراكتوردىڭ كىلتىن تابىس ەتىپ, بيىك بەلەستەردى باعىندىرا بەرۋىنە ساتتىلىك تىلەدى.
تۇسكە دەيىن جارىق اۋىلىندا «جۇمىسپەن قامتۋ-2020» باعدارلاماسى بويىنشا ىسكە قوسىلعان ءدارىحانانىڭ, «بەكزات» ساۋدا ءۇيىنىڭ سالتاناتتى اشىلۋى بولىپ ءوتتى. شاعىن اۋىلدا ءدارىحانانىڭ اشىلۋى كوپشىلىكتى قۋانتىپ تاستادى. بەكزات مۇقاەۆ دەگەن ازامات 3,5 ميلليون تەڭگە نەسيە الىپ ءدارىحانانى ىسكە قوسقان. ءوڭىر باسشىسى دارىلەردىڭ شىعارىلعان ۋاقىتىن كورىپ, مەرزىمى ءوتىپ كەتكەن ءدارى-دارمەكتىڭ قاۋىپتى ەكەنىن, ساتىپ العان كەزدە ساق بولۋى قاجەتتىگىن ەسكەرتتى.
ارشالى اۋىلى وسكەمەننەن 200 شاقىرىم, الماتىدان 890 شاقىرىم شالعايدا جاتىر. التايدىڭ قاقاعان قىسى مەن اقتۇتەك بورانىندا جولدا قالعان جولاۋشىلار قايدا پانالايدى؟ مىنە, وسى پروبلەمانى شەشۋگە سەمەيدىڭ ىسكەر ازاماتى سەرىكبوسىن بەيسەنباەۆ بەلسەنە ارالاسقان ەكەن. ارشالى اۋىلىنىڭ ماڭىندا, جول جيەگىندە, تابيعاتى كوز تارتاتىن تاۋ بەتكەيىندە «مارالدى» كەمپينگىن 80 ميلليون تەڭگە ءوز قارجىسىنا تۇرعىزىپتى. كەمپينگتە جايلى, جيھازدارى كوز تارتاتىن 10 بولمە, قوعامدىق تاماقتاندىرۋ, كولىك جوندەۋ ستانساسى بار.
– ارشالى اۋىلىنىڭ تۇرعىندارىن قۋانىشتارىمەن قۇتتىقتايمىن. وڭىردە ءتۋريزمدى دامىتۋ ءۇشىن وسىنداي عيماراتتاردى كوپ سالۋ كەرەك. قىستا جولاۋشىلار جولدا قالىپ قويسا وسىندا كەلىپ پانالايدى. 150 ورىندىق اسحانا, قوناقۇي ارقاشان ءازىر. بولمەلەردە ىستىق سۋ, دۋش بار. سەرىكبوسىن قونىسبەك ۇلىنىڭ «تۋعان جەرگە – تاعزىم!» اكتسياسىنا ءۇن قوسىپ, جەرلەستەرىن قۋانتقانى, 15 ادامعا جۇمىس تاۋىپ بەرۋى ۇيرەنەتىن ءۇردىس, دەدى بەردىبەك ماشبەك ۇلى كەمپينگتىڭ اشىلۋى سالتاناتىندا.
اۋدان اكىمدىگىنىڭ ءماجىلىس زالىندا وتكەن وبلىس ونەرپازدارىمەن كەزدەسۋىندە ءوڭىر باسشىسى مادەنيەت پەن ونەردى دامىتۋعا لايىقتى ۇلەس قوسىپ جۇرگەندەردى ماراپاتتادى, باعالى سىيلىقتاردى تابىس ەتتى. ايتا كەتۋ كەرەك, مۇنىڭ الدىندا مادەنيەت ۇيىندە وبلىس اكىمىنىڭ ورىنباسارى جاقسىلىق ومار ءارتۇرلى نوميناتسيا بويىنشا توپ جارعاندارعا قۇرمەت كورسەتكەن بولاتىن.
اۋدان ورتالىعى قالباتاۋ اۋىلى كوركەيىپ, كەلبەتىمەن كوپشىلىكتى سۇيسىندىرۋدە. كوشەلەردىڭ بارلىعىنا اسفالت توسەلگەن, باتىرلار اللەياسى الىستان مەن مۇندالايدى, ءدامحانالار مەن مەيرامحانالار, دۇكەندەرگە سان جەتپەيدى. انۋاربەك مۋحتارحانوۆ باسقاراتىن بۇل اۋداندا شاعىن جانە ورتا كاسىپكەرلىككە قاتتى كوڭىل بولىنەتىندىگى انىق اڭعارىلادى. كۇردەلى جوندەۋدەن وتكەن مادەنيەت ءۇيى كىرسە شىققىسىز. اۋداننىڭ مادەنيەت سالاسىن باسقاراتىن ونەر جاناشىرى, «قۇرمەت» وردەندى امانجول ءداۋىتوۆتىڭ جەتەكشىلىگىمەن ونەرپازدار رەسپۋبليكالىق جانە حالىقارالىق بايقاۋلاردا سان رەت توپ جارعان. جاڭادان بوي كوتەرگەن ورتالىق الاڭعا اۋداندىق بيۋدجەتتەن 30 ميلليون تەڭگە ءبولىنىپ, ونىڭ قۇرىلىسى ادەمى ەتىپ سالىنىپتى. ءار اۋداننان كەلگەن وكىلدەر وسىنداعى دوستىق اللەياسىنا اعاش كوشەتتەرىن وتىرعىزدى. وبلىس اكىمى اۋدان جانە قالالاردى, «تۋعان ەل – التىن بەسىگىم!» اكتسياسىنىڭ قورىتىندىسىندا سۋىرىلىپ العا شىققانداردى ءارتۇرلى نوميناتسيا بويىنشا ماراپاتتادى. بۇدان كەيىن «قولجەتىمدى تۇرعىن ءۇي-2020», «جۇمىسپەن قامتۋ-2020» باعدارلامالارى بويىنشا سالىنعان 5 ەكى پاتەرلى جانە 10 تۇرعىن ءۇيدىڭ كىلتىن تۇرمىسى ناشار جاندارعا, جاس وتباسىلارعا تاپسىردى. سوڭعىسىنا رەسپۋبليكالىق بيۋدجەت 70 ميلليون, ال العاشقىسىنا جەرگىلىكتى بيۋدجەتتەن 106,5 ميلليون تەڭگە قارجى ءبولىنىپتى. تۇرعىن ۇيلەر ساپالى سالىنعان.
كەشكىلىك اۋداندىق مادەنيەت ۇيىندە «تۋعان ەل – التىن بەسىگىم!» اكتسياسىنىڭ قورىتىندى گالا كونتسەرتى بولىپ, مەرەكەلىك وتشاشۋ قالباتاۋ اۋىلىن ارايعا بولەپ تاستادى. اۋىل تۇرعىندارى ءتۇننىڭ ءبىر ۋاعىنا دەيىن بي بيلەپ, ولەڭ ايتىپ, كوڭىل كوتەردى. «تۋعان ەل – التىن بەسىگىم!», «تۋعان جەرگە – تاعزىم!» اكتسيالارىنىڭ تاربيەلىك ءمانى بار ەكەنىنە كوپشىلىكتىڭ كوزى جەتتى. الداعى ۋاقىتتا شىرايلى شىعىستا ومىرشەڭ باستاما جالعاسا بەرمەك.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى,
جارما اۋدانى.
سۋرەتتى تۇسىرگەن اۆتور.
