بۇل ءان – جاستىق شاقتىڭ سالەمى. ءسىزدى باياعى البىرت كۇننىڭ اسپانىنا قايتا ەرتىپ اپارادى. وتكەن عاسىردىڭ ەستەلىگىن ماڭعاز شولىپ وتىرىپ, سارعايعان گرامموفونعا جايعاسقان ەسكى پلاستينكادان ءوزىڭىزدىڭ باياعى داۋىسىڭىزدى ەستيسىز. كۇيتاباقتا ويناعان تانىس ءھام بەيتانىس مۋزىكادان ارمانعا تولى كوكتەمنىڭ جۇپار لەبى ەسەدى. سۇلۋدى سۇيەم دەۋگە باتا الماي, ەڭ شەشۋشى ساتتە ءتىلىڭدى تىستەپ تۇرىپ قالعان اڭعال كەيپىڭ, اقجۇرەك كوڭىلىڭ ءبارى-ءبارى ءبىر-بىرىمەن بايلانىسىپ, جۇرەگىڭدى تولقىتادى. بويجەتكەندى بي كەشىنە شاقىرىپ الىپ, بيلەي الماي كەتكەن جىگىتتىڭ كۇيىنە تۇسەسىز. جان قالتاڭىزدان تۇسپەيتىن عاشىقتىق حاتتى يەسىنە بەرۋگە وقتالعان مەزەتتە, تارتپاڭىزدا تارس ۇمىتىپ كەتكەنىڭىز دە ويىڭىزعا ورالادى. سول كۇنى كوزىنە تىك قاراۋعا باتا الماي, ۇرلانا قاراعانىڭىز. وسىلاي اۋەزدى اۋەننىڭ ىرعاعىنا بالقىپ وتىرىپ, ۇمىت قالعان ءسارۋار ساتتەردى كينولەنتاداي قايتا ءبىر شولىپ وتەسىز.
الەمدى وزىنە ەلىتكەن ءاننىڭ قۇدىرەتتىلىگى. «Bésame mucho» – «بەسامە مۋچو». تورتكىل دۇنيەنى باۋراپ الاتىنداي بۇل تۋىندىنىڭ نەندەي قاسيەتى بار دەيسىز عوي. شارتاراپتى شىر اينالعان كومپوزيتسيانىڭ شىعۋ تاريحى ءتىپتى قىزىق. سەنسەڭىز, ء«سۇي مەنى» دەپ جىرلاعان مەكسيكالىق قىز كونسەلو ۆەلاسكەس سول كەزدە ءالى ءسۇيىسىپ تە كورمەگەن ەكەن. ماحابباتقا وسىنشاما ءمان بەرگەنى سودان دا بولار. ارۋ قىز كاتوليكتىك موناستىر مەكتەبىن بىتىرگەن بەتتە, بارلىق بوس ۋاقىتىن تەك شىعارماشىلىعىنا ارنايدى. اۆتور يسپان كومپوزيتورى ەنريكە گرانادوستىڭ فورتەپيانودا ويناعان پەساسىن تىڭداپ, قاتتى اسەرلەنەدى. سول سۇمدىق اسەردەن ارىلا الماي 1940 جىلى ءوزىنىڭ 20 جاسقا تولعان تۋعان كۇنىندە جاڭا ءان ومىرگە كەلەدى. ەڭ عاجابى, اتالعان تۋىندى ەكىنشى دۇنيەجۇزىلىك سوعىس كەزىندە وتە تانىمال بولىپ, ەرىن مايدانعا اتتاندىرعان قىز-كەلىنشەكتەرگە كۇش-قۋات سىيلاعان ەكەن. ولار وسى ءاندى قايىرا قوسىپ, سۇيگەندەرىن ۇزاق ساپاردان سارىلا كۇتكەن كورىنەدى.
ءاننىڭ اتاۋى نەگىزگى مازمۇنىن ساقتاي وتىرىپ, ءار تىلدە ءارتۇرلى اۋدارىلعان. ءبىز «شەكسىز ءسۇي مەنى» دەپ اتادىق. مۋزىكا سىنشىلارى XX عاسىردا ەڭ كوپ ورىندالعان ەكى ءان بولسا, سونىڭ ءبىرى «Bésame mucho» ەكەنىن جازىپ تا, ايتىپ تا ءجۇر. ولاي دەمەسى بار ما؟ الەمنىڭ 20 تىلىندە ورىندالعان ءاننىڭ ءالى ءومىر ساحناسىنان تۇسپەگەنى ونىڭ اسقاقتىعىنان حابار بەرەتىندەي.
ءان جارىققا شىققان سوڭ كونسەلو ۆەلاسكەس اۋەنى مەن ءماتىنىن بىرىكتىرىپ, ءوزى تۋىپ-وسكەن گۆادالاحارا قالاسىنداعى راديوعا جىبەرەدى. تىڭدارماندار تۋىندىنى بىردەن جىلى قابىلداپ, اۆتوردى راديوستانساعا ماراپاتتاۋ ءۇشىن شاقىرادى. ايتسە دە تۋمىسىنان وتە ۇياڭ قىز سىيلىقتى الۋعا قۇربىسىن جىبەرەدى. ونىڭ بۇل ارەكەتىنە كاتوليكتىك تاربيەسى سەبەپشى بولسا كەرەك. باسىندا ەلدىڭ ءبارى ءاننىڭ يەسى قۇربىسى ەكەن دەپ جۇرگەنىمەن, ارتىنان شىندىق اشىلادى.
ءيا, مەكسيكا ۇلتتىق كونسەرۆاتورياسى تۇلەگىنىڭ يسپان تىلىندە جازىلعان ليريكاسى لاتىن امەريكاسىن اتتاپ ءوتىپ, دۇنيەنى تامساندىرارىنا و باستا ەشكىم سەنبەپتى. بىراق, ۋاقىت ۇلى شىعارمانى ءوز بيىگىنە كوتەرىپ, ءداۋىر الماسسا دا قوعام جادىنا ماڭگى قۇيدى.
ءاننىڭ تۇڭعىش ورىنداۋشىسى ەميليو تۋەرو ەدى. «بەسامە مۋچونىڭ» العاشقى جازباسىنان ونىڭ داۋىسى ەستىلەدى. الايدا كۋبالىق بولەرو جانرىندا جازىلعان كومپوزيتسيا چيليلىك ءانشى لۋچو گاتيكانىڭ رەپەرتۋارىنا ەنگەن كەزدە شىنىمەن تانىمال بولا باستادى. 1944 جىلى امەريكالىق ءانشى دجيممي دورسي ورىنداپ, اقش-تا حيتكە اينالدىردى. ءاربىر ءانشى ءوزىنىڭ داۋىس دياپازونىنا سايكەس ءارتۇرلى ستيلدە ورىندادى. ماسەلەن وسى تۇستا پلاسيدو دومينگو, اندرەا بوچەللي, حوسە كاررەراس سىندى ونەر تارلاندارىن تۇستەپ كەتپەسەك بولمايتىنداي. ول ول ما ايگىلى «The Beatles» توبى كونتسەرتتەرىندە جاندى داۋىستا ورىنداپ, ءتىپتى تۇرلەندىرىپ اكەتتى. سول زاماندا رومانتيكتىڭ وبرازىن سومداعان ەلۆيس پرەسلي مەن انگە سيقىرلى سەزىم رەڭكىن بەرگەن فرەنك سيناترانىڭ ورىنداۋىندا ەل ەسىندە ماڭگىگە ساقتالدى.
كوپ ۇزاماي اتالعان كومپوزيتسيا ء«ۇش اتتى» ديسنەي انيماتسيالىق ءفيلمىنىڭ ساۋندترەگىنە اينالدى. ودان كەيىن 1980 جىلى «ماسكەۋ كوز جاسىنا سەنبەيدى» كينوكارتيناسىندا تىڭدارماندارمەن قايتا قاۋىشىپ, كەڭەس يدەولوگياسىنىڭ كادەسىنە جارادى. مەكسيكالىق لوس پانچوس توبىنىڭ نۇسقاسىندا جول تارتقان تۋىندى, قازاق دالاسىندا دا ءوز قولتاڭباسىن قالدىرىپ كەتكەن ەدى.
ءومىرىنىڭ سوڭىنان دەيىن كومپوزيتور كونسەلو ۆەلاسكەس ءاننىڭ نەلىكتەن قوعام ساناسىندا ءدۇمپۋ تۋعىزعانىن تۇسىندەرە الماي كەتتى. تەك الدەبىر سۇحباتىندا, ءاننىڭ قۇبىلىسى تۋرالى «ورىنسىز تىلەكتىڭ اۋەندەگى كورىنىسى» دەپ, جۇرەكجاردى ءسوزىن ايتقان ەكەن. سودان كەيىن جاسامپاز ءان جالىندى ماحابباتتىڭ سيمۆولى رەتىندە بي كەشتەرىندە ءجيى شىرقالدى. «Bésame mucho» ءبيى – بۇرىمدىنىڭ بوزبالاعا ايتا الماي كەتكەن عاشىقتىق سەزىمىنىڭ قويىلىمى ىسپەتتى. قيسىنسىز قىز تىلەگىنىڭ قيمىلعا ۇلاسۋى قانداي عاجاپ دەرسىز. تاعى ءبىر تىڭداڭىزشى!
