استانا مەن وتتاۆا اراسىنداعى ءتۇرلى باعىتتارداعى ىنتىماقتاستىقتى تەرەڭدەتۋگە سەرپىن قوسادى دەگەن سەنىم بار
قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ استاناعا رەسمي ساپارمەن كەلگەن كانادالىق ارىپتەسى دجون بەردپەن كەزدەسۋ وتكىزدى. بۇل كانادا سىرتقى ساياسات ۆەدومستۆوسى باسشىسىنىڭ قازاقستانعا ەكى ەل اراسىندا ديپلوماتيالىق قارىم-قاتىناس ورناعان 1992 جىلدان بەرگى العاشقى رەسمي ساپارى بولىپ تابىلادى.
استانا مەن وتتاۆا اراسىنداعى ءتۇرلى باعىتتارداعى ىنتىماقتاستىقتى تەرەڭدەتۋگە سەرپىن قوسادى دەگەن سەنىم بار
قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ استاناعا رەسمي ساپارمەن كەلگەن كانادالىق ارىپتەسى دجون بەردپەن كەزدەسۋ وتكىزدى. بۇل كانادا سىرتقى ساياسات ۆەدومستۆوسى باسشىسىنىڭ قازاقستانعا ەكى ەل اراسىندا ديپلوماتيالىق قارىم-قاتىناس ورناعان 1992 جىلدان بەرگى العاشقى رەسمي ساپارى بولىپ تابىلادى.
كەزدەسۋ بارىسىندا ەكىجاقتى ساياسي جانە ساۋدا-ەكونوميكالىق ىنتىماقتاستىقتىڭ كەڭ اۋقىمى تالقىلاندى. بۇل باعىتتاعى ىنتىماقتاستىق قازاقستان-كانادا قارىم-قاتىناسىنىڭ «لوكوموتيۆى» بولىپ تابىلادى. ە.ىدىرىسوۆ كانادا تمد, شىعىس جانە ورتالىق ەۋروپا ەلدەرى اراسىندا قازاقستاننىڭ باستى ساۋدا ارىپتەسى ەكەنىن اتاپ ءوتتى. بۇل ورايدا قازاقستان دا كانادا ءۇشىن سولتۇستىك, ورتالىق جانە وڭتۇستىك امەريكا مەملەكەتتەرى اراسىندا جەتەكشى ارىپتەس بولىپ سانالادى. 2012 جىلى ەكىجاقتى ساۋدا-ساتتىق كولەمى 3,3 ملرد. اقش دوللارىن قۇراسا, ۇستىمىزدەگى جىلدىڭ قاڭتار-قىركۇيەك ايلارى ارالىعىندا ءوزارا ساۋدا كولەمى 2 ملرد. دوللارعا جۋىقتاعان.
ەكى ەلدىڭ ينۆەستيتسيالىق ارىپتەستىگى كەلىسسوزدىڭ ماڭىزدى تاقىرىبىنا اينالدى. تاراپتار اتالعان سالاداعى ىنتىماقتاستىقتى ءارى قاراي تەرەڭدەتە بەرۋدىڭ ەكى جاققا دا ءتيىمدى ەكەنىن اتاپ كورسەتتى. قازاقستان ۇلتتىق بانكىنىڭ دەرەكتەرىنە قاراعاندا, كانادانىڭ 1993 جىلدان بەرى قارايعى قازاقستانعا سالعان تىكەلەي ينۆەستيتسياسىنىڭ كولەمى 6 ملرد. دوللاردان اسىپ تۇسكەن. بۇل 9-شى ورىن دەگەندى بىلدىرەدى. 2012 جىلدىڭ قورىتىندىسى بويىنشا, كانادا نيدەرلاندىمەن, قىتايمەن, شۆەيتساريامەن, اقش-پەن, بەلگيامەن جانە فرانتسيامەن بىرگە قازاقستاننىڭ ەكونوميكاسىنا مول قارجى سالعان جەتەكشى ينۆەستورلار قاتارىنا ەنگەن. كانادانىڭ بىلتىرعى ينۆەستيتسياسى 743 ملن. دوللاردى قۇراپ وتىر. كانادا ينۆەستيتسياسىنىڭ نەگىزگى اعىنى قازاقستاننىڭ مۇناي-گاز سەكتورى مەن ۋران وندىرىسىنە باعىتتالىپتى.
سۇحباتتاستار, سونداي-اق, اۋىل شارۋاشىلىعى مەن اگروونەركاسىپ كەشەنى سالالارىنداعى ىنتىماقتاستىق ماسەلەلەرىن دە تالقىلادى. ويتكەنى, بۇلار ەكىجاقتى قارىم-قاتىناستىڭ ماڭىزدى باعىتتارى بولىپ تابىلادى. كانادانىڭ اۋىل شارۋاشىلىعى تەحنيكالارى مەن قۇرال-جابدىقتارى قازاقستاندا سۇرانىسقا يە. ال كانادا ءۇشىن قازاقستان – اۋىل شارۋاشىلىعى مەن استىق قۇرال-جابدىقتارى رىنوگىنداعى اسا ءىرى ەكسپورتشىنىڭ ءبىرى.
كەزدەسۋدە جوعارىدا اتالعان ماسەلەلەرمەن قاتار, يادرولىق قارۋدى تاراتپاۋ سالاسىنداعى ىنتىماقتاستىق, ءبىلىم بەرۋ, سونداي-اق, قازاقستان ازاماتتارى ءۇشىن ۆيزالىق رەجىمدى جەڭىلدەتۋ ماسەلەلەرى تالقىلاندى.
دجون بەرد ەكەۋارا كەزدەسۋدەن كەيىن بۇقارالىق اقپارات قۇرالدارى وكىلدەرىنىڭ الدىندا قىسقاشا پىكىرىمەن ءبولىستى. ول مەملەكەت باسشىسى نۇرسۇلتان نازارباەۆتىڭ يادرولىق قارۋدى تاراتپاۋ سالاسىنداعى كوشباسشىلىعىن جوعارى باعالايتىنىن مالىمدەدى. ونىڭ اتاپ وتۋىنشە, قازاقستان مەن كانادانىڭ ينۆەستيتسيالىق ىنتىماقتاستىعى وتە ۇلكەن الەۋەتكە يە جانە كانادا ءبىزدىڭ ەلىمىزدى بۇكىل ورتالىق ازياداعى ينۆەستيتسيالىق قىزمەتى ءۇشىن تۇعىرناما رەتىندە قاراستىرادى.
ساپار اياسىندا دجون بەرد قازاقستان پرەمەر-ءمينيسترىنىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆپەن ەكى ەل ۇكىمەتتەرى اراسىنداعى اتوم ەنەرگياسىن بەيبىت ماقساتتا پايدالانۋ سالاسىنداعى ىنتىماقتاستىق تۋرالى كەلىسىمگە قول قويدى. بۇل قۇجات ەكىجاقتى ءتيىمدى ىنتاماقتاستىقتى تەرەڭدەتۋگە قاجەتتى قۇقىقتىق نەگىز قالاۋدى قامتاماسىز ەتەدى جانە كانادانىڭ جاڭا تەحنولوگيالارى مەن جەتەكشى تاجىريبەسىن ەلىمىزدە ەنگىزۋگە جول اشاتىن بولادى دەپ كۇتىلۋدە.
«ەگەمەن-اقپارات».
