«قازاقستاننىڭ ەكولوگيالىق ۇيىمدارىنىڭ قاۋىمداستىعى» توراعاسىنىڭ ورىنباسارى ەلدوس اباقانوۆتىڭ ايتۋىنشا, كليماتتاعى وزگەرىستىڭ زيانى بولادى. ونىڭ الدىن الۋ ءۇشىن بىرقاتار شارۋالاردى تىندىرۋ كەرەك.
– بىرىنشىدەن, ءبىزدىڭ ەلدە جاڭا ەكولوگيالىق كودەكس ازىرلەنىپ جاتىر. ءوز باسىم كليماتتىڭ وزگەرۋ سالدارىن بەيىمدەۋ جانە جۇمسارتۋ جونىندەگى شارالاردى ەسكەرۋ كەرەك دەپ ەسەپتەيمىن. سونىمەن قاتار وعان تومەن كومىرتەكتى جوبالاردى دا قوسۋ قاجەت. بۇل دەگەنىمىز – قوعامدىق كولىكتى گازداندىرۋ جانە ەلەكتروموبيلدەرگە ارنالعان ينفراقۇرىلىمدى دامىتۋ, سۋ ۇنەمدەۋ تەحنولوگيالارى مەن كۇن كوللەكتورلارىن پايدالانۋ. وسى باعىتتا جۇمىس ىستەيتىن ورتالىقتاردى دامىتۋ قاجەت. سونداي-اق وسى تەحنولوگيالاردىڭ تەحنيكالىق قۇرامىن قاراستىرۋ كەرەك. كومىرتەك سالىقتارى جەكە ماسەلە بولىپ تابىلادى. ويتكەنى بولاشاقتا ءبىزدىڭ ەكسپورتقا باعدارلانعان بيزنەسىمىز سالىق سالۋ پروبلەماسىنا تاپ بولۋى مۇمكىن, – دەدى ول.
وسى ورايدا «جاسىل ەكونوميكا» تۇجىرىمداماسىن قايتا قاراۋ كەرەك پە؟» دەگەن زاڭدى ساۋال تۋىندايدى.
– وكىنىشكە قاراي, «جاسىل ەكونوميكانى دامىتۋ» اياسىندا ءبىز وڭىرلەر تۇرعىسىنان سارالانعان ءتاسىلدى كورىپ وتىرعان جوقپىز. «جاسىل ەكونوميكاعا» كوشۋ, ەنەرگيا ۇنەمدەۋ, ورگانيكالىق سەكتور بويىنشا ينديكاتورلارعا قول جەتكىزۋ ءۇشىن وڭىرلەردى قامتۋ كەرەك. ازىرشە وڭىرلىك ەرەكشەلىكتەر ەسكەرىلمەي وتىر. ەكونوميكالىق تەتىكتەرگە بايلانىستى ناقتى ينديكاتورلار قاجەت, – دەدى ە.اباقانوۆ.
قاۋىمداستىق توراعاسى ورىنباسارىنىڭ ايتۋىنشا, قازىر حالىقارالىق ۇيىمدار قانداي دا ءبىر قاناتقاقتى جوبالاردى ىسكە اسىرۋدا ۇكىمەتتىك ەمەس سەكتورعا ءتۇرلى گرانتتار بولۋدە.
– ماسەلەن, ءبىز جەل ەنەرگەتيكالىق قوندىرعىلارىنىڭ ونىمدەرىن جۇزەگە اسىرۋ اياسىندا وسىنداي جوبالاردىڭ بىرىنە قاتىسامىز. وڭىرلەردى ارالاپ, جوبالاردى جۇزەگە اسىرۋعا مۇمكىندىك بارىن بايقادىق. ناقتى ساندار مەن تاسىلدەردى ۇسىناتىنداردى انىقتاۋ قاجەت. قوعامنىڭ ءرولى وسىدان كورىنىس تابادى, – دەدى ول.
