وسى جىلدىڭ 11 قازانىندا بۋراباي اۋدانىنىڭ پوليتسيا بولىمىنە ششۋچە قالاسىنىڭ تۇرعىنى وتىنىشپەن جۇگىنگەن. ول ءوزىنىڭ Kaspi Gold كارتاسىندا اقشا قاراجاتىنىڭ جوعالعانىن انىقتاعان. ۇيالى تەلەفونىندا Kaspi.kz قوسىمشاسى ورناتىلعان. كارتاسىنان 40 مىڭ تەڭگە اقشا قاراجاتى اۋدارىلعان. جەدەل-ىزدەستىرۋ ءىس-شارالارى بارىسىندا بۋراباي اۋدانىنىڭ كريمينالدىق پوليتسيا قىزمەتكەرلەرى ششۋچينسك قالاسىنىڭ 25 جاستاعى تۇرعىنى – ەر ادامدى انىقتاپ, ۇستادى. ول ششۋچينسك قالاسىندا پاتەردە, ءوزىنىڭ تانىسى پاتەر يەسىنىڭ سالعىرتتىعىن پايدالانىپ, ونىڭ تەلەفونىنا قانداي پورول تەرگەنىن كورىپ, وندا ورنالاسقان قوسىمشا ارقىلى ءوزىنىڭ شەشەسىنىڭ كارتاسىنا اقشا اۋدارعان.
كۇدىكتىگە قاتىستى قازاقستاننىڭ قك 188-بابى «ۇرلىق, ياعني بوتەننىڭ مۇلكىن جاسىرىن جىمقىرۋ» بويىنشا سوتقا دەيىنگى تەرگەۋ باستالدى, پروتسەستىك ماجبۇرلەۋ شاراسى – «كەلۋ مىندەتى». وسىنداي جاعدايلاردى بولدىرماۋ جانە اقشاڭىزدى ساقتاپ قالۋ ءۇشىن قۇقىق قورعاۋ ورگاندارى مۇلكىڭىزگە مۇقيات بولۋدى, سەنىمدى پارول ورناتۋدى, سونداي-اق ونى ايىنا كەمىندە ءبىر رەت اۋىستىرىپ وتىرۋدى ۇسىنادى.
