الداعى ۋاقىتتا ارىپتەستىك كەلىسىم اياسىندا دارىستەر, شەبەرلىك ساباقتارى, دوڭگەلەك ۇستەلدەر, سەمينارلار جانە باسقا دا ءىس-شارالار وتكىزىلەدى دەپ جوسپارلانۋدا. «جاستار» عزو ديرەكتورى ايان ساكوشەۆتىڭ ايتۋىنشا, ىنتىماقتاستىقتىڭ باستى ماقساتى – جاستاردى قولداي وتىرىپ, قوعامدىق سانانى جاڭعىرتۋ.
«رۋحاني جاڭعىرۋ» باعدارلاماسىن جۇزەگە اسىرۋ ماقساتىندا قازاقستاندىق قوعامدىق دامۋ ينستيتۋتى مەن ENACTUS قورىنىڭ قىزمەتى ءبىر-بىرىنە وتە ۇقساس ءارى ماقساتى ءبىر. سوندىقتان بۇل مەموراندۋم قوس تاراپقا دا وتە ءتيىمدى بولادى دەپ ويلايمىن. شىنىن ايتقاندا, ستۋدەنت ۋنيۆەرسيتەتتى ءبىتىرىپ, ەڭبەك نارىعىنا كىرگەن كەزدە ءومىردىڭ بارلىق جاعدايىنا دايىن بولۋى كەرەك. وسىعان بايلانىستى بۇگىندە جاستاردىڭ باسىم بولىگى بيزنەسپەن اينالىسقىسى كەلەتىنىن كورىپ وتىرمىز. بۇل مەملەكەتتىك ينستيتۋتتارعا دا ءتيىمدى. ويتكەنى جاڭا جۇمىس ورىندارى اشىلىپ, ەل ەكونوميكاسىنىڭ دەڭگەيى كوتەرىلمەك. سايىپ كەلگەندە, بىزگە وسىنداي جاس كاسىپكەرلەرگە بىرلەسىپ كومەكتەسۋ ماڭىزدى», دەيدى ا.ساكوشەۆ.
ايتا كەتەيىك, ENACTUS – الەمنىڭ 37 ەلىندە كوشباسشىلىق پەن كاسىپكەرلىككە تاجىريبە ارقىلى ۇيرەتەتىن ءىرى پلاتفورما. جىل سايىن ۇلتتىق بايقاۋلار ۇيىمداستىرىپ, سونىڭ اياسىندا جوو جانە مەكتەپتەردىڭ بيزنەس-كوماندالارى 100-دەن استام جوبالاردى ۇسىنىپ وتىرادى. جوبالار الەۋمەتتىك, ەكولوگيالىق, يننوۆاتسيالىق جانە كوممەرتسيالىق باعىتتارعا ارنالعان. قوردىڭ ميسسياسى – يننوۆاتسيانى تۇسىنە الاتىن, كەز كەلگەن قيىندىقتان جاڭا مۇمكىندىكتەردى كورەتىن جانە ءومىردى جاقسارتۋ ءۇشىن بيزنەس پرينتسيپتەرىن پايدالانا الاتىن كوشباسشى-كاسىپكەرلەردىڭ جاڭا بۋىنىن دايارلاۋ جانە تاربيەلەۋ. ENACTUS قورىنىڭ پرەزيدەنتى البينا ەرجانوۆانىڭ ايتۋىنشا, مەموراندۋم جاستاردى ءتيىمدى تاربيەلەۋدە جاڭا سەرپىن بەرۋى ءتيىس.
– مەنىڭشە, قوعامدىق سانانى ادامي كاپيتالدى ساپالى دايىنداۋ مەن دامىتۋ ارقىلى جاڭعىرتۋعا بولادى. ENACTUS اياسىندا ءبىز الەمدىك باسەكەلەستىك ورتادا جاستاردىڭ كوشباسشىلىق قابىلەتتەرىن شىڭداۋمەن جانە دامىتۋمەن اينالىسامىز. وسى ورايدا, بيزنەس سالاسىنداعى ۇزدىك تالىمگەرلەر جاستارعا الەۋمەتتىك ماڭىزى بار جوبالاردى ىسكە اسىرۋعا كومەكتەسەتىن بولادى, – دەيدى ا.ەرجانوۆا.
