ليۋدميلا تۋريششەۆا – گروزنىيدا تۋعان چەشەن ۇلتىنىڭ وكىلى. ول كەڭەستىك گيمناسشى لاريسا لاتىنينا سياقتى وليمپيادادان كۇرەپ مەدال الماسا دا, رۋمىنيالىق مايتالمان ناديا كومانەچي سەكىلدى جاڭا ەلەمەنتتىڭ اۆتورى اتانباسا دا اتاق-داڭقى ولاردان كەم ەمەس.
العاش مەحيكو وليمپياداسىندا (1968) التىن مەدالدىڭ ءدامىن تاتقان ليۋدانىڭ جەتىستىگى تىم جەدەل ءوستى. ول 1970 جىلعى الەم بىرىنشىلىگىندە بارلىق ەلەمەنت بويىنشا ۇزدىك كورسەتكىشكە يە بولسا, وسى جەتىستىگىن ەۋروپا چەمپيوناتىندا تاعى قايتالادى. جالپى, تۋريششەۆانىڭ ەسەبىندە: وليمپيادالار, الەم, قۇرلىق بىرىنشىلىكتەرى مەن ۇلكەن تۋرنيرلەردەن جەڭىپ العان 137 مەدال بار ەكەن. وسىلاردىڭ ىشىندە: وليمپيادالاردىڭ 9 (4 التىن, 3 كۇمىس, 2 قولا), الەم چەمپيوناتتارىنىڭ 11, ەۋروپا چەمپيوناتتارىنىڭ 14 مەدالى بار.
دوستارى ءھام ارىپتەستەرى ونى «تەمىر تۋريششەۆا» دەپ اتايدى. بۇل – ونىڭ قاجىرلىعى مەن قايراتتىلىعىنا بەرىلگەن باعا. 1975 جىلى تۋريششەۆا لوندون قالاسىندا الەم كۋبوگى جولىندا ونەر كورسەتىپ جاتتى. كەنەت ىرعالىپ تۇرعان قولتىق اعاش (برۋسيا) كۇتىرلەپ سىنا باستايدى. ليۋدا ەش ساسپاستان بارلىق ەلەمەنتتەرىن تولىق ورىنداپ, كورەرمەنگە ءيىلىپ سالەم جاسايدى. ءدال وسى ساتتە قولتىق اعاش وپىرىلىپ ءتۇسىپتى.
1972 جىلى جالاۋىن كوتەرگەن ميۋنحەن وليمپياداسىنان كەيىن كوپشىلىك تۋريششەۆا سپورتتان كەتەتىن شىعار دەگەن ويدا ءجۇردى. ويتكەنى, الدا بولاتىن مونرەال وليمپياداسىنا دايىندىق كەزىندە قاتتى جاراقاتتانىپ قالدى. ءبىر جىلداي ەمدەلۋگە تۋرا كەلدى دە, وليمپياداعا ساناۋلى ايلار قالعاندا جاتتىعۋعا كىرىستى. ليۋدميلا مەدال الادى دەپ ەشكىم ۇمىتتەنبەدى. بىراق «تەمىر تۋريششەۆا» تەمىردەي مىنەز تانىتىپ, وليمپيادانىڭ 4 دۇركىن چەمپيونى اتاندى.
سوڭعى وليمپيادادان كەيىن ليۋدميلا سپورتتى دوعاردى. 1977 جىلى اتاقتى جەلاياق, وليمپيادانىڭ ەكى التىن, ءبىر قولا مەدال يەگەرى ۆالەري بورزوۆ ەكەۋى شاڭىراق كوتەردى. ميۋنحەن وليمپياداسى كەزىندە ەكى جاس جاسىنداي جارقىلداپ كوزگە تۇسكەن بولاتىن.
جۇبايى ۆالەري بورزوۆ تا سپورتتىق جولىنا نۇكتە قويعان سوڭ ۋكراينانىڭ جاستار وداعىن باسقاردى. سوڭىنان ەلدىڭ سپورت ءمينيسترى بولدى. ال ليۋدميلا بولسا, ءبىر كەزدەرى ۋكراينانىڭ گيمناستيكا فەدەراتسياسىنىڭ پرەزيدەنتى مىندەتىن ويداعىداي اتقاردى. 1980-جىلداردىڭ باسىندا حالىقارالىق گيمناستيكا فەدەراتسياسىنىڭ سپورتتىق گيمناستيكا ءتۇرى بويىنشا تەحنيكالىق باقىلاۋ ءبولىمىن باسقاردى. 1998 جىلى حوك-ءتىڭ (حالىقارالىق وليمپيادا كوميتەتى) مارتەبەلى ماراپاتى «سپورت جانە ايەل» سىيلىعىنىڭ يەسى اتاندى.
قازىر ليۋدميلا مەن ۆالەريدىڭ قىزى تانيا كوركەم گيمناستيكامەن اينالىسىپ ءجۇر.
