رەسەي فەدەراتسياسى كوستروما قالاسىنداعى رادياتسيالىق, حيميالىق جانە بيولوگيالىق قورعاۋ اسكەري اكادەمياسىنىڭ تۇلەگى بۇگىنگە دەيىن اقمولا, الماتى, قاراعاندى, اتىراۋ وبلىستارىنداعى گارنيزوندا جۇمىس ىستەگەن.
بىلتىر اقتوبەگە اۋىسىپ كەلگەن احمەت مومىنوۆ قورعانىس مينيسترلىگى تاراپىنان بارلىق جاعدايدىڭ جاسالعانىن, تەك قىزمەتىن ويداعىداي اتقارۋ باستى مىندەتى ەكەنى جونىندە اڭگىمە تيەگىن اعىتتى.
– ناعاشى اتام مەن اعام – اسكەري ادامدار. ەكەۋى دە الماتىداعى اسكەري اكادەميانى تامامداعان. كىشكەنتايىمنان سولاردىڭ جولىن قۋدى ماقسات تۇتتىم. بىراق كورشىلەس ەلدە ءبىلىم العاندى ءتاۋىر كوردىم. كوپشىلىگى نەلىكتەن ءدال وسى ماماندىقتى تاڭداعانىمدى سۇراپ جاتادى. ينجەنەر-ەكولوگكە كوپتەگەن مەكەمەدە جۇمىس تابىلادى, بۇنىڭ سىرى وسىندا جاتسا كەرەك.
وسىنداعى اسكەري ينستيتۋتتا ارىپتەسىم بار, ەكەۋمىز سيرەك كەزدەسەتىن ماماندىقتىڭ يەسىمىز. مەن اقتوبەدەگى كادرلىق جاعداي بويىنشا ايتىپ وتىرمىن. ءوز باسىم جالاقىنى ەسەپتەمەگەندە, پاتەراقىمەن دە قامتىلامىن. ودان ارتىق نە كەرەك؟ قىزمەتىمە كوڭىلىم تولادى, – دەيدى اقتوبە گارنيزونىنىڭ رادياتسيالىق, حيميالىق جانە بيولوگيالىق قورعاۋ قىزمەتىنىڭ باستىعى ا.مومىنوۆ.
ونىڭ كۇندەلىكتى قىزمەتتىك مىندەتىنە اسكەريلەردى ءھام ولار ورنالاسقان اۋماقتى ءتۇرلى زياندى زاتتاردان قورعاپ, تازالىق جۇمىستارىنىڭ تالاپقا ساي جۇرگىزىلۋىن قاداعالاۋ كىرەدى. اپتا سايىن جەكە قۇرامدارمەن ءتۇرلى تەحنيكانىڭ جاي-كۇيىن تەكسەرۋ, وقۋ-جاتتىعۋ جۇمىستارىن وتكىزۋ دە كاسىبي داعدىلارىنىڭ ءبىرى. اراسىندا جوسپاردان تىس شارۋالار دا بولىپ جاتادى. ايتالىق, ناۋرىز ايىنىڭ ورتاسىندا ەلىمىزدى كوروناۆيرۋس ينفەكتسياسى جايلاعاندا, اڭگىمەلەسۋشىمىزدىڭ اسكەريلەردى دەزينفەكتسيا جۇمىستارىنا جۇمىلدىرۋىنا تۋرا كەلگەن.
– ماماندىعىما سايكەس دەزينفەكتور دا بولا الامىن. ۆيرۋسقا بايلانىستى قالادا زارارسىزداندىرۋ جۇمىستارىن جاساۋعا بۇيرىق الدىق. كۇنىنە 24 اسكەري قىزمەتكەر مەن كۋرسانتتار – بارلىعى جۇزدەن استام ادام ۇزىندىعى 3 شاقىرىم جولعا ارنايى سۇيىقتىق شاشتىق. ولارعا جەتەكشىلىك ەتتىم. اتالعان جۇمىس 25 ناۋرىزدان 10 ساۋىرگە دەيىن سوزىلدى. كەيىن بۇل اسكەري جيىندارعا شاقىرىلعاندارعا جۇكتەلدى.
دەزينفەكتسيا جاساۋ اناۋ ايتقانداي اۋىر بولدى دەپ ايتا المايمىن. تەك باسىندا كۇن سۋىقتا ۇزاق ۋاقىت دالادا ءجۇرۋ قيىنعا سوقتى. قاسىمداعى جىگىتتەر بار, ولاردىڭ دەنساۋلىعىنا الاڭدايسىڭ. دەگەنمەن, بۇيرىقتىڭ اتى – بۇيرىق, ورىنداۋعا مىندەتتىمىز. ونى ويداعىداي اتقارىپ شىقتىق دەپ ويلايمىن, ۆيرۋستىڭ تارالماۋىنا از دا بولسا ۇلەسىمىزدى قوستىق. كەيىننەن بلوك-بەكەتتەردە دە وسىنداي جۇمىستار جالعاسىن تاپتى. وسى ورايدا ەڭبەگىمىز ەسكەرىلىپ, باسشىلىق تاراپىنان سىياقى العانىمىزدى ايتا كەتكىم كەلەدى, – دەپ اعىنان جارىلادى احمەت.
جۇمىسىن مىندەتتى تۇردە قورعانىس كيىمىمەن, وزگە دە قاجەتتى جابدىقتاردىڭ كومەگىمەن اتقاراتىن ينجەنەر-ەكولوگ قاۋىپسىزدىك ەرەجەلەرىن ساقتاۋعا باسا ءمان بەرىلۋ كەرەكتىگىنە ەرەكشە توقتالدى. جانە مۇنداي شارالار ول ءۇشىن تاڭسىق ەمەس. ا.مومىنوۆ – رەسەيدە ۇيىمداستىرىلعان وقۋ-جاتتىعۋ جۇمىستارىنا تارتىلعان قازاقستاندىق اسكەري مامانداردىڭ ءبىرى. ياعني ونىڭ اقتوبەدەگى وسىناۋ جۇمىستارعا تاڭدالىپ الىنۋى كەزدەيسوقتىق ەمەس.
احمەتتىڭ ويىنشا ماماندىعىن جان-تانىمەن سۇيگەن ادام كەز كەلگەن قيىندىقتى ەڭسەرە الادى. ول كوزى اشىق ادامدار اسكەريلەردىڭ قىزمەتىنىڭ قيىن ەكەنىن بۇرىننان-اق بىلەتىنىن قوستى.
– اسكەري قىزمەتكەرلەر – بۇيرىقتى ورىنداۋشىلار عانا, ياعني پوليتسەيلەردەگى سياقتى ولاردا بەلگىلى ءبىر قۇزىرەت جوق. بۇنى قاراپايىم حالىق تا بىلەدى. مىسالى, توتەنشە جاعداي كەزىندە بىزگە زارارسىزداندىرۋ جۇمىستارىنا قاتىسىڭدار دەدى, ءبىز سونى اتقاردىق. اسىرەسە, ۇلكەندەر جاعى بۇنى جاقسى ءتۇسىنىپ, كورگەن سايىن جىلى ءسوزىن ايامايدى. ەڭبەگىمىزدى باعالايدى. كوشەدەگى ءتارتىپتى دە قاداعالايتىن ءبىزدىڭ جىگىتتەر – اسكەري بولىمدەگى ساربازدار. ولاردا ەشقانداي قارۋ جوق, بۇزاقىلىقتى بايقاسا, الدىمەن ساقشىلاردى شاقىرادى. ماقتاعانىم ەمەس, شىنىمەن سولاي. وسى تۇرعىدان كەلگەندە, ءدال وسى سالادا ەڭبەك ەتكەنىمە ەشقاشان وكىنگەنىم جوق. بۇقارا مەن بيلىك تە ءبىزدى قادىرلەيدى, – دەيدى.
مايور, ارينە, بارلىق قىزمەتتەستەرى سىندى گەنەرال بولۋدى ارماندايدى. وعان دەيىن اسكەري ءبىلىمىن جەتىلدىرۋ – العا قويعان ماقساتى. ول ءۇشىن ارنايى ىرىكتەۋدەن ءوتىپ, بىرنەشە تالاپتى جوعارى دەڭگەيدە ورىنداۋ قاجەت. «اكادەميادا تاعى ەكى جىل وقىسام, اسكەري شەنىم وسەدى. لاۋازىمىم دا سوعان ساي وزگەرەدى. سوندىقتان بيىل جاز ايلارىندا باعىم مەن بابىمدى سىناپ كورمەكپىن. ءبىزدىڭ جۇمىسىمىز ونسىز دا ءاردايىم دايارلىقتى, كەز كەلگەن ءىستى توسىرقاماي ورىنداۋدى تالاپ ەتەدى عوي. كۇن سايىن وزىندىك ەمتيحان تاپسىرعانداي بولامىز. الداعى سىن قيىن بولا قويماس», دەپ سىر بولىسەدى 35 جاستاعى قارۋلى كۇشتەر سالاسىنىڭ وكىلى.
ايبەك تاسقاليەۆ,
جۋرناليست
اقتوبە
