ونەر • 15 قازان، 2020

باتىردىڭ كەستەلەنگەن بەينەسى

223 رەت كورسەتىلدى

كەڭەس وداعىنىڭ باتىرى ءاليا مولداعۇلوۆانىڭ مەموريالدىق مۋزەيىندە ء«اليا – قاھارماندىق داستانى» اتتى كاسىپقوي سۋرەتشىلەر مەن قولونەر شەبەرلەرى اراسىنداعى بايقاۋ قورىتىندىسى جاريالاندى. قازىلار القاسى كەسكىندەمە، گرافيكا، قولونەر باعىتى بويىنشا الماتى قالاسى، اقتوبە، اتىراۋ، قاراعاندى، ماڭعىستاۋ وبلىستارىنان كەلىپ تۇسكەن 23 جۇمىستى قاراپ، سونىڭ ىشىنەن جەتى جۇمىستى ۇزدىك دەپ تانىدى.

– بيىل ۇلى جەڭىستىڭ 75 جىلدىعى، ءاليا مولداعۇلوۆانىڭ تۋعانىنا 95 جىل تولۋىنا وراي سۋرەتشىلەر مەن قول­ونەر­شىلەر اراسىندا ناۋرىز ايىندا بايقاۋ جاريالاعان بولاتىنبىز. وعان وسى قىر­كۇيەك ايىنىڭ سوڭىنا دەيىن الماتى، اتىراۋ، ماڭعىستاۋ، قاراعاندى وبلىس­تارىنان 23 تۋىندى كەلىپ ءتۇستى. مۇنىڭ ىشىندە جەتى قولونەر، ءۇش گرافيكالىق جۇمىس، كەسكىندەمە با­عىتى بويىنشا 13 جۇمىس بولدى. قازى­لار القاسىنا قازاقستان سۋرەتشىلەر وداعى اقتوبە وبلىستىق فيليالىنىڭ توراعاسى، وبلىستىق ونەر مۋزەيىنىڭ دي­رەكتورى مارات عابدراح­ما­نوۆ پەن سۋرەتشىلەر وداعىنىڭ مۇ­شەسى، قازاق­ستان قول­ونەرشىلەر وداعىنىڭ تەڭ قۇ­رىل­­تايشىسى، قولونەرشى-زەرگەر بولات اتى­راۋباەۆ جەتەكشىلىك ەتتى. كونكۋرس­تىڭ جۇلدەلىك قورى مىناداي. باس جۇلدە – 250 مىڭ تەڭگە، ءى ورىن – 220 مىڭ تەڭگە، ءىى ورىن – 160 مىڭ تەڭگە، ءىىى ورىن – 130 مىڭ تەڭگە دەپ بەلگىلەندى. بۇدان باسقا دا 20 مىڭ تەڭگەدەن 10 ىنتالاندىرۋ سىيلىعى تاعايىندالدى»، دەيدى ءاليا مولداعۇلوۆا مۋزەيىنىڭ ديرەكتورى لەنا قالتاەۆا.

بايقاۋ قورىتىندىسى بويىنشا، ءاليا مولداعۇلوۆانىڭ بەينەسىن ءتۇرلى-ءتۇستى جىپتەرمەن كەستەلەگەن اقتوبە قالا­سىنداعى №24 مەكتەپ-ليتسەيىنىڭ تەحنولوگيا ءپانىنىڭ مۇعالىمى ازامات قوشەتەروۆ­تىڭ «جەڭىس اۋەنى» دەپ اتالاتىن كومپوزي­تسياسى ەڭ ۇزدىك دەپ تانىلىپ، باس جۇلدەنى يەلەندى.

– مەن وسى تۋىندىمدى ءتۇرلى-ءتۇستى جىپتەردى پايدالانا وتىرىپ، كۇنىنە 4-5 ساعات كەستەلەپ ءبىر اي ىشىندە اياقتادىم. ءوزىم جەرگىلىكتى ۋنيۆەرسيتەتتى ديزاين ماماندىعى بويىنشا بىتىرسەم دە، بىزبەن كەستە توقۋدى كەيىن ۇيرەندىم. 2014 جىلى اقتوبە قالاسىنداعى ونەر مۋزەيىنىڭ قىزمەتكەرى لاۋرا بەردىبەكوۆانىڭ كەس­تەلەۋدەن شەبەرلىك ساباقتارىنا قاتىس­تىم، بەلگىلى زەرگەر، قولونەرشى بولات اتىراۋباەۆتىڭ قاسىندا ءجۇرىپ كوپ نار­سە ۇيرەندىم. ءاليا مولداعۇلوۆانىڭ 95 جىلدىعىنا بايلانىستى بايقاۋ وتەدى دەگەن سوڭ اسىقپاي جوسپارلاپ بارىپ، جۇمىستى باستادىم. 30ح40 ولشەمدەگى تۋىندىمدا راديودان ويناپ تۇرعان جەڭىس اۋەنى، جايلاۋ، كيىز ءۇي، ۇشىپ كەلە جاتقان قۇستار، دوڭگەلەك شاڭىراق بەينەلەنگەن. ورتادا ءاليا اپامىز ۆينتوۆكاسىمەن تۇر. جۇمىسىمدى بىلىكتى ماماندار كۇردەلى كومپوزيتسيا دەپ باعالادى. ماعىناسى – ءاليا سياقتى باتىرلار ءوز ءومىرىن قۇربان ەتە وتىرىپ، بىزگە تىنىش ءومىر سىيلادى دەگەندى بىلدىرەدى.

جۇمىسقا ساپاسى جاقسى، بوياۋى قانىق ءتۇرلى-ءتۇستى جىپتەردى پايدالانامىز. بۇ­عان كەز كەلگەن ءجىپ كەلمەيدى، ءوزىنىڭ ارنايى ءجىبى بولادى. سىرتتان الدىرعان دۇ­رىس قوي، بىراق وعان قولىمىز جەتە بەر­مەگەندىكتەن، بازاردان تابامىز. تۇركيادا شىعارىلعان ءجىپتى قولدانامىن. ارنايى ءبىزى بولادى.

1

بايعانين اۋدانىندا تۋىپ-ءوستىم. اكەم اۋىلدا تەمىردەن ءتۇرلى بۇيىمدار جاسايتىن، اعالارىمنىڭ سۋرەت سالاتىن ونەرلەرى بار. التى جىل بويى كەستەمەن اينالىسا كەلە، بۇگىن عانا ناتيجەگە قول جەتكىزىپ وتىرمىن. ەڭ العاشقى كەستە-كارتينامدى ءبىر جىل توقىدىم. بىراق ونىڭ ولشەمى 20ح30 عانا بولدى. قازىر قولىم جاتتىقتى، ەندى ءبىر كارتينانى ءبىر اي توقىپ شىعاراتىن بولدىم. الداعى ۋاقىتتا ايەل ادامداردىڭ قامزولىنا ورنەكتى كەستەلەپ سالعىم كەلەدى. ويتكەنى، قازىر كوبىنەسە بازاردا ساۋدالاناتىن قازاقتىڭ ۇلتتىق كيىمدەرىنىڭ جىپتەرى سوگىلىپ جاتىر. ءارى تاقيا، قامزول، شاپاندارىمىزدى قىتاي مەن قىرعىزستان تىگىپ، بىزگە ساتىپ جاتىر. بۇل – وتە ۇيات نارسە، نامىسىمىزعا تيەدى. ءوزىمىزدىڭ ۇلتتىق دۇنيەمىزدى ءوز قولىمىزبەن كەستەلەۋىمىز كەرەك قوي»، دەيدى ازامات قوشەتەروۆ. ول ءوزى جۇمىس ىستەيتىن مەكتەپ-ليتسەي وقۋشىلارىن دا وسى ونەرگە باۋلىپ ءجۇر.

ۇستازى لاۋرا بەردىبەكوۆانىڭ ايتۋىنشا، ازامات التى جىل بۇرىن «اپاي، مەن قوسىمشا ونەر ۇيرەنگىم كەلەدى» دەپ ءوزى ىزدەپ كەلگەن.

– ازاماتتىڭ جۇمىسى وتە تياناق­تى­لىقپەن، ۇلكەن شىعارماشىلىقپەن جاسالعان. جالپى، قولونەردىڭ وسى تۇرىمەن اينالىساتىندارعا ۇلكەن ەڭبەك، شىدامدىلىق پەن شىعارماشىلىق كەرەك. كەستەمەن پورترەت سالۋ بىرنەشە ساتىدان تۇرادى. ەڭ اۋەلى جوباسى سىزىلىپ، وتە دالدىكپەن ەسكيزى جوسپارلانعان سوڭ عانا توقۋ باستالادى. مەنىڭ تاڭعال­عانىم – كەستەلەۋگە قىز بالا ەمەس، ەر بالانىڭ اسا قىزىعۋشىلىقپەن كەلىپ وتىرعانى. نەگىزى، بۇل اسا نازىكتىكتى تالاپ ەتەتىن قىز بالالاردىڭ ونەرى رەتىندە قاراستىرىلادى عوي. سوعان قاراعاندا، ازاماتتىڭ ار جاعىندا ۇلكەن ونەر، شى­عار­ماشىلىق شابىت جاتىر. ول وسىنى جوعالتىپ الماي، كاسىبي شەبەرلىگىن ۇنەمى جەتىلدىرىپ وتىرۋى كەرەك. ءبىز قولونەردى ناسيحاتتاۋشى شەبەرلەرمىز. قازىرگى كەزدە شەبەرلىك ساباقتارىمىز مۋزەيلەردە ءوتىپ، وعان بالالار كوپتەپ قاتىسىپ جاتىر. ءبىزدى وسى قۋانتادى»، دەيدى لاۋرا بەردىبەكوۆا.

قازىلار القاسىنا جەتەكشىلىك ەتكەن سۋرەتشى، قولونەرشى بولات اتىراۋباەۆتىڭ ايتۋىنشا، كەستەلەنگەن تۋىندىنىڭ كولەمى كىشكەنتاي بولعانىمەن، جۇمىسى كوپ. «ەگەر شابىت كەلسە، سۋرەتتى مايلى بوياۋمەن ءبىر كۇندە سالىپ تاستاۋعا بولادى. ال كەستەلەۋ مۇلدە بولەك. ونى اۋەلى جوسپارلاۋ كەرەك، كوز مايىڭدى ­تاۋىسىپ وتىرۋ قاجەت. ۇناماعان سۋرەتتى ءوشىرىپ تاستاۋعا بولادى، ال كەستە وشىرۋگە كەلمەيدى. بايقاۋ جاريالانعاندا، ەڭ الدىمەن كەسكىندەمە مەن گرافيكالىق سۋرەتتەر كوپ ءتۇستى. قولونەرشىلەردەن دە جاق­سى جۇمىستار كەلدى. ال كەستە-پورترەتتى ۇزاق جوسپارلاپ، كۇندىز-ءتۇنى كوز مايىن تاۋىسىپ، ءتۇرلى-ءتۇستى جىپتەرمەن تۇستەر شى­­عارىپ، توقىپ وتىرۋ كەرەك»، دەيدى ول.

ءاليانىڭ پورترەتىن سالىپ، ىنتالاندىرۋ سىيلىعىن العان اۋەسقوي سۋرەتشى گۇلدەن ايازباەۆا جارىق پەن كولەڭ­كە­­نىڭ اۋىسۋىن ءدال كورسەتىپ، سالقىن تۇس­تەر­دى ءساتتى پايدالانعان. اۋەسقوي سۋرەتشى يرينا قۇرمانالينانىڭ مايلى بوياۋمەن سالعان ءاليا پورترەتى ءبىرىنشى ورىندى يەلەندى. «سوعىس، قاندى قىرعىن جاپ-جاس قىزداردىڭ نازىك جاراتىلىسىنا قالاي سوققى بەردى، ولاردىڭ بولمىسىن قالاي وزگەرتتى؟ مەن ءاليا بەينەسى ارقىلى جاۋىن­گەر قىزداردىڭ پسيحولوگيالىق پورت­رەتىن اشىپ بەرگىم كەلدى»، دەيدى اقتوبەلىك سۋرەتشى.

ءاليا مولداعۇلوۆا مۋزەيىنىڭ ديرەكتورى ەلەنا قالتاەۆانىڭ ايتۋىنشا، جەڭىستىڭ 75 جىلدىعى مەن ءاليا مول­داعۇلوۆانىڭ 95 جىلدىعىنا ارنالعان بايقاۋعا كەلىپ تۇسكەن بارلىق تۋىندى مۋزەي قورىنا الىنىپ، الداعى ۋاقىتتا رەسپۋبليكالىق بايقاۋلارعا جىبەرىلەدى.

1

 

اقتوبە وبلىسى

سوڭعى جاڭالىقتار

ۇقساس جاڭالىقتار