وسى ورايدا ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ نۇر-سۇلتان قالاسى بويىنشا دەپارتامەنتى 2020 جىلعى 25 ماۋسىمدا «استانا سۋ ارناسى» شجق مكك 2021-2025 جىلدارعا ارنالعان سۋمەن جابدىقتاۋ جانە سۋ بۇرۋ بويىنشا رەتتەلىپ كورسەتىلەتىن قىزمەتتەرگە تاريفتەر مەن تاريفتىك سمەتانىڭ شەكتى دەڭگەيلەرىن بەكىتۋگە ءوتىنىم بەرگەنىن حابارلايدى.
بيىل 6 قازاندا دەپارتامەنت تاريفتەردى قالىپتاستىرۋ ءراسىمىنىڭ جاريالىلىعى, اشىقتىعى ماقساتىندا ءماسليحات دەپۋتاتتارىنىڭ, قوعامدىق بىرلەستىكتەردىڭ, تاۋەلسىز ساراپشىلاردىڭ, بۇقارالىق اقپارات قۇرالدارىنىڭ جانە وزگە دە مۇددەلى تۇلعالاردىڭ قاتىسۋىمەن «استانا سۋ ارناسى» شجق مكك ءوتىنىمى بويىنشا اشىق جينالىس نىسانىنداعى تاريف جوباسىن تالقىلاۋ بويىنشا جاريا تىڭداۋ وتكىزدى. جاريا تىڭداۋلار وتكىزۋ بارىسىندا «استانا سۋ ارناسى» شجق مكك-نىڭ وكىلدەرىمەن سۋمەن جابدىقتاۋ بويىنشا 44%-عا, سۋ بۇرۋ بويىنشا 137%-عا جوسپارلانعان وسىممەن كاسىپورىن ءتاريفىنىڭ جوباسى تانىستىرىلدى. بۇل رەتتە ۇسىنىلعان ءوتىنىم تاريف جوباسى بولىپ تابىلاتىنىن اتاپ ءوتۋ قاجەت.
دەپارتامەنت كاسىپورىن مالىمدەگەن شىعىندارىنىڭ بارلىق باپتارىنىڭ نەگىزدىلىگىنە جانە تابيعي مونوپوليالار تۋرالى زاڭناما تالاپتارىنا سايكەستىگىنە ەگجەي-تەگجەيلى تالداۋ جۇرگىزەدى. وسىعان بايلانىستى, سۋمەن جابدىقتاۋ جانە سۋ بۇرۋ سالاسىنداعى تاريف دەڭگەيىنىڭ الداعى ۋاقىتتا كوتەرىلەتىنى تۋرالى ناقتى مالىمدەۋ سەنىمدى اقپاراتقا جاناسپايدى, دەپ مالىمدەدى تابيعي مونوپوليالاردى رەتتەۋ كوميتەتىنىڭ ءباسپاسوز قىزمەتى.
