قوعام • 14 قازان، 2020

قوعام جاستاردىڭ قولداۋىن سەزىندى

22 رەت كورسەتىلدى

قاتارىنا ەكى مىڭ جاستى بىرىكتىرگەن اقتوبە وڭىرىندەگى ۆولونتەرلىك توپتار پاندەميا كەزىندە، تازالىق اكتسياسىن وتكىزۋدە، قيىن بالالارمەن جۇمىس ىستەۋدە جانە اتا-اناسى جوق بالالارعا قامقورلىق تانىتۋدا ەرەكشە كوزگە ءتۇستى. سونداي-اق جوعالعان ادامداردى ىزدەستىرىپ تابۋدا پوليتسيا قىزمەتكەرلەرىنە كومەگىن تيگىزدى. از ۋاقىت ىشىندە ءبىراز تاجىريبە جيناقتاعان بەلسەندى جاستار جۇمىس مۇنىمەن توقتاپ قالمايدى دەپ وتىر.

سۋرەتتى تۇسىرگەن ەرلان ومار، «EQ»

 

جىل باسىندا ەرىكتى جاستار توبى ەڭ اۋەلى وڭىردەگى كاسىپتىك-تەحنيكالىق ءبىلىم بەرەتىن وقۋ ورىندارىندا، ق.جۇبانوۆ اتىن­داعى اقتوبە وڭىرلىك ۋنيۆەرسيتەتى مەن م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە قۇرىلدى. جىل باسىندا 1000 ەرىكتى جاس قۇرعان 35 توپتىڭ سانى قازىر 90-عا ارتتى. اۋدان-اۋىلداردا دا جاستار بەلسەندىلىگى ارتىپ كەلەدى. سونىڭ ىشىندە قىزداردىڭ بەلسەندىلىگى كۇشتى. قازىر وڭىرىمىزدەگى ەكى مىڭ ۆولونتەردىڭ ەڭ ەرەسەگى 41 جاس­تا بولسا، ەڭ كىشىسى – 14 جاس­تا. ۆولونتەرلەردىڭ 62%-ى –قىز­دار. توپتاردىڭ قۇرامى مىناداي: جۇ­مىسشى جاستار – 45،8%، جوو ستۋ­­دەنتتەرى – 16،5%، كاسىپتىك-تەح­­نيكالىق ءبىلىم بەرەتىن وقۋ ورىن­دارىنىڭ ستۋدەنتتەرى – 12،7%، مەكتەپ وقۋ­شىلارى – 20،5%، جۇ­مىسسىز جاستار جانە كاسىپكەرلەر – 4،5%.

جىل باسىندا اقتوبە وبلىسىندا قوزعالىستىڭ «Birgemiz» تۇجىرىمداماسى نەگىزىندە 43 تار­ماقتان تۇراتىن جۇمىس جوسپارى بەكىتىلدى.

«قوعامدىق ماسەلەگە ارالاسۋ ارقىلى كوپشىلىك جاستاردىڭ ومىرلىك ۇستانىمدارى قالىپ­تاستى. ولار قوعاممەن قارىم-قاتىناس جولدارىن ۇيرەندى، ەڭ باستىسى – تاجىريبە جيناقتادى. مەن دە كوپ نارسەنى ۇيرەندىم»، دەيدى وبلىستىق جاستار ساياساتى ماسە­لەلەرى باسقارماسىنىڭ باسشىسى ءسابيت مۇقانوۆ.

توتەنشە جاعداي كەزىندە وب­­لىستىق ۆولونتەرلىك شتاب قۇ­رى­لىپ، «AntiCovid19» تو­بىنىڭ جاستارى اقتوبەدەگى پرو­ۆي­زور­لىق اۋرۋحانالار مەن جە­دەل جاردەم بەكەتتەرىنىڭ قىز­مەت­كەرلەرىنە ىستىق تاماق جەت­كىزىپ تۇردى. سو­نىمەن قاتار ۆولون­تەرلەر ناۋ­قاستار ءۇشىن 13 وتتەگى كونتسەنتراتور اپپاراتىن، 67 وت­تەگى باللوندارىن، 146 وتتەگى جاس­­تىقتارىن جەتكىزىپ بەردى.

ەرىكتىلەر توبى جاز بويى قيىن جاعدايدا قالعان بالالارمەن جۇ­مىس ىستەگەنىن دە ايتا كە­­تۋ كەرەك. جەتىمدەر ۇيىنەن شىق­­­قان كا­مەلەت جاسىنا جەتكەن بالا­لار تۇ­راتىن «ايالا» ور­تا­­­لىعىندا، «مە­يىرىم» جاستاردى الەۋ­مەتتىك بە­يىمدەۋ ۇيىندە جانە «جاينا» مۇگەدەك بالالاردى وڭال­­تۋ ورتا­لىعىندا جۇمىس ىستەپ، كوپتەگەن تۇيتكىلدى سۇراقتاردىڭ باسىن اشتى. جاستىڭ ءتىلىن جاس تۇسى­نەدى دەمەكشى، ومىردە قيىن جاعدايدا قالعان بالالار ىشكى سىرلارىن تەك قۇرداستارىنا عانا اقتارا الادى. بۇل جۇمىسقا ۆولونتەرلەر ارنايى ترەنينگتەر مەن سەمينارلاردا وقىعاننان كەيىن عانا جىبەرىلدى.

«Umit» جوباسى بويىنشا 30 ۆو­لونتەر «زەللو ىزدەۋ» كومان­داسى توبىمەن جانە جەر­گىلىكتى پوليتسيا بولىمىمەن بىر­لەسە جوعال­عان ادامداردى ىزدەس­تىرۋ­مەن اينا­­لىسقانىن ايتا كەتۋ كە­رەك. «Taza alem» جوباسى نەگى­زىندە 3249 بەلسەندى تازالىق اكتسياسىن وتكىزىپ، تابيعات اياسىندا دەم­الۋشىلارعا جادىنامالار تاراتتى، قوقىس جينادى.

«Birgemiz: تaza alem» با­عى­تى بويىنشا شاعىن گرانت باي­قاۋىنان اقتوبە وبلىسىنان 7 جو­با ۇسىنىلىپ، ونىڭ 4 جو­با­سى ماقۇلداندى. سونىڭ ارقا­سىندا جاستار ءاربىر جوباعا 300 مىڭ تەڭگەدەن گرانت الدى. وسى شا­رانىڭ ارقاسىندا، قازىردە قا­لادا، اۋدان ورتالىقتارى مەن ەلدى مەكەندەردە تازالىق اكتسيالارى ءجيى-ءجيى ۇيىمداستىرى­لىپ، وعان قاتىسۋشى ەرىكتىلەر سانى دا ءوسىپ كەلەدى. ماسەلەن، حالىق­ارالىق جاستار كۇنى قارساڭىندا وتكىزىلگەن «تازا جاعالاۋ» اكتسيا­سىنا 400-دەن استام جاس قا­تى­­سىپ، ولار 40 توننا قوقىس شى­عاردى.

از مەرزىم ىشىندە جاساقتالعان توپتاردىڭ ەرىكتىلەرى وسىنداي قوعامدىق ماڭىزى زور ىستەردىڭ ۇيىمداستىرۋشىلارى دا بولا ءبىلدى. ەڭ باستىسى –جاستارىمىز قوعامداعى قوردالانعان ما­سەلەلەردى كورىپ قانا قوي­ماي، ولاردى شەشۋگە شىن جاناشىر­لىقپەن كىرىسىپ جۇرگەنى قۋانتادى.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار