عاسىرعا جۋىق ۋاقىت بويى وڭىرىمىزدەگى بارلىق ەمحانالار مەن اۋرۋحانالارعا ورتا جانە كىشى مەديتسينا قىزمەتكەرلەرىن دايارلاپ كەلە جاتقان وقۋ ورنىنىڭ 85 جىلدىعىمەن ارداگەر دارىگەرلەر, ءماسليحات دەپۋتاتتارى قۇتتىقتاپ كەلدى. مانشۇك ءمۇسىنىنىڭ اشىلۋ سالتاناتىندا جۇرتشىلىقتى الماتىدان مانشۇك مامەتوۆانىڭ نەمەرە تۋىسى شولپان مامەتوۆا مەن رەسەيدىڭ پسكوۆ وبلىسى نەۆەل اۋدانىنىڭ دەنە شىنىقتىرۋ جانە سپورت باسقارماسىنىڭ باستىعى ەلەنا ۆورونكوۆا ونلاين-فورماتتا قۇتتىقتادى.
1935 جىلى اشىلعان اقتوبە مەديتسينا ۋچيليششەسى قابىرعاسىندا وسى كەزگە دەيىن 20 مىڭنان استام مامان دايارلانعان. وڭىردەگى ىرگەلى وقۋ ورنىن قۇتتىقتاپ كەلگەن وبلىس اكىمى وڭداسىن ورازالين ادام ءومىرىن قۇتقارۋدا ورتا جانە كىشى مەديتسينا قىزمەتكەرلەرىنىڭ ەڭبەگىنىڭ ولشەۋسىز ەكەندىگىن اتاپ ءوتىپ, قاي كەزدە دە ەلگە قادىرلى ماماندار دايارلاپ كەلە جاتقان وقىتۋشىلىق قۇرامعا العىس ايتىپ, ستۋدەنتتەرىنە ساتتىلىك تىلەدى. الماتى مەملەكەتتىك مەديتسينا ۋنيۆەرسيتەتىندە وقىپ جۇرگەنىندە مايدانعا بارۋعا ءوز ەركىمەن ارىز جازىپ اتتانىپ, تەڭدەسسىز ەرلىك كورسەتكەن كەڭەس وداعىنىڭ باتىرى مانشۇك مامەتوۆانىڭ اتىن يەلەنۋ وسى وقۋ ورنىنىڭ ۇجىمىنا وراسان زور جاۋاپكەرشىلىك جۇكتەيتىنىن دە اتاپ ءوتتى وبلىس اكىمى. ايتا كەتۋ كەرەك, 1943 جىلدىڭ 16 قازانىندا قاراتاي كولىنىڭ جاعاسىندا جاۋمەن بەتپە-بەت قالىپ, ەرلىكپەن قازا تاپقان 100-اتقىشتار بريگاداسىنىڭ پۋلەمەتشىسى مانشۇك مامەتوۆا مەن مەرگەن ىبىرايىم سۇلەيمەنوۆ نەۆەل قالاسىنىڭ تۇبىندە قاتار جەرلەنگەن. 360 ءفاشيستى ۆينتوۆكاسىمەن جويعان مەرگەن ىبىرايىم سۇلەيمەنوۆتىڭ ەرلىگى دە وسى كەزگە دەيىن ايتىلماي كەلەدى. ول قازا تاپقاندا, جۋالى اۋدانىندا ايەلى مەن ءبىر قىزى قالعانىن جازعان ەدى ءازىلحان نۇرشايىقوۆ.
قازىرگى ۋاقىتتا فەلدشەر, مەدبيكە, ءتىس تەحنيگى ماماندىقتارى بويىنشا 1500-دەن استام ستۋدەنت ءبىلىم الىپ جاتقان اقتوبە جوعارى مەديتسينا كولەدجى 2017 جىلى كەڭەس وداعىنىڭ باتىرى مانشۇك مامەتوۆانىڭ ەسىمىن يەلەندى. بۇل ىستە كوللەدجدىڭ بۇرىنعى ديرەكتورى ۆاديم يۋگاي مارقۇمنىڭ ەڭبەگى زور. ول 2006 جىلى مانشۇك مامەتوۆانىڭ ەسىمىن بەرۋدى ۇكىمەتكە جازىپ, ونىڭ جاۋابىن ون جىل بويى كۇتتى. ۆاديم يۋگاي مەن ەڭبەك ارداگەرى عالىمجان بايدەربەس 2017 جىلى وسى وقۋ ورنىندا مانشۇك مامەتوۆا مۇراجايىن جاساقتادى.
اقتوبە
