ءمامس جۇيەسىندە جوسپارلى ستوماتولوگيالىق كومەك 18 جاسقا دەيىنگى بالالار مەن جۇكتى ايەلدەرگە تەگىن كورسەتىلەدى. شۇعىل ستوماتولوگيالىق كومەكتى 18 جاسقا دەيىنگى بالالار, جۇكتى ايەلدەر, ۇلى وتان سوعىسىنىڭ ارداگەرلەرى, ءى, ءىى, ءىىى توپتاعى مۇگەدەكتەر, «التىن القا», «كۇمىس القا» القالارىمەن ماراپاتتالعان كوپبالالى انالار, اتاۋلى الەۋمەتتىك كومەك الۋشىلار, جاسى بويىنشا زەينەتكەرلەر, الەۋمەتتىك ءمانى بار اۋرۋلارمەن اۋىراتىندار, مۇگەدەك بالاعا كۇتىم جاسايتىن جۇمىس ىستەمەيتىن ادامدار, بالا كەزىنەن ءبىرىنشى توپتاعى مۇگەدەككە كۇتىم جاسايتىن جۇمىس ىستەمەيتىن ادامدار الا الادى.
ورتودونتيالىق كومەك جاقسۇيەك-بەت انوماليالارىن جويۋعا ارنالعان اپپاراتتى پايدالانا وتىرىپ, جاقسۇيەك-بەت ايماعىنىڭ تۋا بىتكەن پاتولوگياسى بار 18 جاسقا دەيىنگى بالالارعا كورسەتىلەدى.
سونداي-اق بيىلدان باستاپ الەۋمەتتىك مەديتسينالىق ساقتاندىرۋ قورى ءمامس پاكەتى بويىنشا الەۋمەتتىك قورعالماعان وتباسىلاردان شىققان بالالاردى – اتاۋلى الەۋمەتتىك كومەك الۋشىلاردى قولداۋدى قاراستىرعان. 6 جاستان 12 جاسقا دەيىنگى بالالارعا ءتۇرلى جاقسۇيەك-بەت ايماعىنىڭ اۋىتقۋلارى (تىستەم بۇزىلۋلارى, جاقتىڭ ميكروگنوتياسى) كەزىندە ورتودونتيالىق كومەك كورسەتىلەتىن بولادى.
«ەلوردادا تەگىن ستوماتولوگيالىق كومەك الۋعا قۇقىلى پاتسيەنت ەمحاناعا دا, ستوماتولوگيالىق كلينيكاعا دا جۇگىنە الادى. بۇل رەتتە ستوماتولوگيالىق قىزمەت كورسەتەتىن كلينيكا قوردىڭ الەۋەتتى قىزمەت جەتكىزۋشىسى جانە الەۋەتتى قىزمەت جەتكىزۋشىلەر تىزىلىمىندە بولۋى ماڭىزدى. شۇعىل جانە جوسپارلى ستوماتولوگيالىق كومەك كورسەتۋ پاتسيەنتتىڭ ەركىن تاڭداۋى نەگىزىندە جۇزەگە اسىرىلادى (بالا – اتا-انا نەمەسە زاڭدى وكىل بولعان جاعدايدا) جانە پاتسيەنتتىڭ تىركەلگەن جەرى بويىنشا ۋچاسكەلىك دارىگەردىڭ جولداماسىنىڭ بولۋى تالاپ ەتىلمەيدى. قىزمەت كورسەتۋ فاكتىسى جانە ستوماتولوگيالىق كومەك كولەمى اقپاراتتىق جۇيەدە تىركەلەدى, بۇل العاشقى مەديتسينالىق-سانيتارلىق كومەك ۇيىمى مەن ستوماتولوگيالىق كلينيكالار اراسىندا بىرلەسىپ ورىنداۋ شارتىن جاساسۋعا نەگىز بولادى, ول اقپاراتتىق جۇيەدە اۆتوماتتى تۇردە قالىپتاستىرىلادى», دەپ تۇسىندىرەدى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ءباسپاسوز قىزمەتى.
كورسەتىلگەن قىزمەتتەرگە اقى تولەۋ پاتسيەنتتىڭ تىركەلگەن جەرى بويىنشا العاشقى مەديتسينالىق-سانيتارلىق كومەك كورسەتۋ ۇيىمى (ەمحانا) ارقىلى جۇرگىزىلەدى. كورسەتىلگەن قىزمەتتەر ناقتى قىزمەت كورسەتۋ دەرەگى (فاكت) بويىنشا اقپاراتتىق جۇيەگە ەنگىزىلەدى. مەديتسينالىق كومەك كورسەتۋدەن باس تارتقان جاعدايدا, الەۋمەتتىك مەديتسينالىق ساقتاندىرۋ قورىنا Qoldau 24/7 موبيلدىك قوسىمشاسى ارقىلى جۇگىنۋ قاجەت, قوسىمشانى Play Market جانە App Store ارقىلى ورناتۋعا بولادى.
