– سەمينار جوعارى كاسىبي دەڭگەيدە ءوتتى, اقپارات قولجەتىمدى ءارى اۋديتورياعا بەيىمدەلگەن تۇردە ۇسىنىلدى, پروبلەمانىڭ بارلىق اسپەكتىلەرى قوزعالدى جانە بارلىق سۇراققا جاۋاپتار ۇسىنىلدى. الەمدىك تاجىريبەدە قولدانىلىپ كەلە جاتقان ينتەرنەتكە تاۋەلدىلىكتى انىقتاۋ مەتوديكالارىمەن جۇمىس ىستەۋ باعىتتارى كورسەتىلدى. بالالارمەن جانە ونىڭ اتا-انالارىمەن جۇمىس ىستەۋگە ادىستەمەلىك نۇسقاۋلىقتار بەرىلدى. الداعى ۋاقىتتا مەكتەپ پسيحولوگتەرى العان بىلىمدەرىن مىندەتتى تۇردە ءوز جۇمىستارىندا قولدانادى دەپ سەنەمىز, – دەيدى الماتى قالاسى №5 مەكتەپ-گيمنازياسىنىڭ پسيحولوگتەرى.
سەميناردا پسيحولوگيا عىلىمدارىنىڭ كانديداتى, «كوممۋنيكاتسيا جانە ۇلتتىق قاۋىپسىزدىك عىلىمي-زەرتتەۋ ينستيتۋتى» جشس جەتەكشى ترەنەرى, «كاسىبي پسيحولوگيالىق ليگا» قوعامدىق بىرلەستىگىنىڭ باسقارما مۇشەسى, «قۇرمەت» وردەنىنىڭ يەگەرى ساۋلە ءىزباساروۆا, كريزيس جاعدايىنداعى پسيحولوگ, دياگنوست, كونسۋلتانت, ۆيكتيميولوگ, ەكسپەرت, مەدياتور ءاليا بايدراحمانوۆا, تاجىريبەلى پسيحولوگ, پسيحولوگ-كونسۋلتانت ليمانا قويشيەۆا, پسيحولوگيا عىلىمدارىنىڭ ماگيسترى, حالىقارالىق بيزنەس ۋنيۆەرسيتەتىنىڭ دوتسەنتى, كاسىبي پسيحوتەراپيالىق ليگانىڭ جەكە تەراپەۆتى جانە مۇشەسى اينۇر قۇلنازاروۆا, پسيحولوگ, گەشتالت-تەراپەۆت الينا اساديللاەۆا سەكىلدى بىلىكتى ترەنەرلەر ءوز تاجىريبەلەرىمەن ءبولىستى.
سەمينار قاتىسۋشىلارىنا تۇلعا تيپتەرىن پسيحواناليتيكالىق دياگنوستيكالاۋ, بالالار مەن جاسوسپىرىمدەردەگى ينتەرنەتكە تاۋەلدىلىكتى انىقتاۋ بويىنشا ءادىستى ءتۇسىندىرۋ, بالالار مەن جاسوسپىرىمدەر جانە ولاردىڭ اتا-انالارىمەن ينتەرنەتكە تاۋەلدىلىكتىڭ الدىن الۋ بويىنشا پەداگوگ-پسيحولوگتىڭ كوررەكتسيالىق جۇمىسى بويىنشا اقپاراتتار بەرىلدى.
سونىمەن قاتار اعىمداعى جىلدىڭ 18 قىركۇيەگى كۇنى «ماسكەۋ مەتروپوليتەنى» مۋك مەديتسينالىق قىزمەتىنىڭ 1-كاتەگوريالى پسيحوفيزيولوگى بارلىق قاتىسۋشىلارعا قوسىمشا ءدارىس وتكىزدى. لەكتسيا youtube بەينەحوستينگىندە 12 مىڭنان اسا كورىلىممەن قارالدى.
جوبا ۇيىمداستىرۋشىلارى مامانداردىڭ العان ءبىلىمىن الداعى ۋاقىتتا تاجىريبە جۇزىندە ءتيىمدى پايدالانۋى ءۇشىن جىل سوڭىنا دەيىن سەمينار قاتىسۋشىلارىنا ساراپتامالىق قولداۋ كورسەتىلىپ وتىراتىنىن جەتكىزدى.
ءتۇرلى زەرتتەۋلەردىڭ ناتيجەسى بويىنشا الەم حالقىنىڭ 10%-ى ينتەرنەتكە تاۋەلدى ەكەنى انىقتالعان. جاپونيا, اقش, قحر سياقتى بىرقاتار ەلدە بۇل دەرت مەديتسينالىق ساناتقا جاتقىزىلىپ, ودان ارىلۋ ءۇشىن كاسىبي ماماندار كومەك كورسەتەدى.
ەلىمىزدە اتالعان ماسەلە رەسمي تۇردە مەديتسينالىق اۋرۋ رەتىندە تىركەلمەسە دە, دەرتتىڭ بارى انىق. وسى ورايدا «جاس ۇلان» ۇيىمى اقپارات جانە قوعامدىق دامۋ مينيسترلىگى جانە «ازاماتتىق باستامالاردى قولداۋ ورتالىعى» كەاق قولداۋىمەن «جاستار مەن بالالار اراسىندا ينتەرنەتكە تاۋەلدىلىكتىڭ الدىن الۋ جونىندەگى ءىس-شارالار كەشەنىن ىسكە اسىرۋ, سونداي-اق ازاماتتاردىڭ تسيفرلى بەدەلىن قورعاۋ» جوباسى اياسىندا بىرقاتار اۋقىمدى ءىس-شارالاردى جۇزەگە اسىرىپ جاتىر. الداعى ۋاقىتتا ەلدەگى ينتەرنەتكە تاۋەلدىلىك جاعدايىن انىقتاۋ ماقساتىندا اۋقىمدى الەۋمەتتىك زەرتتەۋ جۇرگىزىلمەك.
