تامىرى تەرەڭ, كوكجيەگى كوركەم ماقالانى اباي مۋزەيىنىڭ قۋانىشى دەپ قابىلدادىق. ونىڭ سەبەبى دە جوق ەمەس. ءبىزدىڭ مۋزەيدە ابايتانۋعا ارنالعان ارنايى ەكسپوزيتسيا بار. ەلباسىنىڭ «اباي اماناتى» ماقالاسى بىزگە جول كورسەتتى, تىڭ ويلار تۋدى. سوندىقتان بيىك پاراساتپەن جازىلعان ماقالا – اباي مۋزەيىنىڭ قۋانىشى.
ەلباسى وسى ماقالاسىندا ءبىزدىڭ مۋزەي تۋرالى جىلى لەبىزىن بىلدىرگەنىنە شىن ريزا بولدىق. نۇرسۇلتان ءابىش ۇلى نازارباەۆ: «ابايدىڭ ءومىرى مەن شىعارماشىلىعىن تۇتاس قامتيتىن «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەي قۇرىلدى. جيدەبايدا ءۇش ءجۇز الپىس اۋليەلى مەكەن ماڭعىستاۋدان اكەلىنگەن ۇلۋتاستاردان اقشاڭقان كۇمبەزدى اباي-شاكارىم كەسەنەسى تۇرعىزىلىپ, ونىڭ اشىلۋ راسىمىندە بۇل ورىننىڭ ەندى ءار قازاق ءۇشىن رۋحاني مەككەگە اينالعانىن اتاپ ءوتتىم», دەيدى ماقالاسىندا.
ورايى كەلگەندە ايتا كەتەيىن, قازىرگى ۋاقىتتا جيدەبايدىڭ حالىقارالىق اتلاسى جاسالۋدا. اباي اكادەمياسىمەن بىرلەسىپ ازىرلەنەتىن اتلاس ءۇش تىلدە باسىلىپ شىعارىلماق. اتلاستى قۇرۋ ماقساتىندا مىقتى فوتوگرافتار جۇمىس ىستەدى. باسىلىمدا جيدەبايدىڭ فلورا, فاۋنا, لاندشافتى, بيوالۋانتۇرلىلىگى مەن تاريحي جەرلەرى كورسەتىلەدى. جالپى, ءبىزدىڭ مۋزەي عىلىمي ورتالىققا اينالۋ كەرەك. مۋزەيدىڭ عىلىمي تۇجىرىمداماسى ازىرلەندى. حاكىم اباي تۋرالى 100 تومدىق كىتاپ شىعارۋ جوسپارلانىپ وتىر. ول ءۇشىن مۋزەي قورىنداعى ماتەريالدار جەتكىلىكتى. جوسپارلاعانىمىزداي, جىل سايىن جۇيەلى تۇردە 10 تومنان جارىق كورىپ وتىرادى. بۇل جيناق ابايتانۋ سالاسىنا قىزىعۋشىلىعى بار كەز كەلگەن ادامعا قولجەتىمدى بولعانىن قالايمىز.
اباي مۋزەيىن قازاقستاننىڭ تۇكپىر-تۇكپىرىنەن, شەتەلدەردەن قوناقتار ارنايى ىزدەپ كەلەدى. تۇڭعىش پرەزيدەنتىمىز ايتقانداي, «جيدەباي-ءبورىلىنىڭ» رۋحاني مەككەگە اينالعانى وسى ەمەس پە؟! ەلباسىنىڭ «اباي اماناتى» اتتى ماقالاسى بىزگە قۋانىشپەن قاتار ۇلكەن جاۋاپكەرشىلىك تە جۇكتەدى. ويتكەنى تانىمدىق دەرەگى مول ماقالادا اباي مۋزەيىنىڭ مازمۇنىن اشاتىن ويلار كوپ.
تۇردىقۇل شاڭباي,
«جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيىنىڭ ديرەكتورى
