قازاقستاندا ۇيالى بايلانىس جانە ينتەرنەتكە تىركەلگەن ابونەنتتەر سانىنىڭ ازايۋىنا قاراماستان, بايلانىس قىزمەتتەرىنىڭ كولەمى ايتارلىقتاي ءوستى. مىسالى, اعىمداعى جىلدىڭ قاڭتار-تامىزىندا ەلىمىزدىڭ تەلەكوممۋنيكاتسيالىق كومپانيالارىنىڭ بايلانىس قىزمەتىنەن العان كىرىستەرى 8,3 پايىزعا ۇلعايىپ, 574,2 ملرد تەڭگەنى قۇرادى. وتكەن جىلى ول 519,9 ملرد تەڭگە بولعان ەدى. كىرىستەر ءوسىمىنىڭ نەگىزگى سەبەپتەرىنىڭ ءبىرى − ينتەرنەت-پروۆايدەرلەر مەن ۇيالى بايلانىس وپەراتورلارى ءتاريفىنىڭ كوتەرىلۋى.
ينتەرنەت ۇسىنۋ قىزمەتى سالاسىنداعى تەلەكوممۋنيكاتسيالىق كومپانيالاردىڭ كىرىستەرى ءبىر جىل ىشىندە 13,2%-عا ءوستى جانە 213,4 ملرد تەڭگەگە جەتتى. بۇل تەلەكوممۋنيكاتسيا نارىعىنداعى قىزمەتتەردىڭ جالپى 37,2%-عا قۇرايدى. سونىمەن قاتار ۇيالى بايلانىس قىزمەتتەرىنىڭ كولەمى وتكەن جىلدىڭ سايكەس كەزەڭىمەن سالىستىرعاندا 1,5%-عا ارتىپ, 151,7 ملرد تەڭگەنى قۇرادى. سونىڭ ىشىندە حالىققا كورسەتىلگەن ۇيالى بايلانىس قىزمەتتەرى اقشالاي ماندە ءبىر جىلدا بىردەن 5,1%-عا, ياعني 108,1 ملرد تەڭگەگە دەيىن وسكەن.
سونداي-اق وڭىرلىك بولىنىستە بايلانىس قىزمەتتەرى كولەمىنىڭ 80%-ى الماتى مەن نۇر-سۇلتان قالاسىنا تيەسىلى. ۇلتتىق ەكونوميكا مينيسترلىگىنە باعىنىستى ستاتيستيكا كوميتەتىنىڭ مالىمەتىنشە, ۇيالى بايلانىس كولەمى ۇيالى بايلانىس وپەراتورلارى تىركەلگەن مەكەنجايى بويىنشا بولىنگەن. ماسەلەن, الماتىداعى بايلانىس قىزمەتتەرىنىڭ كولەمى 336,6 ملرد تەڭگە بولسا, ال نۇر-سۇلتاندا 121 ملرد تەڭگەنى قۇرايدى. بۇدان بولەك, سەكتورداعى قىزمەت كورسەتۋ كولەمى بويىنشا قاراعاندى (13,8 ملرد تەڭگە), شىعىس قازاقستان (13,2 ملرد) جانە الماتى (9,9 ملرد) وبلىستارى كوش باستاپ تۇر.
ەستەرىڭىزگە سالا كەتەيىك, تاياۋدا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ۇيالى بايلانىس قىزمەتتەرىن كورسەتۋ قاعيدالارىنا وزگەرتۋلەر ەنگىزدى. ەندى ءموبيلدى وپەراتورلار ابونەنتتەرگە وزگە تاريفتىك جوسپارلارمەن قاتار, تولەم ءبىر كۇنتىزبەلىك ايعا جاسالاتىن تاريفتىك جوسپاردى دا ۇسىنۋى ءتيىس. ەنگىزىلگەن وزگەرتۋلەردىڭ ارقاسىندا ابونەنتتەر تاريفتىك جوسپارلاردىڭ ىشىنەن وزىنە قاجەتىن تاڭداي وتىرىپ, ونى تولىق ءبىر اي پايدالانا الادى. مىسالى, ەگەر ابونەنت تاريفتىك جوسپارعا ايدىڭ سوڭعى كۇنى قوسىلسا, ونىڭ جەكە شوتىنان بايلانىس قىزمەتى ءۇشىن تولەم كەلەسى ايدىڭ سوڭعى كۇنى شەگەرىلەدى.
مۇنىمەن قوسا, ەرەجەگە "بازالىق تاريفتىك جوسپار" ۇعىمى ەنگىزىلدى. اتالعان تاريف ابونەنتتىك تولەمدى تالاپ ەتپەيدى, تەك ناقتى پايدالانعان مينۋت نەمەسە SMS سانىنا عانا تولەم جاساي وتىرىپ, قوڭىراۋ شالۋعا جانە SMS جىبەرۋگە مۇمكىندىك بەرەدى. "بازالىق تاريفتىك جوسپار" ابونەنت ءنومىردى باسقا ۇيالى بايلانىس وپەراتورىنىڭ جەلىسىنە اۋىستىرعاندا (MNP قىزمەتى), جاڭا تاريفتىك جوسپاردى تاڭداپ ۇلگەرمەگەندە, سونداي-اق قولدانىستاعى تاريفتىك جوسپار ارەكەت ەتۋىن توقتاتقان جاعدايدا عانا قوسىلادى.
ايتالىق, بۇعان دەيىن ۇيالى بايلانىس وپەراتورى ابونەنتتە قانداي دا ءبىر تاريفتىك جوسپار بولماسا, ونى وزدەرى ابونەنتتىڭ كەلىسىمىنسىز كەز كەلگەن تاريفتىك جوسپارعا قوسا الاتىن. ەندى ولار وزگەرىستى جىلىنا ءبىر رەت قانا ەنگىزە الادى جانە بۇل تۋرالى ابونەنتتى ناقتى وزگەرىستەرگە دەيىن كۇنتىزبەلىك وتىز كۇن بۇرىن حاباردار ەتۋگە مىندەتتى.
"قازاقتەلەكوم" اق 2019 جىلدىڭ 1 قاڭتارىنان باستاپ 3499 تەڭگەگە جاڭا "باستاپقى" پاكەتتىك تاريفتىك جوسپارى ەنگىزىلدى. بۇل توپتاما قولدانىستاعى ەڭ تومەنگى تاريفتىك جوسپاردان (3 550 تەڭگە) 5,5% تومەن جانە وعان 10 مبيت/س دەيىنگى جىلدامدىقپەن ينتەرنەت قىزمەتتەرى جانە قازاقستان بويىنشا ءليميتسىز قوڭىراۋلارمەن تەلەفون بايلانىسى مەن التەل/تەلە2 جەلىسىنە قوڭىراۋ شولۋ كىرەدى.
ال "قازترانسكوم" اق ابونەنتتى بايلانىس قىزمەتتەرىنە قوسۋ بويىنشا جۇمىستاردى جۇرگىزۋگە 50% جەڭىلدىك, سونداي-اق تەلەفوننىڭ ابونەنتتىك تولەمىنە اي سايىنعى 10% جەڭىلدىك جانە ينتەرنەت قىزمەتتەرىنىڭ ابونەنتتىك تولەمىنە 15% جەڭىلدىك ۇسىنادى. "ترانستەلەكوم" اق ۇوس قاتىسۋشىلارى مەن مۇگەدەكتەرى جانە ولارعا تەڭەستىرىلگەن تۇلعالار ءۇشىن ينتەرنەت جەلىسىنە قاتىناۋ قىزمەتىنە 5% جەڭىلدىك ۇسىنادى.
"كار-تەل" جشس جاڭا "الەۋمەتتىك", "الەۋمەتتىك پليۋس" تاريفتىك جوسپارلارىنىڭ جەلىسى جانە "مۇعالىمدەر مەن وقۋشىلارعا ارنالعان" تاريفتىك جوسپارى ازىرلەندى. تاريفتىك جوسپار بويىنشا ابونەنتتەر ۇيالى بايلانىس قىزمەتتەرىن ايتارلىقتاي تومەندەتىلگەن باعامەن (590 تەڭگەدەن باستاپ) الادى.
سونىمەن بىرگە "ەرەكشە" تك "كسەلل" اق-دا "كسەلل" ابونەنتتەرى ءۇشىن قازىر دە قولجەتىمدى بولماق. تاريفتىك جوسپار بويىنشا 1 جانە 2 توپ مۇگەدەكتەرى مەن ەستۋ قابىلەتى ناشار مۇگەدەكتەر جەلى ىشىندە 1 تەڭگەدەن, باسقا وپەراتورلاردىڭ جەلىسىنە 9 تەڭگەدەن, باسقا وپەراتورلاردىڭ جەلىسىنە 1 SMS ءۇشىن 2 تەڭگەدەن شىعىس بايلانىس الادى.
ايتىلعان ماسەلەلەر الەمدىك مىنبەردە دە شەشىمىن تاپتاي كەلەدى. سەبەبى جاھاندى جاۋلاعان پاندەميانىڭ اسەرى روۋمينگتىك بايلانىسقا دا زاردابىن تيگىزۋدە. روۋمينگتى تۇتىنۋشىلار سانىنىڭ وسۋىنە قاراماستان, وپەراتورلار حالىقارالىق روۋمينگتەن جوسپارلانعان كىرىستى جىل سوڭىنا دەيىن قالپىنا كەلتىرگىسى جوق.
