وبلىستاعى 1 185 الەۋمەتتىك نىسانعا بيىلعى قىستان شىعۋ ءۇشىن 39,5 مىڭ توننا كومىر جانە 26 مىڭ توننا سۇيىق وتىن قاجەت. ءالى دە گاز جەتە قويماعان ەلدى مەكەندەردەگى تۇرعىندارعا 163,6 مىڭ توننا كومىر كەرەك. جالپى وڭىردە 30 كومىر قويماسى بار.
– قازىر تۇرعىندارعا قاجەتتى كومىردىڭ 85 مىڭ تونناسى جەتكىزىلدى. كومىر باعاسىنىڭ وسۋىنە جول بەرمەۋ ماقساتىندا ءوندىرۋشى كاسىپورىندارمەن تىكەلەي كەلىسىمشارت جاساۋ باعىتىندا جۇمىستار اتقارىلۋدا. قىسقا دايىندىقتى وبلىستىق شتاب تۇراقتى باقىلاۋدا ۇستاپ وتىر, – دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى ەرلان جاڭاباەۆ.
«قازترانسگاز ايماق» اق قىزىلوردا وندىرىستىك فيليالى الداعى جىلۋ ماۋسىمىنا بايلانىستى گازدى قاۋىپسىز پايدالانۋ باعىتىندا ايلىق جاريالاپ وتىر. شارا اياسىندا فيليال وكىلدەرى تۇتىنۋشىلارعا نۇسقاۋلىقتار مەن جادىنامالار تاراتا وتىرىپ, تۇسىندىرمە جۇرگىزەتىن بولادى. قاۋىپسىزدىك تالاپتارى ورەسكەل بۇزىلعان جاعدايدا نىسان گاز جۇيەسىنەن اجىراتىلادى.
«قازترانسگاز ايماق» اق قىزىلوردا وندىرىستىك فيليالى ديرەكتورىنىڭ ءبىرىنشى ورىنباسارى ەرمەك قالدىعۇلوۆ تۇتىنۋشىلاردا گاز تۇتىنۋ جۇيەلەرىنە تەحنيكالىق قىزمەت كورسەتۋگە ارنالعان شارتتاردىڭ بولۋى كەرەگىن ايتىپ وتىر. سونداي-اق تۇتىنۋشىلار ءتۇتىن جانە جەلدەتۋ ارنالارىن مەزگىلدى تەكسەرۋدەن وتكىزىپ, تازالاپ جارامدىلىق تۋرالى اكتىلەرىن الۋى كەرەك, قاۋىپسىزدىك ماقساتىندا مەتان مەن سو ۋلى گازىنا سيگناليزاتور ورناتقانى ءجون.
كوممۋنالدىق قىزمەت تولەماقىسىنىڭ جينالۋى ءتۇيىندى ماسەلەنىڭ ءبىرى ەكەنى راس. وسىعان بايلانىستى قازىر «قازترانسگاز ايماق» اق قوف فيليالى مەن «رتسكۋ-قىزىلوردا» جشس ماماندارى بىرلەسكەن رەيد وتكىزىپ, قارىزى قوردالانعان تۇتىنۋشىلاردى گازدان اجىراتۋعا ءماجبۇر.
قازىر تۇتىنۋشىلاردىڭ گازعا بەرەشەگى 1 ملرد تەڭگەدەن اسقان. «قازترانسگاز ايماق» اق قوف ماماندارى تۇتىنۋشى تۇبىرتەك پاراعىنا سايكەس ءار ايدىڭ 25-نە دەيىن تولەم جاساۋى قاجەتتىگىن ەسكەرتىپ وتىر.
وسىنداي قيىندىقتارعا قاراماستان جىلۋ بەرۋ ماۋسىمى مەرزىمىندە باستالادى. جاۋاپتى مەرزىمدى ويداعىداي وتكىزۋ ءۇشىن جان-جاقتى دايىندىق جاسالعان.
قىزىلوردا
