ايماقتا قازاقستان رەسپۋبليكاسىنىڭ تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىن ىسكە اسىرۋ اياسىندا «ماڭعىستاۋ تۋريستىك ايماعى» ءىس-شارالار جوسپارىن جۇزەگە اسىرۋ جۇمىستارى جۇرگىزىلىپ جاتىر. 2018 جىلى ەلباسى ن.نازارباەۆتىڭ اقتاۋ زاماناۋي تەڭىز كۋرورتىنا اينالۋى ءتيىس دەگەن تاپسىرماسىنان كەيىن, تۋريزم دامۋىنا اسا زور كوڭىل ءبولىنىپ, ءوڭىردىڭ ينجەنەرلىك-كولىك ينفراقۇرىلىمىن دامىتۋ جۇمىستارى جۇرگىزىلۋدە.
ماڭعىستاۋ وبلىستىق ينۆەستيتسيالار جانە ءتۋريزمدى دامىتۋ باسقارماسى باسشىسىنىڭ ورىنباسارى ت.ەدىگەەۆتىڭ ايتۋىنشا, 2020 جىلدىڭ 1-جارتىجىلدىعىنىڭ قورىتىندىسىنا سايكەس تۋريزم سالاسى بويىنشا نەگىزگى كاپيتالعا سالىنعان ينۆەستيتسيا كولەمى 67,0 ملرد تەڭگەنى قۇراعان. الەمدىك برەندتەردىڭ قىزىعۋشىلىعىن, مەملەكەتتىڭ قولداۋىن سەزىنگەن جەرگىلىكتى كاسىپكەرلەر «جىلى جاعاجاي» اۋماعىندا ينۆەستيتسيا كولەمى 30,5 ملرد تەڭگەنى قۇرايتىن جاڭا «فلامينگو رەزورت» دەمالىس بازاسىن قايتا قۇرىلىمداۋ, «نۇر» 5 جۇلدىزدى كوپفۋنكتسيونالدى ەمدەۋ-دياگنوستيكالىق جانە ساۋىقتىرۋ كەشەنى قۇرىلىسى, «Assyl Aktau» تەرمالدى جىلى سۋىمەن دەمالىس بازاسىنىڭ قۇرىلىسى جانە «Seaside Palace» دەمالىس ايماعىنىڭ قۇرىلىسى سىندى ءتورت تۋريستىك جوبانى ىسكە اسىرۋعا كىرىستى.
سونىمەن قاتار دەمالۋعا كەلگەن قوناقتار تەك قوناقۇي اۋماعىندا قالىپ قويماي, ولكەنىڭ كوز تارتىمدى جەرلەرىن, تابيعاتىن, تاريحي-مادەني, تۋريستىك نىساندارىن تاماشالاۋ ءۇشىن تۋريستىك مارشرۋتتار انىقتالدى. ولكەنىڭ كوركىن تاماشالاۋشىلار ءۇشىن ءبىرىنشى قاراقيا اۋدانى بويىنشا «بوزجىرا» شاتقالى باعىتى, ەكىنشى تۇپقاراعان اۋدانى بويىنشا «سارتاس» باعىتى ۇسىنىلسا, ءۇشىنشى باعىت بولىپ ماڭعىستاۋ اۋدانىنداعى «كوگەز ەتنواۋىلى» باعىتى تاڭدالدى.
قازىرگى تاڭدا اقتاۋ قالاسىنىڭ «جىلى جاعاجاي» اۋدانىنداعى تەڭىز كۋرورتتىق ايماعىن ەلەكترمەن جابدىقتاۋ جۇمىستارى جۇرگىزىلۋدە. جوباعا سايكەس ءبىرىنشى كەزەكتە 2020 جىلى پس-110/10كۆ «بازا وتدىحا» قوسالقى ستانساسىنداعى 1ح2,5 مۆا قۋاتتىق ترانسفورماتورلارىن 2ح16 مۆا ترانسفورماتورلارىنا اۋىستىرىلىپ, ۇزىندىعى 10,5 كم 10كۆ ەلەكتر جەلىسىنىڭ قۇرىلىسى اياقتالدى. ەكىنشى كەزەكتە 2021 جىلى وڭتۇستىك باعىتتا پس-110/10كۆ «دەمالىس ايماعى» قوسالقى ستانساسىنان ۇزىندىعى 10,3 كم 10 كۆ ەلەكتر جەلىسى سالىنادى.
اقتاۋ قالاسىنىڭ «جىلى جاعاجاي» اۋدانىنداعى تەڭىز كۋرورتتىق ايماعىنىڭ سۋمەن, گازبەن جابدىقتاۋ جۇيەلەرىنىڭ قۇرىلىسى جۇرگىزىلۋدە. سۋمەن جابدىقتاۋ بويىنشا جوبادا جالپى ۇزىندىعى 56 شاقىرىم سۋ قۇبىرلارى جەلىسىنىڭ جانە 65 قۇدىقتىڭ قۇرىلىسىن سالۋ قاراستىرىلعان. قازىرگى تاڭدا 48 شاقىرىمىنا ترانشەيا قازۋ جۇمىستارى جۇرگىزىلدى, 48 شاقىرىمىنا سۋ قۇبىرى جەلىسى جۇرگىزىلدى.
اقتاۋ قالاسىنان كاسپي تەڭىزىنىڭ جاعالاۋى بويىنداعى قۇرىق پاروم كەشەنىنە دەيىنگى ۋچاسكەدەگى تەڭىز كۋرورتىن دامىتۋ جۇمىستارى جۇرۋدە. جوباعا سايكەس تەڭىز جاعالاۋىنداعى ينفراقۇرىلىمدى دامىتۋ بويىنشا جالپى قۇنى 17,8 ملرد تەڭگەنى قۇرايتىن 70,8 شاقىرىمدى قامتيتىن 5 جوبا جاساقتالدى. بۇگىنگى تاڭدا جالپى قۇنى 11,2 ملرد تەڭگەنى قۇرايتىن ءۇش جوبا بويىنشا جۇمىستار جۇرگىزىلۋدە.
وڭىردەگى تۋريزم سالاسىن دامىتۋ ءۇشىن وزەكتى ماسەلەلەر, ۇسىنىستار مەن ەسكەرتۋلەر بويىنشا جاسالاتىن جۇمىستار انىقتالىپ, ايماقتا تۋريزم سالاسىن دامىتۋدىڭ جول كارتاسىن جاساقتاۋ قاجەتتىگى تۋىنداپ وتىر.
ماڭعىستاۋ – ءتۋريزمدى تۇلەتۋ ءۇشىن مۇمكىندىگى مول ءوڭىر. بىراق تۋريزممەن تارتۋ ءۇشىن دە, تۋريزم سالاسىن دامىتقان ءوڭىر رەتىندە تانىلۋ ءۇشىن دە ءالى تالاي جۇمىس, ءالى تالاي ۋاقىت قاجەت ەكەندىگى دە بەلگىلى.
ماڭعىستاۋ وبلىسى
