11 قاراشادان باستاپ «قازاقستان» ۇلتتىق تەلەارناسى «اۋىل ساقشىسى» اتتى جاڭا تەلەسەريال كورسەتە باستايدى. ەندى بۇل پرەمەرا «اياق-استىنان قايدان پايدا بولا كەتتى, كىمدەر جاسادى» دەگەن ماسەلەگە توقتالايىق...
11 قاراشادان باستاپ «قازاقستان» ۇلتتىق تەلەارناسى «اۋىل ساقشىسى» اتتى جاڭا تەلەسەريال كورسەتە باستايدى. ەندى بۇل پرەمەرا «اياق-استىنان قايدان پايدا بولا كەتتى, كىمدەر جاسادى» دەگەن ماسەلەگە توقتالايىق...
ءسابيت قۇرمانبەكوۆ – قىلقالامىن قايقى قىلىشتاي سەرمەپ جۇرگەن تانىمال كاريكاتۋراشى-سۋرەتشى. ەلىمىزدە ەسىمى كاريكاتۋراشى-سۋرەتشى, كينو-قويۋشى قىزمەتىمەن تانىمال بولعان ونەرلى ازامات بۇل جولى كينوسەريالدىڭ رەجيسسەرى تۇعىرىندا جاڭا قىرىنان تانىلماق. ۆيكتور كليموۆ – قازاقستان كورەرمەنىنە دەرەكتى فيلمدەردىڭ اۆتورى رەتىندە تانىلعان بەلگىلى تەلە-جۋرناليست, قازىر كينو وندىرىسىنە, ونىڭ ىشىندە تەلەسەريالدارعا پروديۋسەرلىك ەتىپ كەلەدى. جاڭا سالادا «قالامىن سىناعان» ونىڭ «ءبىزدىڭ زامانىمىزدىڭ قاھارمانى» ءفيلمى كورەرمەنىن بەيجاي قالدىرماعانى كوپشىلىككە ءمالىم. بەيبارىس جۇمانيازوۆ – مۋزىكانت. اتاقتى «ۇركەر» توبىنىڭ بايىرعى مۇشەسى. بۇگىندە كينوعا ستسەناري جازۋمەن اينالىسادى. ال بەيبارىستىڭ «ۇركەر» توبىنداعى ارىپتەسى, كومپوزيتور ايدوس ساعاتوۆ ءبىز ايتىپ وتىرعان وسىناۋ «اۋىل ساقشىسى» تەلەسەريالىنىڭ مۋزىكاسىن جازىپ شىقتى.
مىنە, وزدەرىڭىز بايقاعانداي, سەريالدىڭ اۆتورلارى, ءبىر قاراعاندا, كينو الەمىندە كەزدەيسوق باس قوسقان, ليبەرال, مەملەكەتتىك ارنانىڭ كىرپياز تالاپتارىن ءتۇسىنىپ تە بىلمەگەن جاندار سەكىلدى. الايدا, وسىناۋ جاڭا تۋىندىدان ۇلتتىق ارنانىڭ جاڭا زامانعى جاڭاشا ىزدەنۋ تاجىريبەسىنە ەش نۇقسان كەلمەگەنى انىق. «قازاقستان» 11 قاراشادان باستاپ يمپورتتىق سەريالداردى تاعى دا بەلگىلى مولشەردە قىسقارتۋعا ءماجبۇر... ويتكەنى, ەكرانعا «اۋىل ساقشىسى» شىعادى! «اۋىل ساقشىسى» ءفيلمىنىڭ بۇل قادامى وتاندىق كينو ءوندىرىسىنىڭ بۇگىنگى بۇلقىنىسىنان سىر تارتقانداي. بۇل قۇبىلىستى ۇلتتىق ارنانىڭ مەملەكەتتىڭ باستى ساياساتى – اۋىلعا بەتبۇرىس باعىتىمەن ۇندەسۋى دەسە دە جاراسامدى بولىپ تۇر.
ءفيلمنىڭ وقيعاسى قاراپايىم جەلىدە قۇرىلعانمەن, بۇگىنگى كۇنگى كوكەيكەستىلىگىمەن, زارۋلىگىمەن كورەرمەنىن بىردەن باۋرايدى. اردى اياققا باسقان اتتوبەلىندەي ازعانتاي توپ پايدالى قازبا تابىلعان اۋىلدىڭ اينالاسىندا تەرىس پيعىلدى ويمەن «ورمەكشىنىڭ تورىن قۇرىپ» الەككە تۇسەدى. كەزەكتى تەكسەرۋ ىسىمەن قالادان اۋىلعا از ۋاقىتقا اتباسىن بۇرعان پوليتسيانىڭ جاس لەيتەنانتى بۇل جەردە كەزدەيسوق كىدىرەدى. ءارينە, ارينە, اۋەلدە ...اۋىلدىڭ قىزىعى مەن شىجىعىنا باتىپ, ديىرمەننىڭ تاسىنداي شىر اينالىپ ەسىنەن تانعان قالا بالاسى تەزىرەك بۇل يىرىمنەن قۇتىلۋعا اسىققان. الايدا, لەيتەنانتتى كىدىرتكەن تالشىبىقتاي مايىسقان اۋىل قىزىنا دەگەن شوقتاي سەزىم ەدى... قىزمەتتىك بورىش پەن جەكە ومىرىندەگى سەزىم اۋەزدەرى اينالىپ كەلىپ ناعىز بۇگىنگى كۇننىڭ قاھارمانى – پوليتسيا پوگونىنداعى باتىردىڭ بولمىسى سومدالادى. كورەرمەن وسىنى بايقايدى.
شىنايى اۋىل ءومىرى تۋرالى سەريالدى «قازاقستان» ۇلتتىق ارناسىنىڭ قازىرگى ساياسي جاعداياتتاردىڭ پەرنەسىن ءدوپ باسۋى دەمەسكە امالىڭ جوق. بارشاعا ءمالىم, بيىلعى 1 قاراشادان باستاپ, ەلىمىزدىڭ كوشەلەرىنە امبەباپ پولياتسيا قىزمەتكەرى شىقتى. سونىڭ ءىزىن الا ۇلتتىق ارنا ول قىزمەتكەردىڭ قانداي بولۋ كەرەكتىگى جايىندا كوركەم شەجىرە ۇسىنىپ وتىر. شىنايى ۇيلەسىمدىلىك! اقيقاتى سولاي, ەشقانداي دا پافوسسىز بەينەلەنەتىن تەلەسەريال پوليتسيا قىزمەتكەرىن ادەتتەگىدەي قامشىنىڭ استىنا الا بەرمەي, ونىڭ كىمگە دە بولسا دوس, جولداس, قاجەتتى كەزىندە قولۇشىن بەرەتىن كومەكشى ەكەنىن كورسەتەدى. اۋىل ساقشىسىنىڭ (پوليتسيا ينسپەكتورىنىڭ) مىندەتى – حالىقتى قورعاۋ, حالىققا قولۇشىن بەرۋ ەكەنىن قايتالاپ ەسكە سالادى!
سونىمەن, قازىرگى قازاق كينوسەريالدارى قاتارىندا ءوزىنىڭ جايدارى دا ۋىتتى سىقاق-ازىلگە باي كورىنىستەرىمەن, اينالايىن اۋىلدىڭ بۇگىنگى ءومىرى مەن ونىڭ قاراپايىم ادامدارىنىڭ بەينە-بولمىسىن اينا-قاتەسىز سومداعان فيلم كورەرمەنگە جول تارتتى. شىعارمانىڭ كۇللى جەلىسىن كوز الدىمىزدان تىزبەكتەپ وتكىزگەن ءبىزدىڭ ويىمىز وسىنداي. ال ءسىزگە, قۇرمەتتى كورەرمەن, «اۋىل ساقشىسى» سەريالىنىڭ پرەمەراسى «قازاقستان» ۇلتتىق ارناسىنان 11 قاراشادا 19.30 ساعاتتا كورسەتىلەتىنىن ەسكەرتكىمىز عانا كەلەدى.
تالعات ءسۇيىنباي,
جۋرناليست.
الماتى.
