سىرتقى ىستەر ءمينيسترى مۇحتار تىلەۋبەردى Horasis تاۋەلسىز تالداۋ ورتالىعىنىڭ جوعارى دەڭگەيدەگى بەينەكونفەرەنتسياسىنا قاتىستى.
بۇۇ 75 جىلدىعىنا ارنالعان ءىس-شارادا ارمەنيا پرەزيدەنتى ارمەن ساركيسيان جانە بۇۇ باس حاتشىسىنىڭ بۇۇ 75 جىلدىعىن مەرەكەلەۋگە دايىندىق جونىندەگى ارنايى كەڭەسشىسى فابريتسيو حوحشيلد ءسوز سويلەدى.
تالقىلاۋدىڭ نەگىزگى تاقىرىبى كوروناۆيرۋس پاندەمياسىن جانە باسقا دا جاھاندىق سىن-قاتەرلەردى جەڭۋ جولىنداعى حالىقارالىق قوعامداستىقتىڭ كوپجاقتى كۇش-جىگەرىنىڭ ءرولى بولدى. قاتىسۋشىلار بۇۇ وسى پروتسەستى ۇيلەستىرۋدە جەتەكشى ءرول اتقارۋى كەرەك دەگەن پىكىرگە كەلدى.
پرەزيدەنت قاسىم-جومارت توقاەۆ بۇۇ 75-ءشى سەسسيانىڭ جالپى ساياسي پىكىرتالاستارىندا اتاپ وتكەندەي, بۇۇ پاندەميا سالدارىن ەڭسەرۋ, ەكونوميكالىق قالپىنا كەلتىرۋدى جەدەلدەتۋ جانە جاھاندىق باسقارۋدى جاقسارتۋ بويىنشا حالىقارالىق كۇش-جىگەردى ۇيلەستىرۋى ءتيىس. فورۋم Horasis Visions قاۋىمداستىعىنىڭ جوعارى لاۋازىمدى مۇشەلەرىن بىرىكتىردى جانە 20-دان استام پلەنارلىق وتىرىس پەن پانەلدىك پىكىرتالاستاردى قامتيدى. بۇۇ باس حاتشىسى انتونيۋ گۋتەرريش ءىس-شارادا ءسوز سويلەدى. Horasis ورتالىعى 2005 جىلى ىنتىماقتاستىق پەن ءبىلىم الماسۋ ءۇشىن اسىرەسە دامىعان ەلدەر مەن دامۋشى نارىقتار اراسىندا جاڭا پلاتفورمالار قۇرۋ ارقىلى "ورنىقتى بولاشاق ماقساتتارىن جۇزەگە اسىرۋ" ماقساتىندا قۇرىلدى.
