اتالعان جوبالار 2020-2025 جىلدار ارالىعىندا ىسكە اسىرىلادى. ولاردىڭ قاتارىندا حيميا ونەركاسىبى, اگروونەركاسىپ كەشەنى, مەتاللۋرگيا, فارماتسەۆتيكا, ماشينا جاساۋ سالالارىنداعى جوبالار بار. سونداي-اق بۇگىنگى تاڭدا تۇرىك جانە نەمىس ينۆەستورلارى دا جامبىل جەرىنە قىزىعۋشىلىق تانىتىپ وتىر. ولار بۇل ماقساتتا ءوڭىر قازىناسىنا ينۆەستيتسيا سالۋعا نيەتتى. ەگەر جوبالار جۇزەگە اسقان جاعدايدا جەرگىلىكتى تۇرعىندار جۇمىسپەن قامتىلىپ, ءوڭىردىڭ ەكونوميكالىق الەۋەتى ارتاتىن بولادى. دەگەنمەن بۇگىندە ايماقتا جۇمىس ىستەپ جاتقان الىپ كومپانيالار دا بار.
ماسەلەن, تۇرىكتەردىڭ «Yildirim Holding» كومپانياسى سارىسۋ اۋدانىندا كالتسيلەندىرىلگەن سودا وندىرەتىن زاۋىت سالۋدى جوسپارلاۋدا. جۋىردا عانا وبلىس اكىمى بەردىبەك ساپارباەۆ اتالعان كومپانيانىڭ وكىلدەرىمەن كەزدەسىپ, زاۋىت سالۋ جوباسىن تالقىلاعان بولاتىن. «Yildirim Holding» كومپانياسىنىڭ باس ديرەكتورى يسمايل دجەيلاننىڭ ايتۋىنشا, زاۋىت قۇرىلىسى كەلەسى جىلى باستالادى. الىپ نىساننىڭ جىلدىق جوبالىق قۋاتى 400 مىڭ توننانى قۇرايدى. بولاشاقتا بۇل كورسەتكىش جىلىنا 1,2 ملن تونناعا دەيىن ارتادى دەپ جوسپارلانعان. ول نىسان قۇرىلىسىنا 325 ملن دوللار ينۆەستيتسيالاناتىنىن جەتكىزدى. ال ونىڭ قۇرىلىس-مونتاجداۋ جۇمىستارى كەلەسى جىلى باستالىپ, وعان 1500-دەن استام ادام تارتىلادى. جوبا 2023 جىلى پايدالانۋعا بەرىلەتىن بولادى. ول ىسكە قوسىلعاننان كەيىن بيۋدجەتكە جىل سايىن 8 ملن دوللار مولشەرىندەگى سالىق ءتۇسىمى تۇسەدى دەپ كۇتىلۋدە. وندا 250 ادام تۇراقتى جۇمىسپەن قامتىلادى. كاسىپكەردىڭ ايتۋىنشا, كاسىپورىن جۇمىسىنا جەرگىلىكتى ماماندار دا تارتىلادى. سونداي-اق ي.دجەيلان ونىمدەرى قازاقستاندا عانا ەمەس, الەمدىك نارىقتا دا سۇرانىسقا يە بولاتىنىن ايتتى. تۇرىكتەر اشقالى وتىرعان زاماناۋي ءوندىرىس ورىنى تولىعىمەن قالدىقسىز جۇيەدە جۇمىس ىستەپ, قالدىقتار قايتا وڭدەلەتىن بولادى.
بۇگىندە جامبىل وبلىسىندا گەرمانيا مەملەكەتىنىڭ دە ەكى كومپانياسى جۇمىس ىستەيدى. نەمىستەردىڭ وڭىردەگى ءىرى جوبالارىنىڭ ءبىرى «Monterro Qazaqstan» جشس قىمبات مەتالداردى وندىرۋمەن اينالىسادى. سالىنعان ينۆەستيتسيا كولەمى 600 ملن ەۋرونى قۇرايدى. اتالعان كومپانيا وبلىس اۋماعىندا 2014 جىلدان باستاپ ىسكە قوسىلعان. سونداي-اق وڭىردە بيوگاز قوندىرعىلارىمەن اينالىساتىن تاعى ءبىر گەرمانيالىق كومپانيا بار. الداعى ۋاقىتتا گەرمانيالىق الپاۋىت كاسىپورىندار وڭىرگە تاعى دا ينۆەستيتسيا سالۋعا نيەتتى. اسىرەسە ولار اۋىل شارۋاشىلىعى سالاسىنداعى ىنتىماقتاستىقتى ارتتىرۋ ماسەلەسىن قولعا الۋدا. بۇل ورايدا, وبلىس اكىمى ب.ساپارباەۆ گەرمانيا فەدەراتيۆتىك رەسپۋبليكاسىنىڭ الماتى قالاسىنداعى باس كونسۋلى كريستيانا ماركەرتپەن كەزدەسكەن بولاتىن. ال ەكونوميكالىق ارىپتەستىكتى دامىتۋ ماقساتىندا كەلەسى جىلدىڭ ناۋرىز-ءساۋىر ايلارىندا گەرمانيا باس كونسۋلدىعىنىڭ ەكونوميكالىق دەلەگاتسياسى جامبىل وبلىسىنا كەلۋدى جوسپارلاپتى. ال بۇگىنگى تاڭدا باۆاريانىڭ دەلەگاتسياسى ءوڭىردىڭ اۋىل شارۋاشىلىعى سالاسىنا باسىمدىق بەرىپ وتىرسا, ءوز كەزەگىندە وبلىس اكىمدىگى نەمىس كاسىپكەرلەرىمەن بالامالى ەنەرگيا كوزدەرى سالاسىندا ارىپتەستىك ورناتۋعا مۇددەلى بولىپ وتىر.
بۇگىندە وبلىسقا تۇرىكتەر مەن نەمىستەردىڭ تاراپىنان ءتۇسىپ جاتقان ۇسىنىس كوپ. بىراق جوبا قالاي جۇزەگە اسادى, جوسپارلانعان قۋاتتىلىعىنا شىعا الا ما, ول جاعى ۋاقىتتىڭ ەنشىسىندە. ماسەلەن, مويىنقۇم, مەركى, شۋ, جۋالى جانە وزگە دە اۋدانداردا كەزىندە اشىلىپ, بۇگىندە جابىق تۇرعان كاسىپورىندار كوپ. الايدا ايتىلعان جوبالار شىنىمەن جۇزەگە اسىپ, جوسپارلار ورىندالعان جاعدايدا سارىسۋ اۋدانى كالتسيلەندىرىلگەن سودا ءوندىرۋ جاعىنان وزگەلەرمەن باسەكەلەس بولۋى دا مۇمكىن. بىراق بۇل ازىرگە بولجام عانا. سول سياقتى, جامبىل وبلىسىندا قاراسورا وڭدەيتىن زاۋىت سالۋعا دا وزگە ينۆەستورلار نيەتتى. بۇگىندە وبلىس اۋماعىندا 100 مىڭ گەكتاردان استام كولەمدە جابايى قاراسورا بار. الەمدىك تاجىريبە بويىنشا, قازىرگى كەزدە كاننابيستى مەديتسينالىق ماقساتتا زەرتتەۋ جانە پايدالانۋ قارقىن الۋدا. ەندى وڭىردە باسقا مەملەكەتتەردىڭ ءتيىمدى تاجىريبەسىن نەگىزگە الا وتىرىپ, كاننابيستى دارىلىك ماقساتتاردا پايدالانۋعا مۇمكىندىك بەرەتىن قاۋىپسىز جانە ءتيىمدى جۇيە قۇرىلاتىن بولدى. ماسەلەن, «Zhana Zhol Holding limited» جشس ديرەكتورى الەكساندر كيم وبلىس اۋماعىندا مەديتسينالىق كاننابيس ءوسىرۋ مەن ءوندىرۋ بويىنشا جوباسىن ۇسىنعان. ەگەر بۇل دا جۇزەگە اسقان جاعدايدا, ءوڭىردىڭ ەكونوميكالىق قۋاتىن جاڭا ورىسكە شىعاراتىن جوبا بولماق.
جامبىل وبلىسى
