ايماقتار • 02 قازان، 2020

جەدەل جاردەم كولىكتەرى ساتىپ الىندى

اقتوبەگە جەتكىزىلگەن 19 جاڭا جەدەل جاردەم كولىگىنىڭ 13-ءى اۋداندىق اۋرۋحانالارعا جونەلتىلىپ، 6-ۋى اقتوبە قالاسىنداعى جەدەل جاردەم بەكەتىنە بەرىلدى.

بايان قۋاندىققىزى

قازىر وڭىردە ەپيدەميالىق جاعداي تۇراقتانعان. وبلىس ورتالىعىندا جەدەل جاردەم شاقىرتۋ ءۇش ەسە، ناۋقاستاردى ستاتسيونارلارعا جاتقىزۋ 10 ەسەگە تومەندەپ، قالالىق جۇقپالى اۋرۋلار اۋرۋحاناسىنداعى توسەكتىك ورىن جۇكتەمەسى 78%-دان 16،2%-عا ازايعان. دەگەنمەن، كۇن سۋىتا سۋىق تيۋ مەن جەدەل رەسپيراتورلى سىرقاتتاردىڭ كوبەيۋىمەن قايتادان COVID-19 كۇشەيۋى مۇمكىن دەگەن بولجام بار بولعاندىقتان الدىن الا دايىندىق جۇرگىزىلدى.

پنەۆمونيامەن سىرقاتتانۋشىلار ءۇشىن 315 توسەكتىك ورىن دايىندالسا، ودان باسقا 3 588 توسەكتىك ورىن رەزەرۆكە قويىلدى.

«قاجەت بولعان جاعدايدا توسەكتىك ورىنداردى 315-تەن 3 903-كە دەيىن، سونىڭ ىشىندە جانساقتاۋ بولىمىندەگى ورىندار سانىن 401-گە دەيىن كوبەيتۋ جوسپارلانىپ وتىر. جازدا 2 ەمدەۋ مەكەمەسى جوندەلىپ، ستاتسيونارلار قاجەتتى جابدىقتارمەن قامتاماسىز ەتىلدى. كەرەۋەتتەر وتتەگىمەن 93%-عا قامتىلىپ، ءۇش ستاتسيونار ورتالىقتاندىرىلعان وتتەگىمەن قامتاماسىز ەتىلدى. الداعى كۇندەرى وكپەنى جاساندى جەلدەتەتىن 147 اپپارات، كومپيۋتەرلىك توموگراف، 13 ستاتسيونارلىق رەنتگەن اپپاراتى، ەكى جىلجىمالى رەنتگەن اپپاراتى، اۆتونومدى وتتەگى بەكەتى مەن كاماز تۇرىندەگى ەكى جىلجىمالى مەديتسينالىق كەشەن جەتكىزىلەدى دەپ كۇتىلىپ وتىر»، دەيدى وبلىس اكىمىنىڭ ورىنباسارى نۇرجاۋعان قالاۋوۆ.

بۇل كۇندەرى 47 622 اقتوبەلىك تۇماۋعا قارسى ەگىلدى.

اقتوبە وبلىسىنىڭ اكىمى وڭداسىن ورازالين اۋدان اكىمدەرىنە بارلىق اۋرۋحانالاردىڭ سانيتارلىق تالاپتارعا سايكەستىگىن قاتاڭ تەكسەرىپ، مەديتسينالىق جابدىقتاردى، ءدارى-دارمەكتەر مەن جەكە قورعانىس زاتتارىن قايتا تۇگەندەۋدى تاپسىردى. ويتكەنى «سىرقات سانى كوبەيگەن جاعدايدا، قالالىق ستاتسيونارلارعا جۇك تۇسپەۋى كەرەك».

اقتوبە وبلىسى