قازاقستان رەسپۋبليكاسى وقۋ ءىسىنىڭ ۇزدىگى, «ى.التىنسارين» توسبەلگىسىنىڭ, الماتى قالاسى اكىمىنىڭ بيىلعى جاريالاعان گرانت يەگەرى, ۇستاز-تالىمگەر جايىندا ارىپتەستەرى «تاريح جانە قۇقىقتانۋ ءپانىنىڭ مۇعالىمى رەتىندە تەرەڭ تەوريالىق ءبىلىمىن عىلىمي نەگىزدە ۇشتاستىرا بىلەتىن بىلىكتى مامان گۇلميرا ساعاتقىزى – ءاربىر ساباعىن ىزدەنىمپازدىقپەن جۇرگىزەتىن, ءارى ءارتۇرلى ءادىس-تاسىلدەردى ءتيىمدى پايدالانا وتىرىپ, وقۋشىلاردىڭ ويلاۋ قابىلەتى مەن تانىمدىق دەڭگەيىن ارتتىرۋدان جالىقپايتىن ۇستاز» دەپ پىكىرىن ءبىلدىردى.
ىزدەنىس پەن ءبىلىمىن جەتىلدىرۋدى ءوز كاسىبىنىڭ ءبىر بولشەگىنە اينالدىرعان ۇستازدىڭ جەتىستىكتەرى جايىندا ۇزاق اڭگىمەلەۋگە بولادى. دەگەنمەن بالا وقىتا ءجۇرىپ, ەلىمىزدىڭ ءبىلىم جۇيەسىنىڭ دامۋى, وقۋلىقتاردى جەتىلدىرۋ, ماماندار تاجىريبەسىن شىڭداۋداعى ەڭبەگى ءوز الدىنا دەسەك, گۇلميرا اسانبەكوۆا بۇگىندە رەسەي, پولشا, چەحيا, تاعى باسقا شەتەلدەردە وتكەن سەمينار-كونفەرەنتسيالارعا قاتىسىپ, ۇزدىك مامان ەكەنىن كورسەتىپ ءجۇر.
اباي اتىنداعى قازاق ۇلتتىق ۋنيۆەرسيتەتىن تاريح جانە قۇقىقتانۋ پاندەرىنىڭ وقىتۋشىسى ماماندىعى بويىنشا بىتىرگەن گۇلميرا اسانبەكوۆا ەڭبەك جولىن 1989 جىلى تالدىقورعان قالاسىنداعى №18 مەكتەپتەن باستادى. ال 20 جىلدان اسا ۋاقىتتان بەرگى ارالىقتا الماتى قالاسىنداعى №159 مەكتەپتە تاريح جانە قۇقىقتانۋ پاندەرىن وقىتىپ ءجۇر.
«مەنىڭ ۇستازدىق قىزمەتىمدە جولىم بولدى دەپ نىق سەنىممەن ايتا الامىن. ويتكەنى قانداي قيىن-قىستاۋ كەزەڭدەردە دە ءوزىم تاڭداعان كاسىپتى تاستاماۋعا, ءارى قاراي تاۋەلسىز ەلىمىزدىڭ جاس ۇرپاعىنا مەملەكەتىمىزدىڭ تاريحى, قۇقىقتىق قۇرىلىمى تۇرعىسىندا مەڭگەرگەن ءبىلىمدى جەتكىزۋدى ماقسات ەتتىم. ەڭبەك جولىمدا كاسىبي تالىمگەرلەردىڭ كەزدەسۋى دە مەنىڭ ءوز ىسىمە بەرىلىپ جۇمىس ىستەۋىمە بارىنشا ىقپال ەتتى», دەيدى گۇلميرا ساعاتقىزى.
تاريح ساباعىن وقىتۋداعى باستى ەرەكشەلىك بالالاردىڭ پانگە دەگەن قىزىعۋشىلىعىن وياتىپ, تانىم-تۇسىنىگىن جەتىلدىرۋ, دۇرىس باعىت-باعدار بەرۋ – وقىتۋشىنىڭ باستى مىندەتى. وسى تالاپتاردى قاپەردە ۇستايتىن بىلىكتى ۇستاز قاشىقتان ءبىلىم بەرۋدە ساباق بەرەتىن مۇعالىمگە دە, بالانىڭ جاعدايىن جاساپ وتىرعان اتا-انا مەن ءبىلىمدى يگەرىپ وتىرعان بالاعا دا سالماق تۇسەتىنىن ايتادى. قازىرگى كەزدە وقۋشىلار قاشىقتان ءبىلىم الۋعا توسەلىپ, تاپسىرمالاردى ەركىن مەڭگەرۋگە ماشىقتانىپ كەلەدى. ەڭ باستىسى – وقۋشىمەن تىكەلەي جۇمىس ىستەۋ, قانداي جاعدايدا دا جاردەم بەرۋ. كەيىپكەرىمىز وقۋشىلاردىڭ وقۋعا دەگەن ىنتاسى, قىزىعۋشىلىعى بالاعا دۇرىس تاپسىرما بەرگەندە عانا ارتاتىنىن ايتادى. سوندىقتان دا وقۋشىعا تاپسىرمالاردى ورىنداۋدا تاڭداۋ مۇمكىندىگىن بەرۋ ماڭىزدى.
پاندەميا كەزىندە تەلەۆيزيالىق ساباقتاردى تۇسىرۋگە ۇلەس قوسقان ۇستاز قاشىقتان ءبىلىم الۋ ۇلكەن جاۋاپكەرشىلىك پەن ىزدەنىستى تالاپ ەتەتىن پلاتفورما ەكەنىن اتاپ ءوتتى. العاشىندا كەمشىلىكتەردىڭ بولعانى راس دەسەك تە, قازىرگى كەزدە بالالاردىڭ قىزىعۋشىلىعى ارتىپ كەلەدى. بيىلعى وقۋ جىلىندا ءبىلىم پلاتفورمالارىن تاڭداۋ مۇمكىندىگى تۋدى. وسى ورايدا Microsoft Teams پلاتفورماسىنىڭ ەرەكشەلىكتەرىنە توقتالعان گ.ساعاتقىزى مۇندا تاپسىرمالار, تەست جۇمىستارى بالالاردىڭ زەيىنىن ارتتىرىپ, قابىلەتىن شىڭداۋعا مۇمكىندىك بەرەتىنىن العا تارتتى. دەگەنمەن قانداي دا ءبىر قيىندىقتارعا قاراماستان, پاندەميا كەزىندە قالا اكىمشىلىگى مەن ءبىلىم باسقارماسى تاراپىنان ۇستازداردىڭ بىلىكتىلىگىن ارتتىرۋعا بايلانىستى ۇيىمداستىرىپ وتىرعان شارالاردىڭ ماڭىزى جوعارى. ال جاڭاشىل پەداگوگ بولۋ ءۇشىن بىلىكتى ۇستازداردىڭ ەڭبەكتەرى مەن ءىس-تاجىريبەسىنەن ونەگە الۋ ماڭىزدى.
الماتى
