جالپى اۋدانى 45 000 شارشى مەتردى الاتىن جاڭا جاتاقحانا بەس قاباتتى ءۇش بلوكتان تۇرادى جانە ا. بايتۇرسىنوۆ پەن ك. ازىرباەۆ كوشەلەرىنىڭ قيىلىسىندا ورنالاسادى.
قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆتىڭ "بەس الەۋمەتتىك باستاماسى" نەگىزىندە جەكە ينۆەستيتسيالار ەسەبىنەن سالىناتىن ستۋدەنتتەر ءۇيى ۋنيۆەرسيتەت تاريحىنداعى ەڭ اۋقىمدى جوبا جانە ستۋدەنتتەر اراسىندا جاتاقحانالارداعى ورىن جەتىسپەۋشىلىگى ماسەلەسىن تولىعىمەن شەشەدى.
شاراعا ءبىلىم جانە عىلىم ۆيتسە-ءمينيسترى ميراس داۋلەنوۆ, "قارجى ورتالىعى" اق پرەزيدەنتى اسقار يبرايموۆ, اقپارات جانە قوعامدىق دامۋ ۆيتسە-ءمينيسترى اسحات ورالوۆ, ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, "مەگاسترويسەرۆيس" جاۋاپكەرشىلىگى شەكتەۋلى سەرىكتەستىگىنىڭ يننوۆاتسيالىق دامۋ جونىندەگى ديرەكتورى بالشەكەر مۇحامەدقىزى جانە پروفەسسور-وقىتۋىشالار مەن ستۋدەنت جاستار قاتىستى.
ستۋدەنتتەر ۇيلەرىندە ستۋدەنتتەردىڭ جايلى تۇرۋى, وقۋى, دەمالۋى ءۇشىن بارلىق جاعدايلار جاسالادى جانە اۋماقتا تاماقتانۋ مەن بوس ۋاقىتتى ءتيىمدى وتكىزۋ ورتالىقتارى, جاتتىعۋ زالدارى, سپورت الاڭدارى مەن ءومىر ءسۇرۋ ءۇشىن باسقا دا قولايلى جاعدايلار قاراستىرىلعان.
"مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە العاش جۇمىسقا كەلگەندە ستۋدەنتتەرگە زاماناۋي ۇلگىدەگى باسپانا سالۋدى ويلاعان ەدىم. ويتكەنى قالامىز ەلىمىزدىڭ استاناسى, شەتەلدەن قوناقتار كوپ كەلەدى. كەلگەن مەيماندار ەلىمىزدەگى بىردەن ءبىر جەتەكشى وقۋ ورداسى – ەۋرازيا ۇلتتىق ۋنيۆەرسيتەتىنە سوقپاي تۇرمايدى. سوندا ولار ءبىزدىڭ ستۋدەنتتەردىڭ قانداي جەردە تۇراتىنىن كورسە دەگەن وي بولعان. ارادا ءبىراز جىلدار وتسە دە, سول كەزدەگى العا قويعان ماقساتىم ورىندالدى, ەندى مىنە, نۇر-سۇلتان قالاسىنىڭ تورىنەن جاڭا ستۋدەنتتەر قالاشىعىنىڭ قازىعى قاعىلىپ وتىر. ينۆەستورلار ەكى جىلدان كەيىن پايدالانۋعا بەرەمىز دەدى. شىنىمدى ايتسام, ءبىلىم الۋشى ستۋدەنتتەرمەن بىرگە ءوزىم دە قاتتى قۋانىپ وتىرمىن. ويتكەنى ول جاتاقحانا دەگەن اتى بولماسا, زاماناۋي ۇلگىدەگى كادىمگى سەكتسيالىق ءۇي بولماق. وتە قۋانىشتىمىن", - دەدى ەلتاڭبا اۆتورى, وسىدان ەكى جىل بۇرىن پايدالانۋعا بەرىلگەن "ستۋدەنتتەر ءۇيىنىڭ" جوباسىن جاساۋشى, ەۋرازيا ۇلتتىق ۋنيۆەرسيتەتىنىڭ پروفەسسورى جانداربەك مالىبەكوۆ.
سونداي-اق ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ستۋدەنتتەر قالاشىعىنىڭ ىرگەتاسىن قالاۋ – ەۋرازيا ۇلتتىق ۋنيۆەرسيتەتى ءۇشىن تاريحي ءسات ەكەنىن اتاپ ءوتتى.
"بۇل تۇڭعىش پرەزيدەنت ن.ءا. نازارباەۆتىڭ بەس الەۋمەتتىك باعدارلاماسىنىڭ ءۇشىنشى باستاماسى: «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ» تاپسىرماسىنا وراي اتقارىلىپ جاتقان ىستەر. ءبىلىم جانە عىلىم مينيسترلىگى بۇل تاپسىرمالاردى ويداعىداي ورىنداپ كەلەدى, ويتكەنى ەلىمىزدەگى جوو-نىڭ الدى وزدەرىنىڭ جاتاقحانا قۇرىلىسىن باستاپ تا كەتتى, كەيبىرەۋلەرى ونى پايدالانۋعا بەرىپ تە ۇلگەردى.
ەۇۋ ستۋدەنتتەر قالاشىعىنىڭ ەرەكشەلىگى, ينۆەستورلار ءوز قاراجاتىنا سالىپ بەرەدى, قالاشىقتا جاستارعا نە كەرەك, ءبارى قامتىلعان. سوندىقتان «مەگاسترويسەرۆيس» جاۋاپكەرشىلىگى شەكتەۋلى سەرىكتەستىگى ۇجىمىنا ريزاشىلىعىمدى بىلدىرەمىن.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ءوزىنىڭ حالىققا ارناعان جولداۋىندا الەۋمەتتىك ماسەلەلەرگە, اسىرەسە ەلدىڭ جاعدايىن قامتاماسىز ەتۋگە, ونىڭ ىشىندە جاستارعا, ەرەكشە كوڭىل ءبولدى. بۇگىنگى شارا سول جولداۋدا بەرىلگەن تاپسىرمالاردىڭ ورىندالۋى دەپ بىلەمىن", - دەدى ول.
«مەگاسترويسەرۆيس» جاۋاپكەرشىلىگى شەكتەۋلى سەرىكتەستىگىنىڭ يننوۆاتسيالىق دامۋ جونىندەگى ديرەكتورى بالشەكەر مۇحامەدقىزىنىڭ ايتۋىنشا, «مەگاسترويسەرۆيس» جاۋاپكەرشىلىگى شەكتەۋلى سەرىكتەستىگى 2005 جىلى ماڭعىستاۋ وبلىسى اقتاۋ قالاسىندا تىركەلگەن. بۇل كومپانيانىڭ ينفراستۋكتۋرا جانە تۇرعىن ءۇي سالۋداعى تاجىريبەسى مول. ەۋرازيا ۇلتتىق ۋنيۆەرسيتەتىنىڭ جاتاقحانا قۇرىلىسى بويىنشا جاريالاعان كونكۋرسقا قاتىسىپ, جەڭىپ العان.
قۇرىلىس ءۇش بلوكتان تۇرادى جانە 2 361 توسەك-ورىنعا ارنالعان. ستۋدەنتتىك ۇيلەر عيماراتى بەس قاباتتى بولسا, جوبانىڭ قۇنى 7 ملرد تەڭگەنى قۇرايدى.
"ەۋرازيا ۇلتتىق ۋنيۆەرسيتەتىنىڭ رەكتورى ەرلان ءباتتاش ۇلى اعامىزعا ەلىمىزدىڭ تۇكپىر-تۇكپىرىنەن وقيتىن قازاق جاستارىنا جاعداي جاساپ, قامقور بولىپ جۇرۋدەگى جانە وسىنداي ۇلكەن جوبانى ىسكە اسىرۋىنا اتسالىسىپ جاتقانى ءۇشىن العىسىمىزدى بىلدىرەمىز. ەلدىڭ بولاشاعى ءۇشىن اتقارىپ جاتقان قىزمەتى تاريح الدىندا ەلەنۋىنە تىلەكتەسپىز. قۇرىلىس جۇمىسى نەگىزى 2020 جىلى كوكتەم ايىندا باستالۋى كەرەك ەدى, بىراق الەمدى جايلاعان ىندەتتىڭ سالدارىنان جۇمىسىمىز جارتى جىلعا كەشىكتى. اللا ءساتىن سالسا, ستۋدەنتتىك ۇيلەر كەشەنىن 2022 جىلى 30 تامىزعا دەيىن تولىقتاي ءبىتىرىپ, قازاقستان رەسپۋبليكاسىنىڭ كونستيتۋتسيا كۇنى پايدالانۋعا بەرەمىز", - دەدى بالشەكەر مۇحامەدقىزى.
ءىس-شارا سوڭى بولاشاق ۇرپاققا ارنالعان تاريحي جازبا قالدىرۋ راسىمىمەن اياقتالدى. وندا 2045 جىلعى ستۋدەنتتەرگە ارنالعان ۇندەۋلەر, تىلەكتەر, نۇسقاۋلار سالىنعان.
