قازاقستان • 01 قازان، 2020

قازاقستاندا اۆتوبۋس پاركتەرى جاڭارتىلۋدا

11 رەت كورسەتىلدى

تالداۋ مالىمەتتەرىنە سايكەس قازاقستاندا 12 مىڭنان استام اۆتوبۋستاردىڭ توزىعى جەتكەن، ولاردىڭ جارتىسىنان جۋىعىنىڭ كۇيى ناشار، دەپ حابارلايدى Egemen.kz

قوعامدىق كولىك ساپاسىنىڭ ەڭ ناشار كورسەتكىشتەرى باتىس قازاقستان، تۇركىستان جانە قىزىلوردا وبلىستارىندا تىركەلگەن. الماتى قالاسى مەن الماتى وبلىسىندا دا ستاتيستيكانىڭ كورسەتكىشى ناشار. مۇندا اۋانىڭ لاستانۋىنىڭ نەگىزگى ۇلەسى كولىك شىعارىندىلارىنا تيەسىلى. ال پاركتەر وسىعان دەيىن تەحنيكانى ديزەل وتىنىمەن ساتىپ العان.

قازاقستاننىڭ قالااراسىنداعى جانە وبلىسىشىندەگى تاسىمالداۋ ماسەلەلەرى دە كۇردەلى جاعدايدا، ولاردىڭ باعىتتارىندا 30 جىلدان اسقان جانە ودان دا ەسكى تەحنيكانى ءجيى كەزدەستىرۋگە بولادى.

وزدەرىنىڭ پاركتەرىن بەلسەندى جاڭارتۋ بويىنشا الدىڭعى قاتارلى قالالار نۇر-سۇلتان، شىمكەنت جانە اقمولا وبلىسى بولىپ تابىلادى. سولتۇستىك قازاقستان، جامبىل جانە قاراعاندى وبلىستارى دا اۋقىمدى جاڭارتۋدى كەيىنگە قالدىرعان جوق.

ماسەلەن، قاراعاندى وبلىسىنىڭ اكىمى جەڭىس قاسىمبەكتىڭ تاپسىرماسى بويىنشا وڭىردە جىل سوڭىنا دەيىن 275 بىرلىك قوعامدىق كولىك جاڭارتىلادى.

جولاۋشىلار قاۋىپسىزدىگىنىڭ دەڭگەيىن ارتتىرۋ جانە ەلىمىزدىڭ قالالارى مەن وبلىستارىنىڭ ەكولوگيالىق ساقتالۋى قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ "قدب-ليزينگ" اق-مەن بىرلەسىپ جۇزەگە اسىرىلاتىن وتاندىق اۆتوبۋستارمەن قوعامدىق كولىكتى جاڭارتۋ جانە جەتىلدىرۋ جونىندەگى باعدارلاماسىنىڭ ارقاسىندا مۇمكىن بولدى.

بۇگىندە ەلىمىزدە اۆتوبۋستار مەن ەلەكتر اۆتوبۋستارىن شىعاراتىن بىرنەشە زاۋىت جۇمىس ىستەيدى.

شىعارىلاتىن تەحنيكانىڭ كولەمى بويىنشا قوستانايلىق "سارىارقااۆتوپروم" كوشباسشى بولىپ تابىلادى، ول بۇگىندە 2413 بىرلىك تەحنيكانى ءوندىردى. بيىل زاۋىت Yutong جانە Ankai اۆتوبۋستارى مەن ەلەكتر اۆتوبۋستارىنىڭ 713 بىرلىگىن جەتكىزدى.

قازاقستانداعى العاشقى Daewoo Bus Kazakhstan قوعامدىق كولىك شىعاراتىن زاۋىتى نەگىزى قالانعان ساتتەن باستاپ 1613 بىرلىك تەحنيكا شىعاردى. اعىمداعى جىلدىڭ العاشقى 8 ايىندا كاسىپورىن Daewoo ماركالى اۆتوبۋسىنىڭ 266 بىرلىگىن شىعاردى.

Hyundai Trans Auto كوممەرتسيالىق تەحنيكاسىن شىعاراتىن زاۋىتتىڭ كولەمى 1000-نان استام بىرلىكتى قۇرايدى. 2019 جىلى زاۋىت 78 اۆتوبۋستى شىعارىپ، Golden Dragon ماركالى اۆتوبۋستارىن شىعارا باستادى. بۇگىندە كاسىپورىن قوعامدىق كولىكتىڭ شاناقتارىن دانەكەرلەۋ جانە بوياۋ بويىنشا تسەحتاردىڭ قۇرىلىسىن جۇرگىزۋدە، وندا كونۆەيەردەن ەلەكتر اۆتوبۋستارى مەن تروللەيبۋستار شىعاتىن بولادى.

جاقىندا سەمەيدەگى "سەماز" زاۋىتى ءوز ءوندىرىسىن ۇيىمداستىردى، ول بيىل 160 گاز جانە Dong Feng اۆتوبۋستارىن شىعاردى.

قالالىق جانە وڭىرارالىق قوعامدىق كولىكتىڭ بالامالى وتىنى بار تەحنيكانىڭ ەكولوگيالىق تازا تۇرىنە كوشۋىنىڭ الەمدىك ءۇردىسى بىرتە-بىرتە قازاقستانعا دا ەنىپ كەلەدى.

قازىردىڭ وزىندە نۇر-سۇلتان، پاۆلودار جانە اقتاۋ قالالارىندا وتاندىق ەلەكتر اۆتوبۋستارىنىڭ باعىتتارىن كەزدەستىرۋگە بولادى. ەلدىڭ كورىكتى ورىندارى – بۋراباي سياقتى كۋرورتتىق ايماقتار دا جاقىن ارادا ەكولوگيالىق تازا كولىكتىڭ تۇرىنە اۋىسۋى مۇمكىن.

ەلەكتر اۆتوبۋستارىن دامىتۋدى ساران قالاسىندا (قاراعاندى وبل.) سالىنىپ جاتقان Yutong جولاۋشىلار جانە ارنايى تەحنيكاسىن شىعاراتىن QazTehna زاۋىتى قولدايدى. جاڭا زاۋىت جىلىنا شامامەن 1200 بىرلىك اۆتوبۋس پەن 400 بىرلىك ارنايى تەحنيكا شىعارۋدى جوسپارلاپ وتىر.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار