ءبىرىنشى بولىپ ءسوز العان بۇۇ دامۋ باعدارلاماسى تۇراقتى دامۋ جانە ۋربانيزاتسيا باعدارلاماسىنىڭ ۇيلەستىرۋشىسى فيرۋز يبراگيموۆ ەكولوگيالىق ورتالىقتار قۇرىلاتىنىن ايتتى.
ء«بىز مەملەكەتتىك دەڭگەيدە ەنگىزىلەتىن ەكولوگيالىق تاربيە باعدارلامالارىن ەنگىزۋ بويىنشا حالىقارالىق تاجىريبەنى, اتاپ ايتقاندا, اقش, ەۋرووداق ەلدەرى, گەرمانياداعى جاعدايدى زەردەلەدىك. تابيعاتقا ۇقىپتى قاراۋ مادەنيەتى قازاقستانمەن كورشى ەلدەردىڭ وزىندە جولعا قويىلعان. وزبەكستان, تاجىكستان, تۇركىمەنستاندا 2000 جىلداردىڭ باسىندا قابىلدانعان ارنايى باعدارلامالار بار. ەكولوگيالىق تاربيە تۇرعىسىنان ءبىر دەڭگەيدە بولۋ ءۇشىن مەكتەپ جاسىنا دەيىنگى بالالاردان باستاپ ەرەسەك ۇرپاققا دەيىن جوبانى ازىرلەيمىز. بۇۇ دب اياسىندا سوڭعى 5 جىلدا 42 نازارباەۆ زياتكەرلىك مەكتەبىندە «كليماتتىق قوبديشالار» ەنگىزىلدى. جوبا باسقا وقۋ وشاقتارىندا دا قولدانىلىپ, ءوز ناتيجەسىن بەرىپ كەلەدى. ءبىز بالالاردى تابيعاتقا ۇقىپتى قاراۋعا, جەر رەسۋرستارىن, سۋ, ورمان جانە جايىلىم جەرلەرىن تۇراقتى پايدالانۋعا, ءبىلىم مەن عىلىمدى ۇيرەنۋگە مەكتەپ قابىرعاسىنان باستاپ باۋليمىز», دەدى ف.يبراگيموۆ.
«سەرپىن» ۇلتتىق ءبىلىم جانە يننوۆاتسيا پالاتاسىنىڭ توراعاسى مۇرات ابەنوۆتىڭ ويىنشا, جۇيەلى بەرىلگەن ەكولوگيالىق تاربيە مەن ءبىلىم وندىرىسكە پايداسىن تيگىزەدى. سوندىقتان وندىرىستىك ورىندار دا ءوز كەزەگىندە وسكەلەڭ ۇرپاققا ەكولوگيالىق ءبىلىم بەرۋگە مۇددەلى بولۋى كەرەك.
«ۇلتتىق تابيعي پاركتەر ءىرى كومپانيالارعا بەرىلدى. مىسالى, ىلە الاتاۋىندا قوناقتاردى قابىلدايتىن ورتالىقتار بار. وندا بالالاردى جەرگىلىكتى تابيعات ەرەكشەلىكتەرىمەن تانىستىرادى. ياعني بالالار دەمالا ءجۇرىپ ءبىلىم الادى. ەكسپو كەزىندە قوقىستى قايتا وڭدەۋ, ودان ەنەرگيا الۋ سياقتى حالىقارالىق دەڭگەيدەگى كەرەمەت تەحنولوگيالار تاجىريبەگە ەنگىزىلدى. ەلىمىزدەگى ءبىر ۇيىم بالالاردى تىڭ تەحنولوگيامەن قوقىستى سۇرىپتاپ, ونى دۇرىس پايدالانۋدى ۇيرەتەدى. كومپانيا ونى قايتا وڭدەۋ ارقىلى پايدا كورەدى. جالپى, بالالاردىڭ ەكولوگيالىق ءبىلىمىن قالىپتاستىرۋ ءۇشىن بارلىعىمىز بىرىگىپ ارەكەت ەتۋگە ءتيىسپىز. ءار سالانىڭ ءوز باعىتى بار. سوندىقتان بۇل مىندەتتى تەك ءبىلىم جانە عىلىم مينيسترلىگىنە ارتىپ قويۋعا بولمايدى», دەپ اتاپ ءوتتى م.ابەنوۆ.
قازاقستان NUR ALEM پاۆيلونىنىڭ جەتەكشىسى اسەم ومار تاربيەنىڭ العاشقى ءنارى بالانىڭ بويىنا الدىمەن وتباسىندا سىڭىرىلەتىنىنە توقتالدى.
«ەكولوگيالىق ءبىلىمدى قالىپتاستىرۋ – ءار وتباسىنىڭ مىندەتى. بالانىڭ بويىنداعى تۋعان جەرىنە, تابيعاتقا, قورشاعان ورتاسىنا دەگەن قامقورلىق سەزىمىن, جاناشىرلىق قابىلەتىن اكە شەشەسى, اتا-اجەسى وياتۋ كەرەك. اتا-بابامىزدىڭ ۇلان-بايتاق جەرىنە نەمقۇرايدى قاراماۋ – ارقايسىمىزدىڭ ازاماتتىق بورىشىمىز. تاستاعان قوقىس ەرتەڭ وزىمىزگە اۋرۋ بولىپ جابىساتىنىن تۇسىنۋگە ءتيىسپىز. اۋانىڭ, اينالامىزدىڭ, سۋدىڭ تازا بولۋى بارىنەن بۇرىن وزىمىزگە كەرەك, ويتكەنى سول اۋانى ءوزىمىز جۇتامىز, سۋدى ىشەمىز, اينالادا جۇرەمىز. باستىسى, وسىنى بالالارعا ءتۇسىندىرۋىمىز قاجەت», دەيدى ءا.ومار.
