بالشىق سورعىش كەمە «ەەك» اق ەلەكتر ستانساسىنىڭ ەنەرگوبلوكتارىنىڭ كوندەنساتورلارىنداعى سۋدى سۋىتاتىن №1, №2 جەتەلەگىش ارناسىندا جۇمىس اتقارماق. ساتىپ الىنعان تەحنيكا ستانسا يگىلىگىنە عانا ەمەس, سونىمەن قاتار ەكولوگياعا وڭ اسەرىن تيگىزەدى. ويتكەنى بالشىق سورعىش كەمە ەرتىس وزەنى ارناسىنداعى تۇنبا مەن لايدى تازالايدى.
ايتا كەتەرلىگى, بۇل ۇدەرىس جىل سايىن جۇرگىزىلىپ وتىرادى. الايدا ەسكى بالشىق سورعىش كەمە ارنانىڭ جاعا تۇسىن عانا تازالاي الاتىن. ەندى ارنانى تولىقتاي تازالاۋعا مۇمكىندىك بار.
– بۇل بالشىق سورعىش كەمەنى ساتىپ الۋ جانە پايدالانۋ اقسۋ ەلەكتر ستانساسىنىڭ ەنەرگوبلوكتارىن سۋمەن قامتاماسىز ەتۋدەگى تاۋەكەلدەردى جويىپ, ەۋرازيالىق توپ قۇرامىنداعى كاسىپورىنداردى ەلەكتر ەنەرگياسىمەن ۇزدىكسىز قامتۋعا جاعداي تۋعىزادى. سونىمەن بىرگە اقسۋ كەنتىنىڭ تۇرعىندارىن اۋىز سۋمەن قامتۋ سەنىمدىلىگىن ارتتىرۋعا سەپ, – دەدى «ەەك» اق اقسۋ ەلەكتر ستانساسىنىڭ باس ينجەنەرى ۆاديم ۆەرەششاكا.
تارتىپ شىعارىلاتىن گيدروقوسپالار مەن قويىرتپاق سۋدى بۇركەيتىن ارنايى بەلگىلەنگەن ۋچاسكەلەرگە قويىلىپ, سورعىتىلادى. بالشىق سورعىش كەمە – سۋ استىنان گيدروقوسپا تۇرىندەگى توپىراقتى سورىپ الاتىن جانە شايۋ كارتاسى نەمەسە ۇيىندىگە تاسىمالدايتىن تەحنيكالىق فلوت كەمەسى. گيدروقوپسىتقىشى مەن مەحانيكالىق قوپسىتقىشى بار. نەگىزگى اگرەگات ونىمدىلىگى – قۇمدى قيىرشىقتاستى قوسپا بويىنشا ساعاتىنا 80-نەن 800 تەكشە مەترگە دەيىن جەتەتىن توپىراقتى سورعى.
